Ezequiel 36 - Old Testament Quechua Wanca（QVW）

Israel lädu caśhan allin cananpämi nin

1“Am wañucülla nuna, Israelpa ulꞌuncunacta willacamuy caynu nil: ‘Tayta Dios nishanta am Israelpa ulꞌuncuna uyalipäcuy.

2Tayta Diosmi nin: Ampïmi ćhïnicüniquicuna nipäcun: “Cay unay ulꞌucunaca yaꞌanchicpañamá canan cacuyan” nil.

3Chaymi yaꞌa Tayta Dios nishäta willaycamunqui cay nil: Amcuna camacaycüśhamá capäculanqui; juc nasyuncunamá wicpi caypi cunćhaycälil duyñuchacaycälishulanqui. Lluy nunacunap burlaculcänan, asipäculcänanmanmi licalïlälilanqui.

4Chayurá Israelpa ulꞌuncuna, Tayta Dios nishanta uyalipäcuy. Am ulꞌucuna, ulꞌunyalcücuna, mayucuna, pampacuna, pulumächisha cäcuna, chunyä malcacuna, muyülïninćhu asipä nasyuncuna uyaliculcay yaꞌa nishäta.

5Yaꞌa Tayta Diosmari caynu niyá: Juc nasyuncunäpa, jinantin Edom läducunäpämi sïlacuyní sumä walayan. Paycunamari sumä jamuyaywan, cushicuywanlä allpäta aypunacaycälil duyñuchacälälin.

6Chaymi Israelpa ulꞌuncunaman, ulꞌunyalcünincunaman, mayuncunaman, pampancunaman niycamunqui. Yaꞌa Tayta Diosmi ní: juc nasyuncunaca pinꞌayman ćhulaycul asipapäcuśhuśhayquipïmá yaꞌa sumä piñäśha cayá.

7Chaymi yaꞌa Tayta Dios maquïta pallalcul limalicú, amcunap muyülïniquićhu nasyuncunaca quiquinpa cunca cuchuyninta apaycälinanpä.

8“ ‘Am Israelpa ulꞌuncunañatacmi ichá sumä pallaysapa capäcunqui. Israel malcá micapäcunanpämá amcuna allin wayuyniyü-cama capäcunqui. Paycuna cutipämunanñamari cacuyan.

9Amcunaćhu śhunꞌú cayaptinmi ñawilläćhu caycälichishayqui. Am ulꞌucunaca caśhanmi talpuśha, ulyaśha capäcunqui.

10Jinantin Israel nunacunäwanmi lancächishayqui. Malcancuna caśhanmi śhalcachisha capäcunꞌa. Pampaman muyuchisha cäcunäpis caśhantacmá śhalcachisha capäcunꞌa.

11Am ulꞌucunäćhümi nunacunactapis, uywacunactapis milächishä. Paycunamari achca-achcaman milapäcunꞌa. Punta cawsapäcuśhanmannümari cawsaycachishä. Puntapïpis mas allintalämá licaycuśhäpis. Chayćhümi yaꞌa Tayta Dios caśhäta amcuna yaćhapäcunqui.

12Israel ulꞌucuna, Israel nunäcunactamá amćhu pulichishä. Paycunañamá, paypäña capäcunayquipä amta duyñuchacaycälishunqui. Chulincunactapis manañamá imaypis wañuchinquiñachu.

13“ ‘Yaꞌa Tayta Diosmi ní: Ampïtam juccuna nipäcun: “Cay ulꞌuca nunacunäta micü ulꞌumá; malcactapis mana chuliyütaña caćhaycü ulꞌumá” nil.

14Cananpïtá manañamá nunacunäta micunquiñachu, nï malcactapis mana chuliyüta caćhaycunquiñachu. Yaꞌa Tayta Diosmari niyá.

15Manañamá uyalichishayquiñachu juc nasyuncunap palacuyninta, juc malcacunap jamuyäcuynintapis. Manañamá malcayquip chulincunactapis wañuchipäcunquiñachu. Yaꞌa Tayta Diosmari niyá’ ” nil.

16Chaypïta Tayta Diosmi niman:

17“Wañucülla nuna, Israel läducunaca mana allin cawsayninwan, mana allin lulayninwan quiquinpa allpantamá anla millachicuyman muyülächin. Chay lulaynincuna pasaypi millachicuy, walmip ishyacuyninnümá yaꞌapä cacula.

18Nunacunäta wañuchishanwan, taytachacunacta alawaśhanwanmá malcacta anlaman muyülächila. Jinaptinmi sumä piñacuynïta paycunaman ćhaycachilá.

19Chaymari jinantin nasyuncunäman, lluy malcacunäman chiꞌichilá. Chay lulaynincunaman, cawsaynincunaman tincütamari cärayculá.

20Ñatac chay ćhäpäcuśhan nasyuncunäćhu pinꞌaymanmi ćhulapämäla. Chay nunacunämari nipäcula: ‘Caycuna Tayta Diospa nunancuna cayalcalpis ¿imapïmá nasyunninpi alapacüśha capäcula?’ nil.

21Chay nasyunman ćhäśhancunaćhu Israel läducunaca millachicuyman ćhulapämäśhancämari nana-nanaypa yaꞌaman ćhaycamäla.

22“Chaymi yaꞌa Tayta Dios nishäta Israel malcacta caynu niycunqui: Israel malca, amcuna-laycuchu manamá cay lulaśhäta lulaycuśhä, sinuꞌa chuya caśhä-laycumá. Amcunamari may nasyunman ćhäpäcuśhayquićhüpis chuya caynïta pinꞌayman ćhulapämälanqui.

23Chay nasyuncunaćhu chuya caynïta pinꞌayman ćhulapämaptiquipis chuya caśhäta licachicuśhämá. Amcunap ñawpäniquićhu chuya caśhäta licachicuptïmi nasyuncunaca yaćhapäcunꞌa yaꞌa Tayta Dios caśhäta. Yaꞌa Tayta Diosmari niyá.

24“Jinaptinmi lluy nasyuncunäpïta, malcacunäpïta julaycamul allpayquiman caśhan cutiycachishayqui.

25Chuya yacuwan paꞌaycäliptïmá lluy anlayquicunapi, taytachayquicunawan juchaculcäśhayquipi chuyanchaycuśha caycälinqui.

26Jinalculmi muśhü śhunꞌuctawan muśhü ispiritucta ćhulaycälishayqui. Lumiyäśha śhunꞌuyquita wicapalculmá llampu śhunꞌuyümanña muyuycälichishayqui.

27Amcunamanmi ispiritüta ćhulaycuśhä, camachicuynïta cäsuculcänayquipä, yaćhachicuyní nishanmannu lulaycälinayquipä.

28Awquilluyquicunaman uycuśhá allpaćhümi yaćhapäcunqui. Amcunam malcá capäcunqui; yaꞌañatacmi Tayta Diosniqui caśhä.

29Chay anla millachicuy lulayniquipïmá libraycälishayqui. Chaynütac trïguyquicunacta allinta wayuycachiptïmá micuypi manaña wañupäcunquiñachu.

30Lantayquicunacta allinta wayuycachiptí, talpuyniquicunacta allinta ishpiycachiptïmari juc lädu nasyuncunaca micuypi manaña pinꞌayman ćhulapäcuśhunquiñachu.

31Chayćhu amcuna mana allin lulayniquicunacta, cawsayniquicunacta, millachicuy, anla juchayquicunapïpis yalpaćhaculmá millachiculcanqui.

32Awari, amcuna mana allin lulayniquicunapïta pinꞌacüśhamá uyshulapäcunayqui. Ñatac tuquicta yaćhaycäliy, caycunacta lulayá manam amcuna-laycuchu. Yaꞌa Tayta Diosmari niyá.

33“Chaynütacmi yaꞌa Tayta Dios ní: Chay mana allin lulayniquicunapïta chuyanchaycuptïmi cay malcacunäćhu caśhan yaćhapäcunqui; pampaman muyüchisha cäcunäpis caśhan śhalcachisham canꞌa.

34Pulumäśha allpacunäpis caśhan talpuśhañamá canꞌa. Chayninpa pasäcunäpäpis manañamá pasaypi chunyäñachu caycunꞌa.

35Chayćhümari nipäcunꞌa: ‘Cay allpa unaypi pampaman muyüchisha caśhanca, cananꞌa Eden wirtanülämá cacuyan. Cay camacaycüśha, pampaman muyüchisha malcaca, cananꞌa sumä murälläśha, jinaman nunacunap yaćhaśhan malcacunalämá cacuyan’ nil.

36Chaynüpam muyülïninćhu malcacunaca yaćhapäcunꞌa pampaman muyüchisha cäcunäta yaꞌa śhalcachishäta. Chaynütacmi camacaycüśha caśhancäta talpuycuśhätapis yaćhapäcunꞌa. Chaynu yaꞌa Tayta Dios nishänüllamari lulaycuśha canꞌa.

37“Yaꞌa Tayta Diosmi ní: Israel malcaca achcaman milapäcunanpä yaꞌacta mañacalcämanmanlämi. Chayćha uwish milapäcuśhanmannu paycunacta milaycachishä.

38Fista timpućhu Jerusalenman apanapä cä uwishcunänümari caycälinꞌa. Pulumäśha malcacunaca nunap juntäśhañamari timpuyanꞌa. Chaynüpamari yaꞌa Tayta Dios caśhäta yaćhapäcunꞌa” nil.