Esdras 5 - Old Testament Quechua Wanca（QVW）

Alawana wasictam caśhan allichapäcun

1Canan má, ñawillanćhu cachï Israelpa Tayta Diosnin willacachishantam willacü Hageo jinaman Iddop chulin willacü Zacarias willaculcäla Juda lädućhu, Jerusalenćhu lluy cäcunäman.

2Chaymi Salatielpa chulin Zorobabel jinaman Josadacpa chulin Jesua Jerusalenćhu cä Tayta Diospa alawana wasinta śhalcachiyta allacaycälila. Paycunawan Tayta Diospa willacünincunapis cayalcalmari yanapapäcula.

3Ñatac Eufrates mayup chimpan malcacunäpa puydïnin Tatnai, yanapänin Setar-boznaiwan jinaman lulawshï-masincunawan Jerusalenman lilcälilmi nicuyalcan: “¿Mayantan cay alawana wasictawan pilancunacta caśhan śhalcachipäcunayquipä nipäcuśhulanqui?

4Cay alawana wasicta, ¿mayancunamá allichachïcunaca cayalcan?” nil.

5Ñatac Israel läducunäpa yaśhancunacta Tayta Dios yanapaptinmi manalcachiyta mana atipapäculachu mandacü Darioman carta apachishanca cutimunancama.

6Caynümi Eufrates mayup chimpan malcacunäpa puydïnin Tatnai, Setar-boznai lulawshï-masincunawan mandacü Darioman carta apachishancäćhu niña:

7“Mandacü taytallay Dario, jawca cawsay amćhu caycullächun.

8Taytallay, cananmi willaycälimuc. Yaꞌacuna Juda läduman lipäculmi sumä Tayta Diospa alawana wasinta allichapäcuśhanta licälälimú. Pilancunactapis jatućha lumi labräśhawanmi śhalcayalcächin, iluncunapis armäśhañam cacuyan. Sumä impïñuwan lulapäculmi ishpichicuyalcäñäña.

9Chaymi yaśhancunacta tapupäculá: ‘¿Alawana wasictawan pilancunacta śhalcachinayquipä mayantan nishulanqui?’ nil.

10Chaynütacmi mayan lulachishancunäpa śhutincunactapis tapulá isquirbiycul am mandacünïman apachimunacpä.

11Chaynu tapuptïmi nipäman: ‘Yaꞌacuna janay pachäćhu cay pachäćhu cä Tayta Diospa nunanmi capäcú. Cay una-unayña Israel lädup allin mandacüninpa lulachishan alawana wasictamari caśhan śhalcayalcächí.1Rey 6—7.

12Chay unay awquillücuna janay pachäćhu cä Tayta Diosta piñälälichiptinmi Caldeo lädu Babiloniap mandacünin Nabucodonosorpa maquinman ćhulaycälälimäla. Chaymi paycuna cay alawana wasicta pampaman muyulcachil nunacunätañatac Babiloniaman prïsu puśhacalcämäla.2Rey 25.8-12; 2Cro 36.17-20; Jer 52.12-15.

13Ñatac Babiloniap mandacünin Cirom mandacuyta allaycuśhan wataćhu camachila Tayta Diospa alawana wasin śhalcachisha cananpä.Esd 1.2-11.

14Jinamanꞌa Nabucodonosor Jerusalenpi apalcul Babiloniaćhu taytachancunap alawana wasinćhu ćhulachishan ürupi illaypi cä sirbichicuna cäcunactapis mandacü Ciro julalcachimulmi Sesbasarman uycula. Paymari Juda lädućhu puydïpä ćhulaśha cala’ nil.

15Chay puydï Sesbasartam mandacü Ciro nila: ‘Jerusalenćhu Tayta Diospa alawana wasinta may caśhallanćhu śhalcachimuy. Chaymanmi sirbichicunapä cäcunätapis apanqui’ nil.

16Niptinmi Sesbasar cay Jerusalenman ćhaycamul Tayta Diospa alawana wasinta simintachiyta allaycula. Chay muyunpi lulay-lulay cayalcalpis manalätacmi ishpichipäcüchu” nil nipäman.

17“Chayurá mandacü taytay, allinpä licayculꞌa, Babiloniap punta mandacünincunap ima lulaynincunapis isquirbisha caśhanćhuꞌari sumäta licaycuy. Chay mandacü Ciro Jerusalenćhu Tayta Diospa alawana wasin śhalcachisha cananpä nishanca rasunchun icha yanꞌalchun. Tuquicta yaćhayculꞌari imam nishayquita willaycälichimay” nil.