Ezequiel 4 - Old Testament Quechua Wanca（QVW）

Jerusalen imanuy cananpämi Ezequiel camalachin

1“Am wañucülla nuna, juc adubicta chalalcul puntayquiman ćhulaycuy. Chaypa jananćhu Jerusalen malcap liträtunta lulaycuy.

2Jinalcul mana mayanpis ayipäcunanpä chay malcap muyülïninman murällanta lulaycuy. Chaypa ipanmanñatacmi allpacta juntülunqui ishpipaśh cananpä. Chay malcap muyülïninmanmi lluy pilyäcunäta śhaycächinqui; jinaman tunichinanpä jïrru tacäcunätapis ćhulaycunquim.

3Chaypïta murällactanu juc lacta lätacta śhaycaycachiy, amtawan malcäta laquishunayquipä. Chaynu malcap cuntran pilyä yaycuyänümari am jinalla jicutaycunqui. Chay lulaśhayquica Israel läducunäta tantiachinanpämari caycunꞌa.

4“Jinalcul ichü läduyquiman jitalacuycuy Israel lädup juchanta ampa janäniquiman ćhulcunayquipä. Chay läduman jitaläśhayquicama paycunap mućhuchicuynintamá apaycunqui.

5Juc wata mućhuchicuyninpïtamá juc muyun apaycunqui. Chayurá Israel lädup juchanta quimsa paćhac isun ćhunca (390) muyun apaycunayquipämi niyac.

6Chaychica muyunman ćhälulñatacmi caśhan jitalacuycunqui allï läduyquiman. Chaynüllam Juda lädup juchanta apaycunqui tawa ćhunca (40) muyun; juc wata mućhuchicuyninpïtamari juc muyuntac apaycunqui.

7Chaypïta cunćhäśha Jerusalenman lilculmi liclayquita patipaculcul chay malcacta ima pasanantapis willaycunqui.

8Má, canan yaꞌami watuwan amta ćhänäśhayqui may lädumanpis mana muyulcunayquipä. Chaynu caycunqui cunćhalänan muyunca camacänancamamá.

9“Amñatac trïgucta, siwäta, äwaśhta, lintïjacta, abïnacta, mijo nishantapis juntuycuy. Jinalcul juc mancallaćhu ayćhiycul quimsa paćhac isun ćhunca (390) muyuncäpä tantacunacta lulaycuy. Chaytam ichü läduman iscataläśhayquićhu jucta-camalla muyun-muyun micunqui.

10Lisisha ürallaćhütacmi walan-walan cuartu quïlullacta micunqui.

11Lisisha ürallaćhütacmi yacuctapis ćhawpi litrullacta upyanqui.

12Chay siwä tantactañatacmi nunap ismayninwan cusanqui. Jinalculmi lluypa ñawpäninćhu micunqui” nil.

13Nilculmi Tayta Dios niman: “Israel läducunäta juc nasyuncunaman prïsu puśhachiptïmi chaynu anlapä licaśha tantacunacta micapäcunꞌa” nil.

14Nimaptinmi nilá: “Tayta Diosllay, chaynu anlapä licaśhacunacta yaꞌa imaypis manamá miculächu. Quiquillanpi wañüśha uywacunap aychanta ütac munti uywacunap wañuchishan aychactapis manamari miculächu. Uchuylläpïpis chaynu anlapä licaśha cäcuna manamá shimïman yaycuyculachu” nil.

15Niptïmi Tayta Dios niman: “Chayurá nunap ismayninwan cusanayquitá calcawanñam tantayquita cusanqui” nil.

16Nilculmi niman: “Má wañucülla nuna, cay Jerusalenćhu micuyta chincächishämá. Chaymari tupuśhallactaña llaquisha micapäcunꞌa. Yacuctapis manchaśhallañam tupuśhallacta upyapäcunꞌa.

17Tantapis yacupis manaña captin llaquishallañamá licanaculcanꞌa. Juchancunapïtamari ismuyänu supayapapäcunꞌa” nil.