Isaias 30 - Old Testament Quechua Wanca（QVW）

Juda läduwan Egipto limanacuśhanca yanꞌal-yanꞌalpämi

1 Tayta Diosmi nin:

“¡Imanuylä cullu linli chulïcuna capäcunꞌa!

Yaꞌa nishäta unꞌayculmá ima lulaytapis lulapäcun.

Yaꞌacta mana tapucuyculmá quiquincuna lulayta ćhapapäcun.

Chaynüpamá juchanta masta-masta tawacuyalcan.

2Mana tapuycamalmari Egiptoman pasaculcan;

Faraoncäpa munayninman chalapaculmá,

payćhu pacacalcämü liculcan.

3Ñatac Faraoncäman chalapacuśhanpïtamá pinꞌayćhu camacapäcunꞌa;

Egiptoman pacacuśhanpïtamá uyshulächisha capäcunꞌa.

4Masqui Zoan malcäcama puydïnincuna ćhäluptinpis,

Hanes malcäcama willacüniquicuna ćhäluptinpis,

5chay mana bälï nasyunpä jananmá lluy-lluy uyshulächisha capäcunꞌa.

Chay nasyun manañamá sirbinꞌañachu, manañamá

yanapanꞌachu, imapäpis manañamá bälinꞌachu.

Aśhwanpamá pinꞌaynin, uyshulächïninlä canꞌapis” nil.

6Neguev lädućhu uywacunäpi caynümi willacun:

Achca-achca uywacunaca llaqui chunyäcäpam

Egiptoman uycälinanpä cuyuylla-cuyuyalcan;

aśhnucunäpis, camïllucunäpis alli ćhaniyu

sumä cäcunacta cargacälälishamá liyalcan.

Sumä bininuyü-cama culibraycuna caśhancäpamari liyuncunaca liyalcan.

Chaynu sumä ñacaycunawan mana bälï yanꞌal nasyuncäpämari apayalcan.

7Yanapänanpä Egiptop limalicuśhanca yanꞌal-yanꞌalñamá.

Chaymi chay nasyunta śhutichälá: “Manchachicuypa

apalcaćhayalpis mana bälï awquish allꞌu” nil.

8Chayurá canan cay licaśhayquita

lluypa ñawquin lumipi tablachaman lulaycuy;

caytari pitwïsha utaman isquirbiycuy.

Chayćha śhamü timpucunäćhu

lïginanpä wiña-wiñaypä caycunꞌa.

9Awari, cay malca pasaypi cullu linli-cama,

artish-camam;

Tayta Diospa yaćhachicuynincunacta

manamá uyalicuyta munapäcunchu.

10Tayta Dios licachishan nunacunätam nipäcun:

“Chaycunacta amaña licapäcuyñachu” nil.

Willacücunätañatacmi nipäcun:

“Rasuncäta amaña willapämaychu.

Aśhwanpa munaśhäcunallactaña,

cushicuypa cäcunallactaña niycälimay.

11Allin caminupïta aśhupäcuyña;

rasuncäpïta japachaculcayña.

Israelpa Chuya Tayta Diosninpïta

amañari limapayalcämaychu” nil.

12Chaymi Israelpa Chuya Tayta Diosnin nin:

“Nishäcunacta amcuna manamá uyaliycuytapis munapämanquichu.

Aśhwanpam ñacachiycunallaman,

articuycunallaman chalapaculcanqui.

13Chaymi chay mana allinniqui

altu-altu murälla quićhacacuyänu cayan;

mana tantiaśhayquićhümá unꞌaypi juclla tunïlunꞌa.

14Cutuśhpïta wacuynümá lluy paquïlunꞌa;

mana llaquipaycuśhamá sumä amshülunꞌa.

Uchuy cutuśhllapis manamá puchuycunꞌañachu

tullpapi śhanśhacta juluycunallanpäpis

ütac püsupi yacucta juluycunallanpäpis” nil.

15Israelpa Chuya Tayta Diosnin caynütam nin:

“Mana allinniquipi wanaculcal

jawcalla capäculmi salbaculcanqui.

Jawcalla chalapaculmi callpasapa capäcunqui.

Amcunañatacmi ichá mana munapäcunquichu.

16Aśhwanpalämi amcuna nipäcunqui:

‘Manam munächu; Egiptopïmi yanapäní śhamunꞌa.

Paycunam pilyuman yaycapäcunäpä

sumä päliyä cawallucunacta uycapämanꞌa’ nil.

Ñatac sumä päliyäta licapäcunqui,

ćhïnicüniquicuna janayquićhüña sumä päliyänu caśhallantamá.

Aticaćhäniquipis chaypïpis mas-mas päliyätacmá capäcunꞌa.

17Juc nunalla manchachishuptiquimá walangantin (1,000) ayipäcunqui;

picha nuna manchachishuptiquiñatacmi ichá lluy-lluy ayipäcunqui.

Chaymi ulꞌup puntanćhu bandirap caśhpin śhäcücänu,

ütac ulꞌunpalcücäpa puntanćhu ilu śhäcücänu quïdapäcunqui” nil.

Israeltam Tayta Dios llaquipaycun

18 Tayta Diosꞌa llaquipaycälishunayquipämi amcunacta alcaycälishunqui. Tayta Dios tincüninman licaycü calmi cuyacuyninta amcunaman camalaycachinanpä wañupacuyan. Maynu cushicuymari payman chalapacücunaca.

19Am, Sionćhu yaćhäcuna, Jerusalenćhu yaćhäcuna manañamá imaypis waꞌapäcunquiñachu. Llaquipayniyu Tayta Diosmá ayacuptiqui llaquipaycuśhunqui; uyalïlul pachallamá juclla yanapaycuśhunqui.

20Masqui Tayta Dios ñacayta micayächilpis, llaquicuyta upyayächilpis manañam mastá yaćhachicüniqui pacacuycunꞌañachu. Amcuna ñawiquiwanñamá payta licaycälinqui.

21Chayurá uyalipäcunqui ipayquipi caynu niyätam: “Cay allin caminunninpari lipäcuy. Ama cay lädumanpis nï wic lädumanpis pintipäcuychu” nil.

22Chaymi illaypi, ürupi cä taytachayquicunacta wicapälälinquiña. Aśhnä lataśhtanüñamá licaytapis manaña munal chapilälinqui.

23Talpuśhayquiman Tayta Diosmi tamyacta tamyachimunꞌa; ćhaclapis alli-allintamá wayuycunꞌa. Uywayquicunapis allin achca pastucunap janallanćhümá lancaläcunꞌa.

24Ärä yundayquicunapis, aśhnuyquicunapis pälawan jurquitawan waywachisha allinnintalämá micapäcunꞌa.

25Chay sumä wañuchinacuy muyun ćhämuptin, jinaman altucama türricuna cućhpäluptinmi altu ulꞌucunäpïtawan ulꞌunpalcücunäpïta achca-achca yacucuna śhamunꞌa.

26Malcan dañäducuśhancunäta jampiycunanpä, allinyaycachinanpämi Tayta Dios chay dañädunta wataycunꞌa. Jinaptinmi quilläpa acchinpis intïpa acchinnu caycunꞌa; intïpa acchinpis anćhish intip, anćhish muyunpa acchinnülämari caycunꞌapis.

Asiria lädu mućhuycachisha cananpämi nin

27¡Licapäcuy, Tayta Dios calu-calupïtamá śhacayämun!

Sumä piñäśha, camacaycunanpä

puca-puca walayä cäranwanmá śhacayämun.

Shiminpis piñacuywan juntäśhamá cacuyan;

allunpis camacaycü śhanśhanümá cacuyan.

28Jämayninpis sumä-sumä yacu lïcänümá

ćhïnicünincunap tuncurincama ćhäyan.

Paymari nasyuncunäta sirniycul camacaycülunꞌa.

Malcacunäta mana caśhanman muyuchinanpämari

shiminman jaquimacta ćhulaycülunꞌa.

29Amcunañatacmi ichá Egiptopi Libraculcäśhan Fistaćhu

tutanpa taquipäcuśhannu cushisha taquipäcunqui.

Pincullucta tucaśhtin Tayta Diospa

ulꞌunman puśhäcänumá cushiculcanqui.

Israelpa pacaycü wanca sumä munayniyu cä Tayta Diosman

lïcänümari cushiculcanqui.

30 Tayta Diosmá sumä limayninta camalachicunꞌa;

maquinta sumä ćhulaycunanpä cäcätapis ćhulaycunꞌamá.

Śhamunꞌa camacaycü nina walayäwan,

sumä lücu tamyawan, räyuwan, sumä-cama luntuwanmari.

31 Tayta Diospa limayninmi Asiria läducta camacaycülunꞌa;

mandacü bäranwanmi paycunacta wipyaypa pawälunꞌa.

32 Tayta Dios paycunacta mućhuchiyninwan

juc maquicta ćhächiptin-ćhächiptinmari,

tamburcunawan arpacunapis suynatityapäcunꞌa.

Tayta Diosmari paycunacta sumä camacaycülunꞌa.

33Una-unaypïñam Asiria nasyun mandacünintin

cañaycuśha cananpä sityu, sumä-sumä alistäśha cayan.

Chayćhu sumä jatun luli-luli,

achca-achca yamta tawäśhamari alcayan.

Chayta Tayta Dios juc pücayllawan latächiptinmari

asufrinu walälunꞌa.