2 Reyes 6 - Old Testament Quechua Wanca（QVW）

Mayuman palpüśha ächactam Eliseo wampuchin

1Juc muyunćhümi Eliseocta Tayta Diospa willacünincuna nipäcun: “Licaśhayquinüpis, cayćhu quićhqui-quićhquim cayanchic.

2Aśhwanpa Jordan mayu läduman lipäcuśhä. Chayćhu ilucunacta cuchuycul chayćhu canapä lulapäcamuśhä” nil.

Nipäcuptinmi Eliseo: “Lipäcuyꞌari” nin.

3Jucnin willacücäñatacmi nin: “Cay nunallayquicunacta liwshipällämayꞌari” nil.

Niptinmi Eliseo: “Allin, lishunꞌari” nin.

4Chaynu liculcalmi Jordanman ćhaycälil ilucunacta cuchupäcula.

5Chayćhu ilucta cuchuyaptinmi jucninpa ächan mayüman palpülun. Jinaptinmi apalcaćhacuyan: “¡Taytallay, taytay! Chay ächaca mañacuśhallam cala” nil.

6Niptinmi Tayta Diospa nunan Eliseo: “¿Maymanmi palpülun?” nin.

Chaynu mayman palpuśhantapis licaycachiptinmi Eliseo juc caśhpicta cuchulcul chayman jitalpuycülun. Jinaptinmi ächaca wampümun.

7Chaymi Eliseo: “Canan juluy” nin.

Niptinmi chacchaycul ächanta julämun.

Sirio lädu pilyäcunätam Tayta Dios aplächin

8Canan má, Israel läducunäwanmi Sirio lädu mandacüninca pilyućhu cayalcäla. Chaymi Sirio läducunaca pilyänincunap mandänincunawan juntunaculcal limanaculcäla wicćhu cayćhu ćhulanaculcänanpä.

9Ñatac Israel lädup mandacüninmanmi Tayta Diospa willacünin nichila: “Chayninpa ama pasapäcuychu, Sirio läducunämi chay läduman liyalcan” nil.

10Chaymi chay willacü nishancäta licamunanpä Israel lädup mandacünin caćhala. Chaynu Eliseo achca cuti nipaptinmari salbaculcä cala.

11Jinaptinmi Sirio läducunap mandacünin sumä piñacülul pilyänincunap puydïnincunacta ayalcachimul nin: “¿Mayanniquitan ima limanacuśhanchictapis Israel lädup mandacüninman willapacuyalcanqui?” nil.

12Niptinmi jucnin nin: “Mandacü taytallay, manam mayanpis willapaculcächu. Aśhwanpa Israel lädućhu cä willacü Eliseom Israel lädup mandacüninman willaycuyan aśhta cuartuyqui lulićhu lluy limaśhayquicunällactapis” nil.

13Niptinmi Sirio läducunap mandacünin nin: “Má, chalächimunäpä mayćhu caśhantapis licapämuy” nil.

Niptinmi jucnin: “Dotan malcaćhümi pay cayan” nin.

14Chaymi chayman achca pilyänincunacta cawalluncunactawan, carritancunactawan caćhäla. Jinaptinmi paycuna tutap ćhaycälil malcacta lluy cunćhälälila.

15Ayllïluptinñatacmi Tayta Diospa willacünin nunap yanapänin nuna yalunanpä malcan cawallucunawanpis carritacunawanpis cunćhäśhacta licälun. Chaymi Eliseocta nicuyan: “Taytallay-taytay, ¿imanaśhuntan?” nil.

16Niptinmi Eliseo: “Ama manchacuychu. Paycunapïtapis mas-masmi yaꞌanchicwan cäca cayan” nin.

17Nilculmi Eliseo mañacula: “Tayta Diosllay, ñawinta quićhaycullay licananpä” nil. Chaymi yanapänin nunap ñawinta Tayta Dios quićhaycuptin licälun Eliseop muyülïnin ulꞌućhu nisyu-nisyu sillädacunawan walayä carritacuna caśhanta.

18Sirio läducunaca chalananpä jiꞌacaycayämuptinmi Eliseo mañacula: “Tayta Diosllay, cay nunacunäta aplächillay” nil.

Chay mañacuśhanmannümi lluy aplächila.

19Jinäluptinmi paycunacta Eliseo nin: “Cayninpachu manam caminuca. Manamá lipäcuśhayqui malcamanchu liyalcanqui. Ashishayqui nunaman yaꞌa puśhapäcuśhayqui; acuchun” nil.

Chaynüpamari Samaria malcaman puśhälun.

20Samariaman ćhälälilñatacmi Eliseo nin: “Tayta Diosllay, licapäcunanpä ñawincunacta quićhaycuy” nil. Chaynu Tayta Dios quićhaycuptinmi Samaria malcaćhu caśhanta tantiacälälin.

21Ñatac Israel lädup mandacünin paycunacta licälulmi Eliseocta nin: “Taytallay, ¿caycunacta wañüchishächun?” nil.

22Niptinmi Eliseo: “Ama wañuchiychu. ¿¡Prïsu chalaśhayquita ispädayquiwanchun, flïchayquiwanchun ampá am wañuchinqui imatá!? Aśhwanpa yacuctawan micuyta uycuy. Chaynu micucaycälilꞌari mandacüninman cuticulcächun” nin.

23Niptinmi mandacüca jatun cumbiducta lulaycachiptin upyacaycälila, micacaycälila. Chaypïtam mandacüninman cutichimula. Chaypunpïmari Sirio läducunaca Israel läducunäta pilyucta manaña ashipälañachu.

Samaria malcaćhümi micuy wanay

24Chaypi unaytam Sirio lädup mandacünin Ben-adad lluy pilyänincunacta juntülun. Jinalculmi Samaria malcaman lilcälil cunćhalapäcula.

25Chaynu una-unayña cunćhalapäcuptinmi Samariaćhu micuy wana cacula. Jinaptinmi aśhnup umanta pusä ćhunca (80) illayćhu lanticulcäla; ulpaypa ishpaynintañatac picha illayćhu lanticulcäla.

26Juc muyunćhu pila jananpa Israel lädup mandacünin puliyaptinmi juc walmi apalcaćhaypa nicuyan: “¡Mandacü taytallay, salbaycallämay!” nil.

27Niptinmi mandacüca nin: “Tayta Dios mana salbaśhuptiquiꞌa ¿imanuypatá yaꞌa yanapaycucman? ¿Maypïtamá cayćhu trïguctawan bïnucta uśhayqui?

28¿Imatan pasaśhunqui?” nil.

Niptinmi walmica nin: “Cay walmim niman: ‘Canan wawiquita micüśhun, wälamanñatac yaꞌapa wawïta’ nil.

29Nimaptinmi wawïta yanulcul micälälilá.Deut 28.57. Chay walantinñatacmi payta nilá: ‘Wawiquita apamuy micunapä’ nil. Ñatac payꞌa wawinta pacälunmi” nil.

30Chaynu walmi nishanta mandacüca uyalïlulmi llaquicuypi müdananta laćhyälun. Chaynu pila janäninpä liyaptinmi nunacunaca licapäcula llaquicuypi shicaśh müdanawan lulïpacüśha caśhanta.

31Chayćhümi mandacüca nin: “Safatpa chulin Eliseop umanta canan-pacha mana cutuchiptí quiquin Tayta Dios sumä-sumäta mućhuchimächun” nil.

32Eliseoñatacmi wasinćhu malcap yaśhancunawan täcuyalcäla. Mandacücämi payman juc nunacta caćhala. Ñatac manaläpis chay caćhaśhanca ćhaptinmi yaśhacunäta Eliseo nin: “Wañuchicücäpa nunan umäta cutuchimänanpä caćhamuśhanta cananmi licapäcunqui. Chaycuna ćhämuptin puncucta wićhälälinqui mana yaycamunanpämi. Chaycunap ipantamari patrunnin śhayämun” nil.

33Chaynu Eliseo limayällaptinlämi willacüca ćhaycamul nin: “Tayta Diospïmi cay mana allinca śhayämun. Chayurá ¿imactañamá paypïta alcaycüman?” nil.