1 Samuel 13 - Old Testament Quechua Wanca（QVW）

Saultam Samuel anyapan

1Saul juc watañam Israel caśhtacunäpä mandacünin cayäla. Ishcay wata mandayalñatacmi,

2jinantin Israel caśhtacunäpi quimsa walanga (3,000) umricunacta aclala. Ishcay walanga (2,000) umricunämi Micmaspa malcaćhu, Bet-elpa ulꞌuncunaćhu Saulwan cayalcäla; walanga (1,000) umricunäñatacmi Benjamin ayllup Gabaa malcanćhu Jonatanwan cayalcäla. Puchü umricunätañatacmi wasinta-cama liculcänanpä Saul nila.

3Canan má, Jonatanmi Gabaaćhu cä pilyä Filisteo läducunäman unꞌaypïta yaycuycul puydïnintapis wañüchila. Jinaptinmi parti Filisteo läducunaca chayta yaćhälälila. Jinantin Israel caśhtacunäćhu Saulñatacmi curnitillacta tucachila: “Israel caśhtacunaca yaćhapäcuchun” nil.

4Lluy Israel caśhtacunämi yaćhälälila Filisteo läducunäta llallïshanta. Chaymi Filisteo läducunaca israelcunäta ćhïniculcäla. Pilyäcunäñatacmi Gilgalćhu Saulwan juntunaculcäla.

5Filisteo läducunäpis juntunacälälintacmi Israel caśhtacunäwan pilyananpä. Paycunapmi cala: carritancuna quimsa walanga (3,000), süta walanga (6,000) sillädancuna; chaynütac aꞌuyupay achca-achca ćhaquillawan pilyänincunapis cacula. Paycunam Bet-avenpa inti ishpimunan lädunćhu cä Micmasman lipäcul, chayćhu jamapäcula.

6Chaynu śhacayalcämuptinmi Israel caśhtacunaca imanaytapis mana atipapäculachu. Chaymi pacacücuyalcan maćhaycunaman, ućhcucunaman, aꞌacunäman, sanjacunaman, chaqui püsucunamanpis.

7Waquin Israel caśhtacunäñatacmi Jordan mayucta chimpälälin Gad, Galaad läduman ayiculcänanpä. Saulñatacmi Gilgalćhu jinallala cayäla. Chaymi lluy nunancuna manchacuypïta chucchucuyalcäla.

8Chayćhümi Samuel nishanmannu anćhish muyun alcayalcäla.1Sam 10.8. Ñatac Samuel Gilgalman manaña ćhämuptinmi lluy nunacunaca liyta allacaycälila.

9Chaymi Saul nunacunäta nin: “Cañaywan uycunapä cäcäta, allin cawsaśhanpi uycuna cäcätapis apapämuy” nil. Chaynüpamari quiquin uycula.

10Chaynu Saul uycuyta camacalpuyaptinmi Samuel ćhämun. Chaymi Saul yalula Samuelta limaycul ćhasquiycunanpä.

11Chayćhümi Samuel nin: “¿Imactatan lulälunqui?” nil.

Niptinmi Saul nin: “Nunacunämi licuytaña allacaycälin. Ampis manatacmá nishayqui muyuncällaćhüchu licalimunqui. Filisteo läducunäñatacmi Micmasćhüña cacuyalcäla.

12Chaymi niculá: ‘Tayta Diosta yanapaycamänanpä manalä mañacuyaptïćha Filisteo läducunaca cay Gilgalman ćhaycälimul camacaycälimanꞌa’ nil. Jinalmi quiquí uywacunäta cañaywan Tayta Diosman uyculá” nil.

13Niptinmi Samuel nin: “Pasaypi mana umayu luclunümi lulälunqui. Sïchuśh Tayta Dios nishuśhayquita cäsucunquiman cala, paymi wiña-wiñaypä mandacuyniquita Israelćhu tacyaycachinman cala.

14Ñatac cananꞌa mandacuyniqui camacällam canꞌa. Am mana cäsucuśhayqui-laycum Tayta Diosꞌa śhunꞌunpänu cä nunacta ćhulaycunꞌa.Hch 13.22. Paytañamari malcanpä puydïninpa ćhulaycunꞌa” nil.

15Nilculmi Gilgalćhu caśhanpi Samuel licula Benjamin ayllup Gabaa malcaman. Saulñatacmi chayćhu cä nunacunäta fintaptin süta paćhac-yupay (600) umricuna capäcuña.

16Saulmi chulin Jonatanwan, pilyänincunawan quïdapäcula Benjamin ayllup Gabaa malcanćhu. Filisteo läducunäñatacmi Micmas malcaćhu cayalcäla.

17Chaypïmi Filisteo läducunaca quimsaman laquïsha yalälälimun. Jucninmi Shual lädućhu ca Ofra läduman liculcan.

18Jucnin laquishancäñatacmi Bet-horon läduman liculcan; juccäñatacmi Zeboim pampap culindanpa chunyä läduman liculcan.

19Chay timpu Filisteo läducunämari nipäcula: “Israel caśhtacunaca ama lulapäcuchunchu ispädactapis nïtac lansacunactapis” nil. Chaymi jinantin Israel caśhtacunäćhu jïrru tacä mana calachu.

20Chaymi Israel caśhtacunaca Filisteo läducunäman lipäcula rïjanta, asadunninta, ächanta, cüśhantapis afilachipäcunanpä.

21Chay rïjanta, asadunninta afilachishanpïmi pusä grämu illayta pägapäcula, ächactawan asadunpïñatacmi quimsa grämu illayta.

22Chay pilyanan muyun ćhämuptinñatacmi mayanpapis mana calachu ispädanpis nï cuchillunpis. Saulpawan chulin Jonatanllapamari cala.

23Ñatac parti Filisteo läducunämi Micmas malcap pasanancäman abansälälimula.