Nehemias 5 - Old Testament Quechua Wanca（QVW）

Mana cäniyücunätam Nehemias yanapan

1Chaypi unaytañatacmi walmicunaca wayapacunaca Juda lädu-masincunapi quijaculcäla.

2Waquinnincunamari nipäcula: “Achca walaśh-wamla chulïcunawan micuypi mana wañupäcunäpä trïguctamari talipäcuná cala” nil.

3Juccunañatacmi nipäcula: “Micuypi mana wañupäcunäpämi ćhacläcunacta, üba lantäcunacta, wasïcunacta trïgupä chalachipäculá” nil.

4Waquincunañatacmi: “Alcabälacta mandacücäman pägapäcunapämi ćhacläcunacta, üba lantäcunacta chalaycachil illayta mañaculcälá.

5Cay malcamasïcunawan juc caśhtallamari capäcú. Chulïcunapis paycunap chulincunanüllamari. Chaynu cayaptinpis walaśh-wamla chulïcunacta paycunap uywaynin cananpäñamá uycäläliśhä. Waquin wamla chulïcuná uywayninñamari cayalcan; juluytá manañamari atipapäcüchu. Ćhacläcunawan üba lantäcunapis jucpa maquinćhüñamá cayan” nil.

6Chaynu nishancunacta quijacuśhancunacta uyalïlulmi sumä piñacülú.

7Chayćhu allicta tantiapacuyculmi yaśhacunätawan puydïcunäta millapälú: “¿Imanuypatá malca-masiquicunacta mañaśhayquip milaynintapis mañayta ćhapayalcanquiman?” nil.

Nilculmi chaycunapi yaćhaśha cananpä lluy nunacunäta ayalcachimul

8nilá: “Juc nasyuncunaman malca-masinchiccuna uywayninpä lanticüśha cayaptinmi atipäśhanchicmannu imaymanap yaꞌanchic Juda-masinchicta librayculanchic. ¿¡Chaychun canan amcuna caśhta-masiquita lanticuyta ćhapayalcanquiman yaꞌacuna caśhan libraycälinäpä imatá!?” nil.

Niptïmi ima niytapis mana atipapäcul uyalayllaman camälälin.

9Chayćhümi nilpulá: “Cay lulapäcuśhayquica manamá allinchu. ¿Manachun Tayta Diosninchicta manchaculcanqui imatá? ¿Ćhïnicüninchic malcacunaca asipäcamänachictachun ashiyalcanqui imamá?

10Chaynütac ayllücuna, yanapänïcuna aśhta quiquïpis paycunacta illaytawan trïgucta mañapäcuśhäta cananꞌa amañari cutichipäcamäśhunñachu.

11Chayurá canan-pachari wasinta, ćhaclanta, üba ulïbus lantancunacta cutiycälichipuy. Chaynütac trïgucta, bïnucta, asayticta, illayta mänuculcäśhantapis nï milayllantapis amaña mañapäcuyñachu” nil.

12Niptïmi nipäcun: “Am nipämäśhayquitanüćha lulaycälishä. Lluy upämäśhancunacta cutiycachilćha imactapis manaña mañapäcuśhäñachu” nil.

Nipäcuptinmi sasirdüticunäta ayalcachimul paycunap ñawpäninćhu limaliculcäla nipäcuśhanta lulapäcunanpä.

13Jinalculmi müdanätapis tapsilcul nilá: “Cay limalicuśhancunacta mana lulaycücätá caynümi Tayta Dios tapsïlunꞌa wasinpïta, lluy cänincunapïta. Chaynu tapsïluptinmi mana imapis cäniyüman licalinꞌa” nil.

Niptïmi lluy nunacunaca: “Chaynu cachun” nilcälil Tayta Diosta alawapäcula. Limaliculcäśhanta lluymari lulaycälila.

14Má, chayćhu mandacü Artajerjesmi ishcay ćhunca (20) wata mandacuyninćhu cayal Juda lädup puydï yanapänin canäpä ćhulamäla. Chaymi quimsa ćhunca ishcayniyu (32) wata mandacuynincama puydï yanapänin calá. Chayurá chay ćhunca ishcayniyu (12) wataca manamari yaꞌapis nï ayllücunapis micapäcunäpä mañanäcäta mañapäculächu.

15Yaꞌap puntäta puydï yanapäcunäñatacmi ichá malcäta mañay-mañay capäcula muyun-muyun micapäcunanpä; bïnunpäpis tawa ćhunca (40) illaytamari mañapäcü cala. Yanapänin nunancunapis malcäta usuchipäculamari. Yaꞌañatacmi ichá Tayta Diosta manchacuynïwan chaynüchu nï lulalá.

16Aśhwanpa murälla śhalcachiyćhümi yanapänïcunawan sumä-sumä capäculá. Manamá ćhacla lantiyllactapis pinsalcapäculächu.

17Jinaman Juda lädu ütac mandacücäpa yanapänin cäcunätapis paćhac picha ćhunca (150) nunacunactam micachilá. Ñatac juc nasyuncunapi śhamücunacá manañam fintaśhapischu capäcula.

18Quiquïpi cänïpïtacmi muyun-muyun juc wäcacta, süta allinnin uwishta, pälïcunactapis yanuchï calá. Ćhunca muyunpïta-camatacmi bïnupis sirbichinäpä ćhämü cala. Ñatac malcaca uycuyta manaña atipapäcuptinmi puydï yanapä cayalpis tücänïta manaña imaypis mañalächu.

19Chaypïtam Tayta Diosta nilá: “Tayta Diosllay, cay malcäpa allinninpä lluy lulaycuśhäta yalpalcallämayꞌari” nil.