Proverbios 6 - Old Testament Quechua Wanca（QVW）

Tantiaywan limaliculcänanpämi

1Iju, lisinacuśhayqui nunap mänunpi śhaycuyculꞌa

ütac jucpa pudirnin unayquipä limaliculꞌa,

2limalicuyniquiwanmá ćhänachicülunqui,

quiquillayquimá shimiquiwan cunca cuchuyniquita ashicülunqui.

3Iju, chaynu jucpa maquinman palpüśha cayalꞌa cayta lulay:

Payman uyshuycul allichaycunayquipä mañacamuy.

4Amari ñawiquitapis wićhaycuychu;

amari imchiyllapis imchiycuychu.

5Wañuchïninpi luychu ayishannu ayicuy;

trampapi ulpay libracuśhannu libracuy.

Illacuna licaćhaculcänanpämi

6Illa nuna, chiquishcunäta licaycuy;

ima lulaśhancunactapis licaycul tantiacuyꞌari.

7Paycunap manamá puydïnin,

caminaycünin, jicutänin canchu.

8Ñatac cusicha timpućhu micunancunacta juntuculcanmá;

lutuna timpućhu micunancunacta pilwaculcanmá.

9Am illaca, ¿imaycamatá jitalayanqui?

¿Imayñatá puñuśhayquipi śhalcunqui?

10Jitaläcuśhayquicamam, anćhaläcuśhayquicamam,

maquiquita curuśhchacuycul iscataläcuśhayquicamam,

11pulicü mataynu wacchayayca janayquićhu licalïlunꞌa,

suwanümá wacchayayca chaläśhunqui.

12Mana allin nunaca, juyu nunaca

articunallacta limaśhtinmá pulipäcun.

13Ñawinwanpis imchipaycunmá, ćhaquinpis sïñaśhchaycunmá,

dïdunwanpis tucsipaycunmá.

14Mana allin nunäpa śhunꞌunćhu mana allincällamá cayan;

imaypis mana allincällactamá pinsayan, pilyucunallacta ashishtinmá puliyan.

15Chaymi camacaycuyca unꞌaypi ćhämunꞌa;

manaña śhalcütamá unꞌaypi camacaycülunꞌa.

Tayta Diospa millachicuśhancuna

16Süta mana allincunactam Tayta Dios licaytapis nï munanchu;

anćhishcätañatacmi sumä millachicun:

17Quiquinta allintucüpa licacücäta, casquillacta limäcäta,

mana juchayu allin nunacta wañuchïcäta,

18mana allin lulaycunallaman tantiapayä śhunꞌuyücäta,

mana allin lulayllaman mana-mana lïcäta,

19quijaćhu licäpa śhaycul articuyninwan śhaycücunäta,

ayllupulacta pilyuman ćhuläcätapis.

Mansibacuycäpa wayuynin

20Iju, taytayqui limapäśhuśhayquicunäta cäsucuy;

mamayqui yaćhachishuśhayquicunäta ama unꞌaychu.

21Śhunꞌuyquiman ćhulaycuy;

cullartanu cuncayquiman wallacuy.

22Chaymi puliyniquićhu caminaycuśhunqui;

puñuptiquipis licaycuśhunqui;

lichcapacuptiquipis limapaycuśhunqui.

23Yaćhachicuycunaca michïranümá, limapäcuycunaca acchinümá;

anyapäcuycäwan caminaycuycä

allin caminuman puśhaycamäninchicmá.

24Chaymi mana allin walmicunäpïta juluycuśhunqui,

maypis aticuna mishqui-mishqui limayniyu anla walmicunäpïta licaycuśhunqui.

25Tuquish cayninwan ama apachicuyaychu;

licacuyninwan śhunꞌuyquita ama suwachicuyaychu.

26Watica walmica lätu micuyllapämi umricta atipäcun;

mansibädu walmïñatacmi ichá umrip cawsayninta ashipäcun.

27¿Mayantá bulsicunćhu śhanśhacta

apanman müdananta mana lupachicullal?

28¿Mayanmá śhanśhap jananpa pulinman

ćhaquinta mana lupachicullal?

29Chaynümá casädu walmiwan cäcäta pasanꞌa;

yataycüca manamá mana mućhuchisha canmanchu.

30Micunanpä imapis mana captin

imactapis chalä nunaca ichapis limalicunanpä canman.

31Ñatac suwacuyäta talichicülulmi ichá anćhish cuti masniyütala pägaycunꞌa;

wasinćhu lluy imapis cänintamari uycunꞌa.

32Jucpa walminwan mansibacücá pasaypi mana fisyuyümi;

chaynu luläcá quiquillanmá pampaman muyuchicun.

33Mansibacuśhanpïtamá maꞌachicun, pinꞌayman ćhulachicun;

chay pinꞌaynin manamá imaypis chincanꞌachu.

34Chay wayapanpa śhunꞌun śhanśha-yupaymá sïlacuypi walayanꞌa;

cutichicuyta munal manamá pampachaycunꞌachu.

35Chaynu lulaśhanpi manamá imactapis awniycunꞌachu;

maychicactaña uycuptinpis śhunꞌun manamá pampachaycunꞌachu.