Ezequiel 46 - Old Testament Quechua Wanca（QVW）

1“Yaꞌa Tayta Diosmi ní: Inti yalamunan läduman licä, luli patyućhu cä puncuca süta lulana muyuncäćhu wićhalällam canꞌa. Jamana muyuncäćhu, llullu quillaćhuꞌa chay puncu quićhalanꞌam.

2Mandacücäñatacmi waśha lädu puncup curridurninpa yaycunꞌa. Jinalmi puncup jucnin paradïrunpa lädullanćhu śhäcunꞌa. Sasirdüticunäñatacmi cañaywan uycunancätawan allin cawsaśhanpi uycunancäta uycälinꞌa. Jinayalcaptin mandacücäñatacmi puncup lädunćhu unꞌulacuycul alawaycunꞌa. Chaypïtam chay yaycuśhallanpa yalamunꞌa. Ñatac puncuca tardicama manam wićhaśhachu canꞌa.

3Chaynümi lluy nunacunäpis, chay puncup ñawpällanćhu jamana muyunćhüpis, llullu quillaćhüpis Tayta Diospa puntanćhu alawapäcunꞌa.

4“Chay jamana muyuncäćhu mandacüca cañaywan uycuśhanćhu, süta tuqui allinnin malta uwishtawan juc tuqui allinnin carnictam uycunꞌa.

5Carnicta uycuśhanćhu-camam ishcay ćhunca (20) quïlu ćhacla micuytawan cuscacta uycunꞌa. Malta uwish uycuśhanćhüñatacmi capuśhallantawan uycunꞌa. Chay ishcay ćhunca (20) quïlu ćhacla micuytawan cuscacta uycuśhanćhuꞌa tawa litru asaytictapis uycunꞌatacmi.

6Llullu quillaćhüñatacmi tuqui allinnin malta wäcacta, süta malta uwishta, juc ulu uwishtapis cañaywan uycapäcunꞌa.

7Chay malta wäcacta, ulu uwishta uycälishanćhu-camam, ishcay ćhunca (20) quïlu ćhacla micuynintinta-cama uycälinꞌa. Malta uwishcunätañatacmi capuśhallanwan-cama uycälinꞌa. Chay ishcay ćhunca (20) quïlu ćhacla micuytawan cuscacta uycuśhanćhuꞌa tawa litru asaytictapis uycunꞌatacmi.

8Chay mandacüca yayculꞌa puncućhu cä curridurnintam yaycunꞌapis yalamunꞌapis.

9“Ñatac malcaca, unanchaśha fistacunaćhu Tayta Diosta alawä nurti lädu puncup yaycücunacá, sur lädu puncupñam yalapämunꞌa. Sur lädu puncup yaycücunäñatacmi nurti lädu puncup yalapämunꞌa. Manamá yaycuśhan puncullapchu yalapämunꞌa, aśhwanpa chimpan lädu puncupam.

10Chaynütacmi mandacücäpis yaycunꞌa yalamunꞌa malcäwan cusca capäcunanpä.

11“Chay fistacunaćhu, juntunacuycunaćhu malta wäca, ulu uwish uycuśhancunaćhu uycälinꞌatacmi ishcay ćhunca (20) quïlu ćhacla micuynintinta. Malta uwish uycuśhanćhüñatacmi imam capuśhallanta uycälinꞌa. Chay ishcay ćhunca (20) quïlu ćhacla micuytawan cuscacta uycuśhanćhu tawa litru asaytictapis uycunꞌatacmi.

12Ñatac mandacüca śhunꞌunpi yalamuśhan uycuyta Tayta Diosman uycunanpä, masqui allin cawsaśhanpi uycunanpä ütac cañaywan uycunanpä captinpis inti yalamunan lädu puncuctam quićhaycälipunꞌa. Jinaycuptinmi jamana muyunćhu uycuśhancänu allin cawsananpä uycuyta, cañaywan uycuytapis uycunꞌa. Chaypi yalüluptinmi puncucta wićhaycunꞌa.

13“Walan-walanmi wälalla Tayta Diosman juc watayu tuqui allinnin uwishta cañaywan uycapäcunqui.

14Chay wälallatacmi tawa quïlu tuqui allinnin ćhacla micuy arinactawan ishcay litru asaytiwan chapüśhacta uycapäcunqui. Chaynümi camachicuyćhu nishanmannu walan-walan Tayta Diosman uycapäcunqui.

15Chayurá wäla-wälallamari muyun-muyun cañaywan uycälinqui: malta uwishta, ćhacla micuyta, asaytictapis.

16“Yaꞌa Tayta Diosmi ní: Mandacüca chulincunaman parti tücäninta uycuptinꞌa, paycunap cäninñamá milaynincunapäwan wiña-wiñaypä caycunꞌa.

17Ñatac parti cäninta uyway nunanman uycuptinñatacmi paypa maquinćhu libri canan watacamalla caycunꞌa. Chaypïta chay mandacücäpa maquinmanñam cutiycunꞌa. Ñatac mandacüca chulincunaman tücachishancunäñatacmi ichá wiña-wiñaypä caycunꞌa.

18Mandacüca manamá mayanpa tücänintapis chalacuycunmanchu, nï waycälunmanpischu. Payꞌa quiquinpa capuśhallancätamá chulincunaman tücaycachin. Chaymi malcäćhu cänincunapi mayanpis mana alupacüśhachu capäcunꞌa” nil.

19Chaypïtam chay nunaca, nurti lädućhu cä puncuman puśhaycamal sasirdüticunäpa japächäśha cä cuartuncunap lädunman puśhaycäman. Chayćhümi inti jiꞌalpunan läduman tucsiycul juc sityucta licächiman.

20Chayćhumi niman: “Cay sityućhümi mana allin lulaycunapi uycapäcuśhan, juchacunapi uycapäcuśhan aychacunäta sasirdüticunaca timpuchipäcunꞌa. Chaynütacmi ćhacla micuy uycuśhantapis chayćhu yanupäcunꞌa. Chaynu lulaycälinꞌa waśha patyuman mana julupäcunanpämi. Chaynüpam waśha lädućhu cäcunäwan mana jucllachaycunꞌachu.

21“Chaypïtam waśha patyuman yalalcachimal tawan lädu isquinanman puśhäman. Chay tunä isquinacunaca patyuyü-camam capäcuña.

22Chay patyup tawan isquinanmi piläśha patyuyü-cama capäcuña. Chaycunam largunman ishcay ćhunca (20) mitru caña, anchunmanñatac ćhunca pichayu (15) mitru.

23Chay pilacunap muyülïninpa lulïninćhüñatacmi tullpacuna cayäña.

24Chayćhümi niman: ‘Cay tullpacunaćhümi alawana wasićhu sirbïcunaca malcap uycuśhancunacta yanupäcunꞌa’ ” nil.