Numeros 23 - Old Testament Quechua Wanca（QVW）

Israel caśhtacunaca allin caycunanpämi Balaam niycun

1Chaypïtam Balacta Balaam nin: “Cayćhu anćhish uycuna patacta lulapamay; jinaman anćhish wäcactawan anćhish ulu uwishta uycunäpä cumudaycuy” nil.

2Chaynu Balaam nishanmannümari Balac lulaycula. Jinaptinmi uycuna patacćhü-cama ishcaynin uycälila juc wäcactawan, juc ulu uwishta.

3Chaypïta Balacta Balaam nin: “Cay cañanayquipä cä lädullanćhu cachcay, ichapis Tayta Dios yaꞌawan limayta munayan. Chaypïtaćh ima nimäśhantapis willaycuśhayqui” nil. Nilculmi Balaam chunyä ulꞌuman licun.

4Chayćhu Tayta Dios licalïmuptinmi Balaam nin: “Anćhish uycuna patacta lulaycachilmi uycuna patacćhü-cama juc wäcactawan ulu uwishta uyculac” nil.

5Chaymi Tayta Dios Balaamta yaćhachila caynu: “Balacman cutil nishallätanümari niycunqui” nil.

6Chay cutinanpämi Moab puydïnincunawan cusca Balac śhäcuyäña cañaywan uycunancäpa lädullanćhu.

7Chayćhümi cay willacuyta Balaam nin:

“Aram malcapïtam mandacü Balac puśhachimäla;

inti ishpimunan lädu ulꞌupïtam Moabpa mandacünin puśhachimäla.

Paymi nichimäla: ‘Śhalcamul Jacobpa milaynincunacta

mana allin cananpä niycapamay;

Israelpa milaynincunacta ñacapäcunanpä niycapamay’ nil.

8Ñatac ¿Tayta Dios mana niyaptinꞌa

imapïmá mana allin cananpä niycuśhä?

¿Tayta Dios mana munayaptinꞌa

imapïmi ñacananpä niycuśhä?

9Cay altu aꞌacunäpïtam paycunacta licaycú;

cay ulꞌucunäpïtam paycunacta licaycú.

Paycuna waquin nasyuncunapïta

japächaycuśha cawsä nunacunam.

10Jacobpa milaynincuna awishquinüña cayaptin

¿mayantá fintayta atipanman?

¿Pitan parti-partilla ayca caśhantapis yaćhaycunman?

Allin nunäpa wañuyninnu wañuyní caycuchun;

Paypa camacayninnu camacayní caycuchun” nil.

11Niptinmi Balac nin: “¿Imactatan niyämanqui? Cay ćhïnicüniquicuna mana allin capäcunanpä niycunayquipätan yaꞌa ayayächimuc. Chaychun amñatac allin capäcunanpä niycuyanquiman” nil.

12Niptinmi Balaam: “¿Manachun quiquin Tayta Dios nimäśhallanta niycuśha niyac imamá?” nin.

Israel caśhtacunaca allin caycunanpämi Balaam yapa niycun

13Niptinmi Balac nin: “Ama chaynu caychu, juc läduman acuchun. Chaypïta manam lluy Israel caśhta capäcuśhantachu licanchic; aśhwanpa waquinllantam licanchic. Chaypïta mana allin cananpä niycapamay” nil.

14Nilculmi Zofimpa allpanman Pisgap ulꞌunman puśhälun. Chayćhümi anćhish uycuna patacta lulaycula; uycuna patacćhü-cama juc malta wäcactawan juc ulu uwishtam uycula.

15Chaypïtam Balacta Balaam nin: “Cay cañaywan uycunayquip lädullanćhu cachcay, Tayta Dioswan limamü linäcama” nil.

16 Tayta Diosñatacmi Balaamman licalilcamul yaćhaycachila caynu: “Balacman cutil nishallätanümi niycunqui” nil.

17Chay cutinanpämi Moab puydïnincunawan cusca Balac śhäcuyäña, cañaywan uycunancäpa lädullanćhu. Chayćhümi Balac nin: “¿Imaninmi Tayta Dios?” nil.

18Niptinmi Balaam nin:

“Balac, śhalcuculcul uyalimay;

Ziporpa chulin, cay limaśhäta uyalimay.

19Tayta Dios manam nunallachu casquicunanpä;

manatacmi nunap chulillanchu juc-jucman muyuyächinanpä.

¿Manachun nishanta lulan imatá?

¿Limalicuśhanta manachun lulaycun imamá?

20Allin cananpä niycunäpämi niycamäla;

chayta Tayta Dios niycayämaptinꞌa,

yaꞌa manam imactapis niná canñachu.

21Jacobpa juchan manam caycunchu;

Israelpa mana allinninta manam licaycunchicchu.

Tayta Diosninmi paywan caycun;

malcanćhu paytam mandacüninpä alawäcuyalcan.

22Munti wäcap sumä callpanwannümi

Tayta Dios Egiptopïta julaycamula.

23Jacobmanꞌa rüjacunapis manam ćhanmanchu;

Israelta licacücunäpis manam imananmanpischu.

Jacobpïtawan Israelpïta caynümi nin:

‘Amwan maynu-maynücunactam Tayta Dios lulaycun’ nil.

24Cay malcaca liyunnümi śhalcuyan;

liyunnümi chapatänanpä cayan.

Licacuśhanta chapatänancama manam jamaycunꞌachu;

ćhïnïninpa yawarninta upyanancama

manam jamaycunꞌachu” nil.

25Niptinmi Balac: “Mana allin cananpä mana niyalñá, amatacꞌari allin cananpäpis niyñachu” nin.

26Niptinmi Balaam: “¿Manachun nilac Tayta Dios nimäśhallanta limanäta?” nin.

Israel caśhtacunaca allin caycunanpämi Balaam yapatac niycun

27Niptinmi Balac nin: “Ama chaynu caychu, juc läduman acuchun. Chaypïta ichapis Tayta Diospa allin canꞌa; mana allin cananpä niycapamänayquipä” nil.

28Nilculmi Balaamta Balac puśhälun Peor ulꞌup puntanman; chay ulꞌuca licalayan chunyä lädumanmi.

29Chayćhümi Balacta Balaam nin: “Cayćhu anćhish uycuna patacta lulapamay; jinaman anćhish wäcactawan anćhish ulu uwishta uycunäpä cumudaycuy” nil.

30Chaynu Balaam nishanmannümari Balac lulaycula. Uycuna patacćhü-camam juc wäcactawan ulu uwishta uyculatac.