1Quiquillanpä imactapis munayä nunacá quiquillanpämi ashin;
allin anyapaycuy captinpis piñacülunmá.
2Luclucá yaćhaycuyta manamá uchuyllapis munanchu;
uman chalaśhallanta limaśhanpïmi alawacun.
3Mana allin lulayca pinꞌayllactamá apaycamun;
allintucuyca uyshulayllactamá ćhaycachimun.
4Nunap limaynin luli-lulipi yalamü yacunümá cayan;
yaćhayca pucyupïnümá mana camacaycü timpuyämun.
5Juyu nunacta śhalculcul allin nunätañatac
juchayüpa licaycuśhanca manamá allinchu.
6Luclup shiminꞌa piñanacuyllactamá śhalcachin;
limayllanwanmá lawćhachicunpis.
7Lucluca shiminwanmi pampaman muyuchicun;
limayllanwanmi cunca cuchuyninta ashicun.
8Jucpa waśhanta limayca mishquinümá mishquicullan;
tumshuncamalämi pasaycunpis.
9Lulapacü illacunaca mana cäman
muyuchï nunawan wawꞌi-caśhanülämá capäcun.
10 Tayta Diosꞌa sumä-sumä masïsu türrinümá;
tincüninman chalapacücunaca payman wayra-wayra pasapäculmá sigüru caycälin.
11Rïcu nunapä cänincuna malcap sumä murällannümá cacuyan;
imactapis mana yaycachï pilanümá cacuyan.
12Nunatucücäta mana allincämá atiyan;
mana nunatucücäñatacmi ichá altuman juluycuśha.
13Sumäta mana uyaliycul limäcá pinꞌayćhu caymi,
jinaman luclu caymi.
14Ishyä nunacta cushisha cayninmá śhalcapacachin.
Ñatac llaquisha cayäcätá, ¿mayanmá śhalcapacachinman?
15Allin tantiayniyüca yaćhaytamá talin;
yaćhayniyücäpa linlinpis yaćhaycällactamá ashiycun.
16Imallactapis uycuśhá mayanllapis awniycunmá;
puydï nunacunäpa ñawpäninmanpis ćhächimanchicmá.
17Puntacta quijacüca mana juchayünümi cacuyan;
juc partica ćhämulñatacmi ichá mana caśhanman ćhulälun.
18Ima quija allichaycuypä captinpis chüsayculmi juclla allichapäcun;
puydïcunäpis imam chüsaśhanmannümi lulapäcun.
19Apanacuśha-pula piñacüśha nunaca murälläśha malcaman yaycuyta mana atipananümá cayan;
pilyäśha cayäca malcap rïjanwan laquïshanümá cayan.
20Nunaca shimin nishanwanmá imactapis ćhasquiycun;
imam limaśhanwanmá imactapis taliycun.
21Shimiquimá cawsaytapis wañuytapis taliycachishunqui;
chaymi cuyaśhayquimannu limaśhayquip wayuyninta ćhasquiycunqui.
22Walmicücá sumä allincätamá taliycun;
Tayta Diospa cuyacuynintamá ćhasquiycun.
23Wacchaca uchuc shimillanwanmá mañacullan;
rïcüñatacmi ichá nanay shiminwan liman.
24Waquin apanacuśhanchiccunaca rätullapämá;
juc nunäñatacmi ichá wawꞌi-caśhanchicpïpis maslä caycun.
Who We AreWhat We EelieveWhat We Do
2025 by iamachristian.org,Inc All rights reserved.
