Jonas 4 - Old Testament Quechua Wanca（QVW）

Jonasmi alli-allicta piñacülun

1Jonasñatacmi ichá Tayta Dios manalcuśhanta mana munal alli-allicta piñacülun.

2Jinalmi Tayta Diosta mañacücuyan: “Tayta Dios, caynu jinanayquita yaćhalmi malcalläćhülä cayal cayman śhamuypi jatapälac. Amꞌa cuyacü, llaquipayniyu, llampu śhunꞌuyu, ñacayta piñacü calmi ‘allin mućhuycachishä’ niyäśhayquipïpis juchancunapi wanaculcaptinꞌa llaquipaycunqui. Chaynu caśhayquita yaćhalmari Tarsis malcämanlä licuytapis munalá.Exo 34.6; Jer 3.12; 31.20; 32.18; Joel 2.13.

3Chayurá Tayta Diosllay, caycunacta licayänäpïtá aśhwanpañari chincalpächimay. Caynu cawsayäśhänuꞌa mas allin canman wañucuptïmi” nil.

4Niptinmi Tayta Dios: “Jonas, ¿caynu pampachaycuśhäpi, imapïtá piñacunayqui?” nin.

5Chaypïtam chay Ninive malcäpïta inti yalamunan läduman Jonas licula. Chayćhu ramädachacuyculmi: “Má, imayshi cay malcäta Tayta Dios chincächinꞌa” nil licapayan.

6Chayćhu lupay ancha-anchap cacuyaptinmi calabäsanu cä lantacta Tayta Dios wiñalcachimul ramädap jananman lancaycachipula llantunanpä. Chaynu llantuycuptinmi Jonasꞌa cushisha-cushisha cacuyan.

7Chay walantin wälapäñatacmi ichá lantäta utushwan Tayta Dios caćhüchiptin lupaycäwan lluy chaquïlun.

8Jinaman Tayta Diosꞌa acachä waywacunactapis inti yalamunan lädupi waywachicayämun, intictapis umanman-cama sumä ćhächicayämun. Jinaptinmi Jonas ñaćhaña wañütucücuyanpis: “¡Imañaćh cay bïda pasacuy cacunpis! ¡Mas allin canman wañucuptïćha!” nil.

9Chaymi Tayta Dios nin: “Jonas, ¿calabäsanu cä lanta chaquishanpi, imapïtá piñacunayqui?” nil.

Niptinmi Jonas nin: “Nila ¿manachun yaꞌa piñacüman, allin llantuyämäśhanpïta juclla chincäpamaptin imamá? Isisí, amaña cay rabyacuycätá, wañülümanñapis” nil.

10Niptinmi Tayta Dios: “Chay lantapi anchap llaquicunayquipä ¿amchun talpuculanqui imatá? ¿Amchun wiñachiculanqui imamá? Quiquillanmi juc wälapä wiñämula. Chaynütacmi juc wälapä chincaculapis. Chaynu mana talpucuśhayqui nï wiñachicuśhayqui cayaptinpis llantuśhunayqui captinmá llaquicunqui.

11¿Chay llaquicuśhayquinu manachun cay Ninive malcaćhu, paćhac ishcay ćhunca walanga (120,000) maslä cä nunacunäpïta yaꞌapis llaquicú imatá? ¿Mayannin allï lädu maquin, ichü lädu maquin caśhantapis tantiayalcanchun imamá? ¿Chaynu achca nunacunäpi, uywacunäpi manachun llaquicüman imatá?” nin.