1Carsilcäpa patyunćhu Jeremias prïsu wićhalayaptinmi Tayta Dios caśhan limapan cay nil:
2“Cay allpäta lulaycul tincüllanman-cama tacyaycachï yaꞌa Tayta Diosmi ní:
3Yaꞌacta ayacamaptiquiꞌa uyaliycuśhayquimá. Am, mana lisishayqui sumä allincunactalämá yaćhaycachishayqui.
4-5Cay malcaćhu cućhpachinanpä cä wasicunapïtawan Juda lädu mandacücunäpa palasyuncunapïtam Israelpa yaꞌa Tayta Diosnin ní: Babilonia läducunämi pilyä śhapämul cay malcap murällanpa muyülïninman allpacunacta muntunälälin. Sumä piñacuynïćhu camacaycuśhá wañücunäwanmi chay wasicunactapis juntachipäcunꞌa. Cay malca mana allincunällacta lulapäcuśhanpïmá licaytapis manaña munächu.
6“Ñatac chaypïta allinyaycachishämi, jampiycuśhämi. Jawca cawsayćhümi tacyaycachishä.
7Jinaman Juda, Israel lädu prïsu puśhaśha cäcunätamari cutichimuśhä. Punta caśhanmannümi yapa muyuycachishä.
8Yaꞌapa cuntrá mana allin lulaycunacta lulaśhancunapïtamá chuyanchaycuśhä. Mana uyalicul juchaculcäśhanpïtamá pampachaycuśhä.
9Chaynu allin lulaycuśhäcunacta jinantin allpäćhu nasyuncunämá yaćhapäcunꞌa. Cay Jerusalen malcämari cushicuyní, alawacuyní, jatunchacuyní canꞌa. Chaynu paycunaćhu allincunäta lulaśhäta, jawca cawsayta uycuśhäta licapäculmá lluy nasyuncunaca manchaculcanꞌa, chucchupäcunꞌa” nil.
10 Tayta Diosmi nin: “Amcunam niyalcanqui: ‘Cay malca mana nunayüña, mana uywayüñamá pulumäśha cayan. Juda lädup malcancunapis, Jerusalen malcap cällincunapis mana nunayüña, mana uywayüñamá chunyayan’ nil. Masqui chaynu cayaptinpis yapañatacmi uyalinqui,
11sumä cushicuyta, casaracuy fistacta. Chaynütacmi sulpäta ucuyninwan yaꞌa Tayta Diospa alawana wasïman uycunanta apäcunätapis taquishanta uyalinqui:
“ ‘Sumä munayniyu Tayta Diostari alawaśhun.
Tayta Dios allinmá; llaquipäcuynin wiña-wiñaypämá’ nil nishanta.
“Yaꞌa allinman muyuycachiptïmá punta caśhannu caycälinꞌa. Yaꞌa Tayta Diosmari niyá” nil.
12Sumä munayniyu Tayta Diosmi nin: “Mana nunayu, mana uywayu pasaypi pulumäśhäćhümi, lluy malcacunäćhümi pastucuna caśhan licalimunꞌa. Chaymi michïcunaca uywancunacta chayćhu michipäcunꞌa.
13Yaꞌa Tayta Diosmi ní: Ulꞌu lädu malcacunäćhu, Sefela, Neguev lädu malcacunäćhu, Benjaminpa allpancunaćhu, Jerusalenpa muyülïnincunaćhu, Juda lädup malcancunaćhüpis michïcuna uwishnincunacta yupapäcuśhantamá caśhan licapäcunꞌa.
14“Yaꞌa Tayta Diosmari ní: Israel lädu, Juda lädu allin capäcunanpä limalicuśhäta lulaycuná muyun jiꞌacaycayämunñamá.
15Chay muyun, chay timpu ćhämuptin Davidpa milayninpïtam Allinca tincüninman chillquimunꞌa. Paymi cällanman, tincüllanman allincällacta lulaśhtin mandacunꞌa.
16Chay muyuncunaćhu Juda lädu salbaycuśhamá canꞌa; Jerusalenpis jawca sigürumá yaćhaycunꞌa. Chaymi ‘Tayta Dios tincüllanman licaycamäninchic’ nil śhutichapäcunꞌa.
17“Yaꞌa Tayta Diosmi ní: Davidpa milayninpïta Israel lädućhu mandacücuna manamá imaypis faltanꞌachu.
19Chaypïta Jeremiastam Tayta Dios nin:
20“Yaꞌa Tayta Diosmi ní: Muyunca, tutaca timpullanćhu pasananpä limalicuśhäcäta manamá mayanpis mana cäman muyuchinmanchu.
21Chaynütacmi sirbïní Davidman limalicuśhäcäpis mana cäman nï muyuchisha canmanchu. Davidpa milayninpïta mandäcuna canꞌamá; chaynütacmi sirbïní levi ayllu sasirdüticunäpis capäcunꞌa.
22Sirbïní Davidpa milayninta, sirbïní levitacunäta achca-achcamanmá milaycachishä. Paycuna sïlüćhu cä uyllurcunänu mana yupayta atipanamá capäcunꞌa; lamarćhu aꞌunu tupuyta mana atipanamá capäcunꞌa” nil.
23Chaynütacmi Jeremiasta Tayta Dios nin:
24“Cay nunacunaca, ¿manachun niyalcan: ‘Aclacuśhan Israelta, Judata Tayta Dios jitälunmá’ nil? Chaymari malcäta mana cäpäña licapäcun; nasyuntanüñachu manañamá licapäcunpis.
25Yaꞌa Tayta Diosmi ní: Sïchuśh muyuncäman tutäman mana limalicümanchu cala, chaynütac sïlüćhu allpäćhu lluy cäcunämanpis mana limalicümanchu cala,
26chayurá Jacobpa milaynintapis, sirbïní Davidpa milaynintapis manaćhá aclaycümanchu cala mandacü cananpä. Paycunap milaynincunamari Abrahampa, Isaacpa, Jacobpa milaynincunacta mandapäcunꞌa. Ñatac prïsu puśhaśha caśhanpïta cutiycachimulmi paycunacta llaquipaynïćhu caycachishä” nil.
Who We AreWhat We EelieveWhat We Do
2025 by iamachristian.org,Inc All rights reserved.
