1Israel caśhtacunaca Sitim lädućhu cayalcaptinmi wayapacunaca Moab walmicunäwan waticacuyta allacaycälin.
2Chay walmicunämi taytachancunacta alawayninwan uycuśhancunäman inquitala. Chaymi Israel wayapacunaca chay taytachancunap puntanćhu micapäcula, alawapäcula.
3Chaynüpamari Israel caśhtacunaca Baal-peorApo 2.14. taytachaman aysachicälälila. Jinaptinmi paycunapä Tayta Dios nina waläcänu sumä-sumä piñacüla.
4Chaypïtam Moisesta Tayta Dios nin: “Israel caśhtaćhu lluy puydïnincunacta ayalcachimul ñawpänïćhu muyunpa siꞌichiy piñacuyní chaśhnulpunanpä” nil.
5Niptinmi Israel caśhtacunäćhu ayllunćhu-cama cä yaśhancunacta Moises nin: “Chay taytacha Baal-peorman aysachicücunätam aylluyquićhu-cama wañuchipäcunqui” nil.
6Chay tincuna carpap puncunćhu Moiseswan Israel caśhtacunäpä puydïnincuna waꞌayalcaptinmi jucnin Israel caśhta lluypa ñawquin Madian lädu walmicta puśhacuśha chucllanman jiꞌacuycun.
7Chaytam licälun sasirdüti Finees; paypa taytanmi Eleazar cala, awquillunñatacmi sasirdüti Aaron. Chaymi malcaca juntulapäcuśhanta caćhaycul lansanta apticulcul pasacun.
8Jinalmi chay walmin puśhacüśha wayapap ipanta jiꞌaycuycul pulanta ispädawan patanpa pasächin. Chaynüpamari Israel caśhtacunacta wañuywan mućhuchishanca śhaycüla.
9Chay wañuycäwan ishcay ćhunca tawa walangam (24,000) wañülälila.
10Chaypïtam Moisesta Tayta Dios nin:
11“Sasirdüti Aaronpa willcan, Eleazarpa chulin Fineesmi nina walayänu Israel caśhtacunäpa cuntran piñacuynïta chaśhpulpächiman. Paymi yaꞌanu sïlacu caynïta camalachicun. Chaymi silüsu caynïwan apachiculcul Israel caśhtacunäta manaña camacaycülächu.
12Chayurá Fineestam ninqui jawca cä limalicuynïta paywan lulaśhäta.
13Yaꞌallaćhu śhunꞌun caśhan-laycum Israel caśhtacunäta chuyanchaycachilá. Chaymi paytapis lluy milaynincunactapis wiña-wiñaypä sasirdüti capäcunanpä limalicuśhäta ćhulaycú”Sal 106.30-31. nil.
14Ñatac Madian lädu walmiwan wañuchisha cä nunaca, Simeon ayllućhu puydï Salup chulin Zimrim cala.
15Madian lädu wañü walmiñatacmi Zurpa chulin Cozbi cala. Paypa taytanmi malcap jucnin puydïnin Zur śhutiyu cala.
16Chaypïtam Moisesta Tayta Dios nin:
17“Madian lädu nunacunäman lilcul wañüchiy.
18Paycunapis artillanwanmi amcunacta palpälälichishulanqui, taytacha Baal-peorman aysaśhuśhayquiwan. Chay Madian malcap jucnin puydïninpä wamla chulin Cozbi nishanmari wañuchisha cala. Paytamari wañuchinan muyuncäćhu wañüchila taytacha Baal-peorta alawapäcuśhanpi” nil.
Who We AreWhat We EelieveWhat We Do
2025 by iamachristian.org,Inc All rights reserved.
