Zacarias 1 - Old Testament Quechua Wanca（QVW）

Tayta Diosman cuticalcämunanpämi nin

1Mandacü Dario ishcay wata, pusä quilla mandacuyaptinmi Iddop willcan, Berequiaspa chulin willacü Zacariasman Tayta Dios limapäla.

2Caynümi nin: “Awquilluyquicunapämi yaꞌa Tayta Dios sumäta piñacülá.

3Cananꞌa malcätari niycamuy yaꞌa Sumä Munayniyu Tayta Dios caynu nishäta: ‘Yaꞌaman cuticalcämuy; yaꞌapis amcunamanmi cuticamuśhä. Yaꞌa sumä munayniyu Tayta Diosmari niyá.

4Awquilluyquicunanuꞌa amari capäcuychu. Paycunacta punta willacünïcunawanmi willacachilá mana allin lulaynincunapi, mana allin cawsaynincunapi cuticalcämunanpä. Ñatac paycuná manam uyalïtuculcälachu nï cäsuculcälachu. Yaꞌa sumä munayniyu Tayta Diosmari niyá.

5“ ‘Canan má, ¿awquilluyquicuna cayalcanñachun imamá? ¿Willacücunäpis pasaypipäñächun cawsayalcan imamá?

6Willacünïcunawan willacachishänümari lluy pasala. Willacachishänu mućhuycachiptïmari wanaculcul cuticalcämula caynu nishtin: “Sumä munayniyu Tayta Dios imam nishannüllam lulaśhanchicmannu, cawsaśhanchicmannu tincüta yaꞌanchicwan lulaycula” ’ ” nil.

Arrayancunäćhu cä nunactam lican

7Mandacü Dario ishcay wata, ćhunca jucniyu Sebat nisha quilla, ishcay ćhunca tawayu (24) muyuncäćhu mandacuyaptinmi Iddop willcan, Berequiaspa chulin willacü yaꞌa Zacariasman Tayta Dios licachimäla.

8Tutanpam caytanu licälú: Juc wayapam pucash-nilä cawalluman sillacüśha achca arrayancuna caśhan wayućhu śhäcuyäña. Chaypa ipanćhüñatacmi pucash, bäyu, yulä cawallucuna sillädantin-cama śhäcuyalcäña.

9Chayćhümi anjilcäta tapuyculá: “Taytallay, ¿caycuna mayancunam?” nil.

Niptïmi: “Mayancuna caśhantapis yaꞌami licachishayqui” niman.

10Chay arrayancunäćhu cä wayapam nimun: “Paycuna jinantin pachäta muyumunanpä Tayta Dios caćhaśhancunämi cayalcan” nil.

11Paycunañatacmi arrayancunäćhu cä Tayta Diospa anjilninta nipäcun: “Jinantin pachäta muyülälimüñam; allin jawcallam jinantin pachaca cayäña” nil.

12Niptinmi Tayta Diospa anjilnin: “Sumä munayniyu Tayta Diosllay, ¿anćhish ćhunca (70) wata jinallachun piñacüśha cayanqui Juda lädu malcacunäpä, Jerusalen malcapä? ¿Imaycamañam mana llaquipaycul cayanqui?” nin.

13Niptinmi yaꞌawan limä anjilcäta allin limaycunawan Tayta Dios callpanchaycun.

14Chaypïtam anjilca niman: “Sumä munayniyu yaꞌa Tayta Dios cay nishäta willacamuy: ‘Jerusalenta, Sionta ama-pacha niyämi.

15Aw, malcäpa piñacüśha cayalmari juc nasyuncunäwan mućhuycachilá. Ñatac masta piñacüśha cayá chay quiquillanman chalapacüśha nasyuncunaca malcäta masnintalä ñacachiyta jicutapäcuśhanpïmari.

16Chaymi yaꞌa Tayta Dios ní: Cananꞌa Jerusalenta llaquipaycuśhämi. Chayćhümi alawana wasí śhalcachisha canꞌa; Jerusalenman plumädá caśhanmi ćhulaycuśha canꞌa. Yaꞌa sumä munayniyu Tayta Diosmi niyá’ ” nil.

17Chaypïtam anjilca niman: “Sumä munayniyu Tayta Dios yapatacmi nin: ‘Malcäman caśhanmi allin cänincunacta timpuycachishä; Sionta yaꞌa quiquïmi caśhan cunsuylaycuśhä. Jerusalen caśhanmi aclaycuśha malcá canꞌa’ ” nil.

18Chaypi licachimäśhanta licalcuśhäćhümi tawa wälacta licälú.

19Chayćhümi yaꞌawan limä anjilcäta tapuyculá: “¿Cay wälacunaca imactam tantiachimanchic?” nil.

Niptïmi: “Israel, Juda läducunäta, jinaman Jerusalentapis cay wälacunämi lluy chiꞌichïca cayan” niman.

20Chaypïta jïrru tacä tawa nunacunactam Tayta Dios licaycachiman.

21Chaymi nilá: “¿Ima lulätan cay nunacunaca śhacayalcämun?” nil.

Niptïmi: “Chay wälacunämi Juda läducta pasaypi chiꞌichila, umanta pallalcuyta mana atipapäcunancama. Paycunacta chucchuchinanpä, nasyuncunäpa wälancunacta pampaman muyüchinanpämari jïrru tacäcunaca śhacayalcämun. Juda läducta wälanwan lluy chiꞌichïcunäta camacaycunanpämari śhacayalcämun” nil.