2 Cronicas 17 - Old Testament Quechua Wanca（QVW）

Judaćhu Josafatmi mandacun

1Chaypi Asap pudirnin chulin Josafatñam mandacüca cala. Paymi Israelpa cuntran śhalcunanpä sumä alistaculcäla.

2Chaymi Judaćhu murälläśha malcacunäman, jinaman waquin malcacunamanpis täpäcunactawan pilyäcunacta ćhuläla. Chaynütacmi papänin Asa pudiracuycuśhan Efrainćhu cä malcacunämanpis ćhuläla.

3 Tayta Diosñatacmi Josafatwan cayäla. Pay awquillun Davidnu cawsaycul taytacha Baaltapis mana sirbillalmá cawsaycula.

4Israel läducunäpa cawsaynintá manamari atichilachu. Aśhwanpa taytanpa Diosninta sirbiyculmi camachicuynincunacta lulaycula.

5Chaymari Josafatpa mandacuyninta Tayta Dios tacyaycachila. Jinantin Juda nunacunäpis imaymana rigälucunacta upäcuptinmi, alli-alli cäniyu cala; jinaman achca-achcatacmi altumanpis julaycälila.

6Pay, Tayta Diospa munayninćhu cushisha cawsayculmari, ulꞌucunäćhu uycunacunactawan mamacha Aserap liträtun lulaśhancunactapis, jinantin Judapi chincächila.

7Quimsa wataña Josafat mandacuyalmi, Judaćhu cä malcacunäta yaćhaycachinanpä puydï yanapänincunacta caćhala: Bel-hailta, Abdiasta, Zacariasta, Natanaelta, Micaiastapis.

8Paycunawan cuscactam levitacunätapis caćhala: Semaiasta, Netaniasta, Zebadiasta, Asaelta, Semiramotta, Jonatanta, Adoniasta, Tobiasta, Tobadoniastapis; jinaman sasirdüti Elisamawan Joramtapis caćhalamari.

9Paycunactamá Tayta Diospa camachicuyninta apachila Juda läducunäta yaćhachipäcunanpä. Chaymi Judaćhu cä nunacunäta yaćhachishtin malcan-malcan pulipäcula.

10Ñatac Judapa muyülïninćhu cä nasyuncunaca Tayta Diosta sumä-sumä manchaculcalmi, Josafatwan pilyayta mana pinsalcälilañachu.

11Aśhwanpa Josafatwan jawca allin cawsaycälinanpämi, Filisteo läducunaca rigälucunacta uycälila; jinaman illaycunactapis pägaycälilam. Arabia läducunäñatacmi anćhish walanga anćhish paćhac (7,700) ulu uwishcunacta, anćhish walanga anćhish paćhac (7,700) capishcunacta uycapäcula.

12Chaynüpam Josafat sumä munayniyüman masta-mastaña muyula. Jinalmi Judaćhu śhalcachila sumä murälläśha malcacunactawan micuy ćhulana malcacunactapis.

13Jinantin Juda lädup malcancunaćhu achca-achca allincunacta śhalcalcachilmi micuycunactapis pilwaycula. Jinaman ishpisha-cama allin pilyänincunam Jerusalenćhüpis cacula.

14Pilyänincuna ayllunpa-camamari capäcula. Judaćhu walanganpi cä pilyäcunap puydïnincunam caycuna:

Adnas, paywanmi quimsa paćhac walanga (300,000) pilyäcuna cala.

15Jinaman Johanan, paywanñatacmi ishcay paćhac pusä ćhunca walanga (280,000) pilyäcuna cala.

16Jinaman Zicrip chulin Amasias, paywanñatacmi ishcay paćhac walanga (200,000) alli-cama pilyäcuna cala. Payꞌa quiquillanpïtamari Tayta Diosta sirbiyta allayculapis.

17Benjaminćhu puydïcunäñatacmi caycuna: pilyaypä ishpisha-ishpisha cä Eliada, paywanmi ishcay paćhac walanga (200,000) alli-cama pilyäcuna atajachicuyü-cama, flïchayü-cama cala.

18Jinaman Jozabad, paywanmi paćhac pusä ćhunca walanga (180,000) pilyäcuna listu-listullaña pilyananpä cayalcäla.

19Lluy paycunamari mandacü Josafatpa sirbïnincuna capäcula. Ñatac jinantin Juda lädućhu murälläśha malcacunacta täpananpä ćhulaśhancunacá, chayman manam fintaśhapischu capäcula.