2 Cronicas 13 - Old Testament Quechua Wanca（QVW）

Juda lädućhu Abiasmi mandacun 1Rey 15.1-7

1Chay Abias Juda lädućhu mandacuyta allaycuyaptinmi Jeroboam ćhunca pusäniyu (16) wataña Israelćhu mandacuyäla.

2Abiasmari Jerusalenćhu quimsa wata mandacula. Mamanñatacmi Gabaa lädu Urielpa chulin Micaias cala.

Cay Jeroboamwan Abiasmi pilyayta allacaycälila.

3Chaymi Abias tawa paćhac walanga (400,000) alli-cama aclaśhan pilyänincunawan lila. Jeroboamñatacmi pusä paćhac walanga (800,000) alli-cama pilyänincunawan lipäcula.

4Chaymi Efrainpa ulꞌuncunaćhu cä Zemaraim ulꞌuman mandacü Abias ishpilcul ayaycaćhacuyan: “¡Jeroboam, jinantin israelcuna uyalipämay!

5¿Manachun yaćhapäcunqui Israelpa Tayta Diosnin, Davidman lluy milaynincunaman mandacü cananpä, wiñaypäña limalicuśhanta imatá?

6Chaynu cayaptinpis Nabatpa chulin Jeroboammi, Davidpa chulin Salomonpa nunan cayal cuntran śhalcula.

7Mana allin illa nunacunawan jucllachanacuyculmari Salomonpa chulin Roboampa cuntran śhalcapäculanqui. Payñatacmi mana tantiayniyu walaśhllala cayal imanaytapis mana atipälachu.

8“Ñatac israelćhuꞌa Tayta Diosmari gubirnayan Davidpa milaynincunawan. ¿Chaychun amcuna alli-alli capäcuśhayquiwan, jinaman Jeroboam ürupi lulachishan wäcanu taytachayquicunallawan llallïlälinquiman imatá?

9Chaynütacmi Tayta Diospa sasirdütin Aaronpa milaynincunacta, levitacunäta alapacälälimulanqui. Jinalcul juc malcacunänümari sasirdütiquicunacta mayantapis ćhulälälinqui. Mayanpis juc malta wäcacta anćhish ulu uwishta apamücunätá, taytachayquip sasirdütinpämari ćhulapäculanqui.

10“Yaꞌacunapñatacmi ichá Tayta Dioslla Taytá captin, mana caćhaycapäcüchu. Tayta Diospa sasirdütincuna, Aaronpa milaynincunamari cayalcan; yanapänincunapis levitacunällamá cayalcan.

11Paycunam wälanpa-tardinpa Tayta Diosman uycunancäta uycälin, insinsiuctapis lupaycälichin. Jinaman chuya ürunllanllanpi cä mïsaman japächaśhan tantactapis ćhulaycälin, chaynütac chuya ürupi cä jatun michïrućhu latachicuncunamanpis tardin-tardinmi aspilpuyaptin walaycälichin. Chaynümari Tayta Dios yaćhachishanta yaꞌacuna lulaycälí. Amcunañatacmi ichá caćhaycälälinqui.

12Chayurá yaꞌacunap puydïniꞌa quiquin Tayta Diosmi. Sasirdütincunapis amcunawan pilyanapä curnitillanta tucapäcunanpä listu-listumari cayalcan. Chayurá israelcuna, Tayta Dioswan ama pilyapäcuychu; manamá llalliyta atipapäcunquichu” nil.

13Chaynu nishancama Jeroboamñatacmi pilyänincunacta Juda ipanpa yaycamunanpä nila. Chaymi Judaman ipanpa puntanpa yaycunanña cacuyalcäla.

14Chayćhu Juda nunacunaca ipanta licalcapäcunanpämi israelcunaca ipan lädupapis jiꞌacaycayalcämuñäña. Chaymi Tayta Diosta mañacücuyalcan, sasirdüticunäpis curnitillancunacta tucayta allacaycälin.

15Chayćhu Judacunaca pilyananpäña sumä apalïläliptinmi Tayta Dios llallïlun Jeroboamtawan lluy israelcunäta. Chaynu Tayta Diospa yanapayninwanmari Judawan Abias llallïla.

16Jinaptin israelcunaca ayiyta allacaycäliptinmi Judacunäpa maquinman Tayta Dios ćhulaycüla.

17Chaymi Abias pilyänincunawan camacaycüla picha paćhac walanga (500,000) allinnin aclaśhan pilyä israelcunäta.

18Chaynüpam israelcunaca uyshulächisha capäcula. Judacunäñatacmi awquilluncunap Tayta Diosninman chalapacuśhanpa llalliycälila.

19Jinaman Jeroboamta Abias aticaćhalmi quitäla: Bet-el, Jesana, Efrain malcancunacta malcachancunactawan-cama.

20Chaynüpam Abias cawsaśhancama mandacuyninta Jeroboam śhalcachiyta mana atipälachu. Chayllaćhümi Tayta Dios ishyayta ćhächiptin Jeroboam wañucula.

21Abiasñatacmi mandacuyninćhu masta tacyalpula. Paypa ćhunca tawayu (14) walmincuna, ishcay ćhunca ishcayniyu (22) walaśh chulincuna, ćhunca sütayu (16) wamla chulincunam cala.

22Ñatac Abiaspa lluy lulaśhancuna, limaśhancuna willacü Iddop librunćhümari isquirbïsha cayan.