Deuteronomio 20 - Old Testament Quechua Wanca（QVW）

Pilyä yalul imanuy yalapäcunanpämi nin

1“Ñatac ćhïnicüniquiwan pilyä yaluyalcal paycunap cawalluncuna, gïrrapä carritancuna, cachacuncuna achca-achca cayäta licälälil ama manchaculcaychu. Egiptopi julamuśhüniqui Tayta Diosniquim amcunawan cayanꞌa.

2Pilyanayquipä cacuyaptin sasirdütïmi puntaman pasaycul lluy pilyäcunäta,

3caynu ninꞌa: ‘Israel caśhtacuna uyalipäcuy. Cananmi ćhïnicüniquicunawan pilyapämunqui. Amari jucmanyapäcuychu, nï manchaculcaypischu. Amatac chucchupäcuychu, nï catcatapäcuypischu.

4Tayta Diosniquimari amcunawan cayan. Chaynu amcunapïta pay pilyaptinmi ćhïnicüniquicunacta llallipäcunqui’ nil.

5“Pilyäcunäpa puydïnincunam ninꞌa: ‘Mayanpis muśhü wasicta ishpïchil chayćhu manalä yaćhayta allayculꞌa canan-pacha cutipäcuy; yanꞌalmi cay pilyućhu wañüläliptiqui muśhü wasiquićhu juc nuna yaćhacunman.

6Mayanpis übacta lantälul wayuyninta manalä cusichalꞌa canan-pacha wasiquita cutipäcuy. Yanꞌalmi cay pilyućhu wañüläliptiqui talpuyniquita juc nuna duyñuchacülunman.

7Chaynütac mayanpis casaracunanpäña limanacüśha cayal manalä casaraculꞌa canan-pacha wasiquita cutipäcuy. Yanꞌalmi cay pilyućhu wañüluptiqui limay-masiquiwan juc nuna casaracülunman’ nil.

8“Chaynütacmi pilyäcunäpa puydïnin ninꞌa: ‘Mayanpis ćhinaśhyayal chucchuyäcá wasinta cuticuchun; yanꞌalmi juccunätapis ćhinaśhyächinman’ nil.

9Chaynu puydïcunaca limayta camacälulmi grüpu-grüpu cachacuncunap mandäninta ćhulanꞌa.

10“Ñatac may malcamanpis pilyanayquipä aśhuyculꞌa puntacta jawcalla allin yaycapäcunayquipä niycuy.

11Chay nishayquita awnil yaycachipäcuśhuptiquiꞌa malcantin nunacunämi maquiquićhüña capäcul sirbïniquiña capäcunꞌa.

12Ñatac jawcalla yaycapäcunayquipä mana awnipäcuśhuptiquiꞌa malcap muyülïninman ćhulacaycälilćha pilyapäcunqui.

13Chayćhüćha Tayta Diosniqui maquiquiman ćhulaycamuptin lluy umricunäta ispädawan camacaycälälinqui.

14Chay malcaćhu quïdä walmicunaca, walaśh wamla wawincuna, uywacunaca, lluy imapis cäcunaca ampäñamari capäcunꞌa. Chay ćhïnicüniquicunap cänincunacta Tayta Diosniqui maquiquiman ćhulaycamuśhancuna amcunapäñamá canꞌa.

15Chaynümi amcunapä mana cä malcacunäwan jinaman calućhu cäcunäwanpis lulaycälinqui.

16Ñatac Tayta Diosniqui tücäniquipä uycuśhunayqui limalicuśhan malcacunäćhuꞌa amam imallactapis cawsayniyüta caćhaycälinquichu.

17Aśhwanpam Tayta Diosniqui nishuśhayquimannu camacaycälälinqui Het, Amhor, Canaan, Ferez, Hev, Jebus läducunätapis.

18Caynu lulapäcunqui paycuna taytachanta alawayninwan anla lulaynincunacta lulachipäcuśhuśhayquiwan Tayta Diosniquip cuntran mana lulapäcunayquipämi.

19“Sïchuśh pilyanayquipä juc malcacta achca timpuña cunćhalayalꞌa lantancunacta ächawan ama cućhpachiychu. Chaycunap wayuynintamari micapäcunqui. Amari cućhpachipäcuychu, paycuna manamá nunachu difindiculcänanpä; sinuꞌa wiñä lantacunallam.

20Mana wayuyniyu cä lantacunätañatacmi ichá cuchülälinqui. Chaywanmi śhaycapacü malcacta llallinayquipä imacunactapis lulapäcunqui.