1¡Imanuylä canꞌa yanapänanpä Egiptoman lïcunaca!
¡Imanuylä canꞌa Egiptop cawalluncunaman,
carritancunaman, sumä-cama
sillädancunaman chalapacücunaca!
Israelpa Chuya Tayta Diosninmanꞌa,
manamá uchuyllapis chalapaculcanchu
nï ashiycälinpischu.
2Ñatac Tayta Diosꞌa mas yaćhayniyülämari cayanpis.
Payꞌa ñacaycunacta ćhächinanpä nishancäta
ipaman manamá cutichinꞌachu.
Mana allin nunacunäpawan yanapänincunap cuntranmari pay śhalcunꞌa.
3Chay Egipto läducunacá nunacunallamari; manamá Tayta Dioschu.
Cawalluncunapis aychallamá; manamá pudirniyüchu.
Tayta Dios mućhuycachinanpä maquinta pallalcuptinmá,
yanapäcäpis, yanapaycuśha cäcäpis cućhpapäcunꞌa;
lluy-lluymá jucllaćhu camacapäcunꞌa.
4 Tayta Diosmi caynu niman:
“Sumä munayniyu Tayta Diosmi Sion ulꞌuman pilyä jiꞌalpamunꞌa.
Maynümi allinnin liyun uwishta micuyaptin
uwish michïcuna juntunacuycul maynu-maynu
apalcaćhapäcuptinpis ütac lüyapäcuptinpis mana manchacunchu;
chaynümá sumä munayniyu Tayta Diospis
Sion ulꞌup puntanman pilyä jiꞌalpamunꞌa.
5Maynümi pälï pishuca ishñanta ñawillanćhu caycachin;
chaynümá Jerusalenta sumä munayniyu Tayta Dios
ñawillanćhu caycachinꞌa, libraycunꞌa, yanapaycunꞌa, salbaycunꞌa” nil.
6Am Israelcuna, cuntran sumä śhalcuyalcalpis cananꞌa Tayta Diosman cuticalcämuyñari.
7Chay muyun ćhämuptinmari juchasapa maquiquiwan lulaculcäśhayqui ürupi, illaypi cä taytachayquicunacta wicapapäcunqui.
8Ispädawanmi Asiria camacaycüśha canꞌa,
ñatac manamá nunacunap ispädallanwanchu.
Chay ispädapïta lluy-lluy ayiyalcaptinpis,
müsuncunactamá uyway nunanpä puśhapäcunꞌa.
9Allin-camacunäpis manchacuypïmi chucchupäcunꞌa.
Puydïcunäpis pilyupä bandira apaśhanta caćhayculmá ayiculcanꞌa.
Chaynu niyan Tayta Diosmá;
Sionćhümari paypa ninan walayan,
Jerusalenćhümari urnun latayan.
Who We AreWhat We EelieveWhat We Do
2025 by iamachristian.org,Inc All rights reserved.
