1Chaypïtam linlilläćhu Tayta Dios nisyu-nisyup niman: “Malcacta wañuchinanpä, camacaycälälinanpä unanchaśha cäcunaca arman apticälälisha-camaña śhapämuchun” nil.
2Chayćhümari licälú nurti lädu waśha puncup süta umricuna arman apticälälisha-cama yaycayalcämüta. Paycunawanmi juc nunapis cayäña lïnuwan müdapacüśha, wiꞌawninćhüpis isquirbïpa isquirbicuncunacta ćhulapacüśha. Paycuna yaycuyculmari brunsipi cä uycuna patacpa lädunćhu śhaycacaycäliña.
3Ñatac Israelcunap Tayta Diosninpa sumä caynin chay querubin anjilcunap jananćhu caśhancäpïtam licula alawana wasip yaycunanpä puncunman. Chaypïtam Tayta Dios ayala lïnupi müdanayu, wiꞌawninman isquirbïpa isquirbicuncunacta watapacüśha cä nunacta.
4Paytam nin: “Jinantin Jerusalen malcap puliycamuy. Chayćhu imaymana millachicuycunäpi llaquicücunäta, waꞌacucunäta ulcunman siñalaycuy” nil.
5Chayćhu uyaliyaptïmi juccunätapis nin: “Paypa ipanta lipäcul malcacta muyumuy. Mayanpapis ulcunćhu mana siñalaycuśha cäcunätá mana llaquipayculmá wañüchimunqui. Ñawiquiwanpis manañam licaycunquichu nï pampachaycunquipischu.
6Masqui awquish, müsu, lasac, uru, ütac walmipis cacuchun lluy-lluytamá wañüchinqui. Ñatac ulcunćhu siñaläśha cäcunätañatacmi ichá mana yataycuyllapis yataycunquichu. Chayurá canan cay alawana wasïpïtari allaycuy” nil. Niptinmi chay alawana wasip ñawpäninćhu cä puydï yaśhacunäwan wañuchiyta allacaycälin.
7Nilculñatacmi nin: “Alawana wasicta anlaman muyuchipäcuy; wañüśha nunacunawanꞌari patyuncunacta juntachipäcuy” nil. Niptinmi jinantin malcaman lilcälil wañuchiyta allacaycälin.
8Ñatac paycuna wañuchishan-camam yaꞌa japallá quïdälú. Chayćhu pampäman juclla lawacacälulmi apalcaćhaypa nilá: “Tayta Diosllay, ¿Jerusalenwan piñacülulchun jinantin Israelćhu quïdäcunäta camacaycülunqui?” nil.
9Niptïmi niman: “Cay Israel lädup, Juda lädup mana allin lulaynincuna pasa-pasaypiñamá cayan. Nasyuncäćhu sumä millachicuyllañamá cayan; malcaca mana allincäwan juntäśhallañamá cayan. Paycuna: ‘Cay nasyunta Tayta Dios unꞌälunñamá; manañamá licamanchicchu’ nilmi pinsapäcun.
10Chaymari ñawïwanpis manaña licaycuśhächu nï llaquipaycuśhächu. Aśhwanpam mana allin lulaynincunaman tincüta uycüśhä” nil.
11Chaypïta lïnupi müdacuśha, wiꞌawninćhu isquirbïpa isquirbicuncunacta ćhulacüśha umrïñatacmi nin: “Lluy nimäśhayquita ñam lulälüña” nil.
Who We AreWhat We EelieveWhat We Do
2025 by iamachristian.org,Inc All rights reserved.
