1 Samuel 16 - Old Testament Quechua Wanca（QVW）

David mandacü cananpämi Samuel japächan

1Samueltam Tayta Dios nin: “¿Imaycamañam Saulpïta waꞌayanqui? Israel caśhtacunäpa mandacü cayninpïta yaꞌa wicapälüñam. Aśhwanpa asayti apacü wälayquiman asayticta winaycul liy, Belen malcayu Isaipa wasinman. Paypa jucnin chulintamari mandacüpä aclaycú” nil.

2Niptinmi Samuel: “¿Imanuypatá liyäman? Saul yaćhälul wañüchimanmanćha” nin.

Niptinmi Tayta Dios nin: “Malta wäcacta apaculcul caynu ninqui: ‘Tayta Diosta uycümi śhamulá’ nil.

3Chaypïtam uywa uycuśhayquiman Isaita ayanqui. Chayćhümi ima lulanayquipäpis yaꞌa niycuśhayqui. Lisiycachishäcätam mandacüpä asaytiwan llusiycul japächaycapamanqui” nil.

4Chaynu Tayta Dios nishantanümi Samuel lulaycula. Belen malcaman ćhäluptinmi malcap yaśhancuna manchäśhalla yalapämul: “¿Allinpächun śhayämulanqui?” nin.

5Nipäcuptinmi Samuel: “Aw, Tayta Diosta uycümi śhayämú. Cayćhu uycäshipämänayquipä chuyanchaculcay” nin.

Chaypïta Isaitawan lluy chulintinta chuyanchalculmi uycuśhancäman ayachila.

6Chayman ćhälälimuptinmi Eliabta Samuel licälul nicun: “Caymá, Tayta Dios japächacuśhancá cayan” nil.

7 Tayta Diosñatacmi Samuelta nin: “Amari licaśhallayquiwanꞌa, jatun caśhallanpá apachicuychu. Paytá manam munächu. Nunacunaca janällantam licapäcun; yaꞌañatacmi ichá śhunꞌunta licá” nil.

8Chayćhümi Isai chulin Abinadabta ayalcamul Samuelman aśhuycachiptin: “Tayta Dios paytá manam aclaycunchu” nin.

9Chaypïta chulin Samacta aśhuycachiptinmi Samuel nin: “Paytapis Tayta Dios manam aclaycunchu” nil.

10Chaynu jucllap-jucllapmi anćhish chulincunacta Isai aśhuycachimula. Samuelñatacmi: “Mayannintapis Tayta Dios manam aclaycunchu” nin.

11Nilculmi: “¿Cayllachun lluy chuliquicuna?” nin.

Niptinmi Isai: “Śhullca chulí David cayanlämi. Pay uwishtam michiyan” nin.

Niptinmi Samuel: “Payta ayachimuy. Pay ćhämunancama manam imactapis lulaśhunlächu” nin.

12Chaymi Isaí ayachimuptin śhamula. Chay walaśhñatacmi sumä tuquish cacuña. Chayćhümi Tayta Dios Samuelta nin: “Paymi aclaśhäca. Śhalculꞌari asaytiwan llusiycul japächaycuy” nil.

13Chaymi Samuel wälaćhu cä asaytiwan llusiycul japächaycula lluy wawꞌi-caśhancunap ñawquin. Chay pachapïmi Tayta Diospa Ispiritun Davidman śhamula. Chaypïtam Samuel Rama malcactaña cuticula.

Davidmi Saulta sirbin

14Saulpïñatacmi Tayta Diospa Ispiritun liculaña. Aśhwanpam Tayta Dios mana allin ispiritucta caćhaycüluptin ñacachila.

15Saulpa yanapänincunam nipäcun: “Licaśhayquinüpis, Tayta Diospa caćhamuśhan mana allin ispiritum ñacayächishunqui.

16Chayurá cay nunallayquicunactari caćhapämay arpa tucäta ashipämunäpä. Chayćha mana allin ispiritu ñacachishuptiqui arpacta tucaptin jawcayanqui” nil.

17Nipäcuptinmi Saul: “Chayurá allinnin tucäta ashï lipäcuy. Talïlälil puśhamumay” nin.

18Niptinmi jucnin nunan: “Allin tucäta licalá Belen lädu Isaipa chulin Davidtam. Pay imactapis mana manchacü allin pilyä, tincüllanman limacü, jinaman tuquishllam. Awari Tayta Diospis paywantacmi cayan” nin.

19Chaynu niptinmi Saul jucnin nunanta Isaiman caćhala caynu ninanpä: “Uwishta michï chuliqui Davidta caćhamumay” nil.

20Chaymi Isai chulin Davidta caćhala. Paywanmi Saulman apachila aśhnuman tantacta cargapalcul, wacuyćhu bïnucta, jinaman malta capishtapis.

21David ćhälulñatacmi Saulta sirbiyta allaycula. Saulmi allicta cuyal ispäda apäninpälä ćhuläla.

22Chaypïtam Saul caćhälun Isaiman cay nil: “Ama chaynu caychu, David yaꞌacta yanapämächun. Pay lluypapis allinpä licaśham” nil.

23Tayta Diospa caćhamuśhan mana allin ispiritu Saulta ñacachiptinmi David arpanta tucapä cala. Jinaptinmi Saul jawcayal allin caycula, mana allin ispiritupis caćhaycümi cala.