Ezequiel 29 - Old Testament Quechua Wanca（QVW）

Egiptop cuntranmi willacun

1Babiloniaman prïsu puśhapämäśhanpïta ćhunca watañam pasäla. Chay watap ćhunca quillap, ćhunca ishcayniyu muyunninćhümi Tayta Dios niman:

2“Wañucülla nuna, Egiptop mandacünin Faraoncäman ñawiquita ćhulaycul paypa cuntran, jinantin Egiptop cuntran willacamuy.

3Yaꞌa Tayta Dios nishäta caynümi willacunqui:

“Egiptop mandacünin am Faraoncäpa

cuntrayquim cayá.

Am, jatun manchanaśh, mayućhu

chutaläcänu cayalmi ninqui:

‘Nilo mayuca yaꞌapamá.

Quiquïpämari licalichiculá’ nil.

4Ñatac caquichcuyquimanmi ganchuwan chalächishayqui.

Challwap utannu cä aychayquimanmi challwacunäta laꞌachimuśhä.

Mayućhu caśhayquipïtamá julüśhayqui.

Awari, amtawan challwap utannu cä aychayquiman lluy challwacunaca

laꞌanacüśhactamá julüśhayqui.

5Chay mayuyquićhu cä lluy challwantintamá

chunyäcaman amta jitaycüśhayqui.

Chay allpapïta manam pallalcuśhachu

nï pampaycuśhachu canqui.

Aśhwanpa munti uywacuna, wisculcuna

micunanpämá uycuśha canqui.

6“Jinaptinmi jinantin Egiptoćhu cäcunaca

yaꞌa Tayta Dios caśhäta yaćhapäcunꞌa.

Israel malcaca chalapacuśhuptiquipis

śhuꞌuśhpi cä garutinüllamá calanqui.

7Anman Israel iscatacuycuptin paquicunquimá;

paypa liclantapis lluymá tucsiy pawälunqui.

Anman iscatacuycuptin paquicunquimari;

paypa waśhantapis lluymá ringay pawälunqui.

8“Chaymi yaꞌa Tayta Dios nic: Am Egiptocta camacaycüśhunayquipä ispädawan śhalcachiptïmá nunayquicunacta, uywayquicunacta lluy camacaycülunꞌa.

9Anmi nilanqui: ‘Nilo mayuca yaꞌapamá; Nilo mayucta yaꞌami licalichiculá’ nil. Chaymi Egiptocta pasaypi pampaman muyüchishä; chunyämanmi licalïchishä. Chaynüpamá Tayta Dios yaꞌa caśhäta yaćhapäcunqui.

10Am Egiptop mayuyquicunap cuntranmi yaꞌa cayá. Janay lädu Migdolpïta aśhta ulay lädu Etiopiap culindanćhu cä Sevene malcäcamam chunyäman, pampaman lluy-lluy muyüchishä.

11Chayninpa uywapis, ima nunapis manañamá pasapäcunꞌañachu. Tawa ćhunca (40) watamá pasaypi pulumäśha quïdanꞌa.

12Jinantin allpäćhu am Egipto nasyunmi pasaypi pulumäśhannin canqui. Malcayquicuna tawa ćhunca (40) watam pasaypi camacaycüśha pulumanꞌa. Jinantin nasyuncunäman, malcacunämanmi chiꞌilächishayqui.

13“Yaꞌa Tayta Diosmi ní: Tawa ćhunca (40) wata camacäluptinmi jinantin chiꞌisha cä nasyuncunäpi Egipto läducunäta juntumuśhä.

14Prïsu apaśha cä Egipto läducunätamari Patros läduman cutichimuśhä. Chay näsishan malcanmanmari paycunacta cutichimuśhä. Chayćhümi licaytapis mana munaśha malcallaña capäcunꞌa.

15Juc nasyuncunapïtapis mana ancha munayniyüñamá canꞌa. Yaꞌa quiquí mana cäman muyüchiptïmá juc nasyuncunactapis maquinćhu uywayta manaña atipapäcunꞌañachu.

16Israel lädu manañamá Egiptoman chalapacunꞌañachu. Aśhwanpa yalpachinꞌa Egipto yanapänanpä chalapaculcäśhanca mana allin caśhantamá. Chaynüpamari Tayta Dios yaꞌa caśhäta yaćhapäcunꞌa” nil.

Nabucodonosormi tincüninman ćhasquiycun

17Chay ishcay ćhunca anćhish watap, allaycuynin quillap wamä muyunninćhümi Tayta Dios niman:

18“Wañucülla nuna, Tiro malcacta sumä camacaycünanpämi Babiloniap mandacünin Nabucodonosor pilyänincunacta caćhälun. Jinaptinmi paycuna siplay-siplay lutüśha umayu, waśhancunapis matay-matayña lulay-lulay capäcula. Ñatac mandacücäwan pilyänincuna manamá ima allinllactapis juluculcälachu.

19Chaymi yaꞌa Tayta Dios ní: Babiloniap mandacünin Nabucodonosorpa maquinmanmá Egiptocta ćhulaycuśhä. Chaymi ima cänincunactapis apaculcanꞌa, waycälälinꞌa. Chaycunañamá pilyänincunap pägun caycunꞌa.

20Mandacü Nabucodonosor Egiptop cuntran śhalcuśhanwan yaꞌap allinnïpämá lulaycula. Chaymi maquinman Egiptocta ćhulaycuśhä. Yaꞌa Tayta Diosmari niyá.

21“Chay muyuncunaćhümá Israel malcap callpanta chillquichimuśhä. Paycunap ćhawpinćhümi am Ezequiel limanqui. Chaynüpam Tayta Dios yaꞌa caśhäta yaćhapäcunꞌa” nil.