Proverbios 21 - Old Testament Quechua Wanca（QVW）

1Yacu lïcätanümi ima munaśhantapis mandacücäta Tayta Dios lulachin;

paymá may munaśhanpapis puśhaycun.

2Nunäpá ima lulaśhanpis quiquillanpá allinmi cayan;

Tayta Diosñatacmi ichá imanuy śhunꞌun caśhantapis cäraycun.

3Cañaywan uycunayquipïta Tayta Dios mastá munan tincüllanman allincällactawan rasuncällacta lulaycunayquitamá.

4Nunatucuywan licacuyca, yaćhätucüśha cayca,

mana allin nunacunäpa pinsayninpis juchamá.

5Allin tantiaywan lulaycuśhacá allinmi yalun;

mana-mana lulaycuśhacäñatacmi ichá mana allinllaña yaluycun.

6Articuycunallawan ima cäninchictapis tawacuycá

pucutaynu pasacülla, wañuyta ashiymá.

7Juyu nunacunaca mana allin lulaśhanpi

jinaman allincämannu cawsayta mana munapäcuśhanpïmá mana cäman aysaycüśha camacapäcunꞌa.

8Mana allin nunacunap cawsaynin mana lisisha wicsu-wicsumá;

allin nunap cawsayninñatacmi ichá tuqui allin chuya.

9Pilyayllacta ashï walmiwan tuqui wasićhu cawsaypïtá

chucllallaćhu japallan yaćhaypis mas allinmá canman.

10Juyu nunacunap umanćhu mana allincällamá muyuyan;

nuna-masinta manamá uchuyllapis llaquipaycunchu.

11Shimisapa nunacta lawćhaycuptinlämi, mana tantiayniyüca yaćhaycun;

yaćhayniyücäñatacmi ichá limapaycullaptin yaćhaycun.

12Tincüninman Licaycüca juyu nunap wasin imanuy caśhantapis yaćhayanmá;

paymá juyu nunacta mana cäman ćhulaycun.

13Wacchap mañacuyninta mana uyaliycücá,

quiquinpis mañacuptin manatacmá uyaliycuśhachu canꞌa.

14Pacallap rigalaycuycá piñacüśhactapis jawcayaycachinmá;

imactapis taliyninwan uycücá maynu piñacüśhactapis pasachinmá.

15Tincüninman allichaycuyca allin nunäpá sumä cushicuymi;

mana allin nunäpäñatacmi ichá sumä manchay.

16Yaćhaycäpïta japächacü nunacá

wañücuna caśhancäćhümi camacanꞌa.

17Aychanpa munayllanćhu pulïcá wacchallam caycunꞌa;

bïnullacta, pirfümicunallacta cuyäcá mana cäniyümá caycunꞌa.

18Juyu mana allin nunaca lawćhaycuśha canꞌa, allin nunacta mana allin lulaśhanpïmi.

Ipanchä nunaca ñacanꞌa allin cawsaycü nunacta ñacachishanpïmi.

19Chunyä ulꞌućhu yaćhaypis mas allinmi canman juyupä piñacü,

palacü walmiwan cawsaypïtá.

20Yaćhayniyu nunap wasinćhu ima cäninpis asaytinpis cayanmá;

luclu nunäñatacmi ichá ima cällantapis mana caśhanman muyuchin.

21Allincätawan llaquipayta ashiycücá cawsayta,

tincüninman lulayta, altuman juluycuśha caytamá taliycunꞌa.

22Yaćhayniyüca alli-cama nunap malcantamá llalliycun;

chalapaculcäśhan sumä pilantapis camacaycülunmá.

23Shiminta allunta sujitacücá

ima llaquicuymanpis manamá ćhanꞌachu.

24Sumä nunatucüśha, puydïtucüśha,

yaćhätucüśha cäcunaca chayman atinïdumá lulapäcun.

25Illa nunaca imactapis munapayllam munapayan;

lulayta mana munalmi micuypïta wañun.

26Payꞌa imaypis quiquillanpämari wañupacuyan;

allin nunäñatacmi ichá mana cućhcuśhyallal uycun.

27Juyu nunacunap uycuśhanta Tayta Dios millachicunmi;

mana allin śhunꞌuwan uycuśhantá mastalämá millachicunpis.

28Artish tistïguca camacaycüśhamá canꞌa;

allin tistïguñatacmi ichá uyaliycuśha canꞌa.

29Juyu mana allin nunaca allintucunmá;

allin nunäñatacmi ichá cawsayninta tuquicta licacuycun.

30 Tayta Diospa puntanćhuꞌa maynu yaćhaypis,

tantiayniyu caypis, allin limapaypis manamá imapischu.

31Pilyapä cawallucunäta alistapäcuptinpis

Tayta Diospïmi llalliycuyca śhamun.