Isaias 26 - Old Testament Quechua Wanca（QVW）

Tayta Dios yanapänanpä chalapacuśhan taqui

1Chay muyunćhümi Juda lädućhu cay taquicta taquipäcunꞌa:

“Malcacta murälla licaycuśhannümá

Tayta Dios malcanta licaycunꞌa.

2Chay sigüru malcap puncucunacta quićhapäcuy

tincüllanman cawsäcunäpä,

chalapacuyninćhu tacyaycü malcapä.

3Anman chalapacul amllaman

llapan śhunꞌuntapis ćhulaycücunäta,

jawca cawsayllaćhümá caycachinqui.

4 Tayta Diosllamanꞌari

imaypis chalapaculcay;

payꞌa wiña-wiñaypä cä Wancamá.

5Nunatucücunäta paymá cućhpachin;

allintucü malcactapis

paymá pampaman muyüchin,

aśhta pampäcamalämá uyshulächinpis.

6Jinäluptinmi usuchisha cäcunäpis jalutaculcan;

wacchacunäpis janäninpa pulipäcun” nil.

7Ñatac chuya nunap caminunꞌa tuqui pampatäśhallamá;

am Tayta Diosllamari caminunta pampataycunqui.

8 Tayta Diosllay, camachicuyniqui nishanmannu

cawsaycälishäpam, amllaman chalapacuyalcac.

Amta altuman juluycuymi śhunꞌücunaćhu imaypis cayan.

9Tutanpapis amllapïmi muspapacú;

achicämuptinpis amllactam ashiycú.

Tincüninman cäraycunayquipä cay pachäman ćhämuptiquimari,

nunacunaca allin lulayta yaćhaycälinꞌa.

10Juchasapa nunacunäta llaquipaycuptiquipis

tincüllanman lulaycäta manamá yaćhapäcunchu.

Masqui juccuna allincäta lulaycapäcuptinpis

juchasapa nunacá mana allincäta jinallamá lulayalcan;

Tayta Diospa sumä caynintapis mana cäpämi licapäcun.

11 Tayta Diosllay, camacaycünayquipä

maquiquita pallalcuśhayquitapis manamá imapis uculcanchu.

Malcayquita sumä cuyaśhayquita licalmi uyshulapäcunꞌa.

Ćhïnicüniquicuna walayä piñacuyniquiwan

camacaycüśha capäcuchun.

12Am Tayta Diosllämá jawcacta cawsaycälichimanqui;

lluy ima lulaycälishäcunactapis anmá lulayculanqui.

13Taytallay, Diosnillay juc mandacücunamá maquinćhu cachipämäla;

ñatac yaꞌacuna amllactamá imaypis altuman julaycälic.

14Chay mandacücunaca wañüśhañamá cayalcan;

manañamá cawsapäcunꞌachu.

Anmá mućhuycächinqui, camacaycülunqui;

mayanpis mana yalpalcunanpämá chincächinqui.

Wañüśhañamá cayan; manañamá śhalcamunmanñachu.

15Am Tayta Diosllämá cay nasyunniquita

milaycachil jatunman ćhulayculanqui.

Lindïruncunactapis masmanlämá milaycachilanqui.

Altuman juluycuśha canayquipämari jatunchayculanqui.

16 Tayta Diosllay, llaquicuynïćhu amllactamá ashipäculac;

mućhuycachipämaptiqui mañacalcämuptïmá uyaliycälillämälanqui.

17Maynümi patayu walmi ishyacunanpä

nanayninwan intiycaćhaśhtin apalcaćhan,

chaynümi am Tayta Dioslläpa

ñawpäniquićhu caycälilá.

18Awari, nanaywanmi inticaćhaculcá;

ñatac waywallactamá ishyacälälí.

Cay pachäman manamá salbasyuntachu apapämulá;

cay allpäman cawsaytachu manamari apapämulá.

19Ñatac amćhu wañücunacá cawsapäcunꞌamari;

paycuna śhalcapäcunꞌamá.

Allpäćhu pampaläcunaca licaćhaculcul

cushicuypïtamá taquipäcunꞌa.

Acchiqui śhullinu wañüśha cä malcayquiman ćhaycuptinmá,

wañücunäta cay allpaca cutiycachimunꞌa.

20Cuyaśhá malca, wasiquiman

yaycuycul-pachañari puncuyquita wićhacämuy.

Tayta Diospa piñacuynin

pasanancamari pacacuycuy.

21Licapäcuy, Tayta Dios yaćhaśhancäpi yalayämunñamá,

cay allpäćhu yaćhäcunäta

juchancunapi mućhuycachinanpä.

Wañüchisha nunacunäta

cay allpaca manañamari pacaycunꞌañachu;

lluy-lluytañamá julaycamunꞌa.