Josue 21 - Old Testament Quechua Wanca（QVW）

Levi ayllumanmi malcacunacta uycapäcun 1Cro 6.54-81

1Chaypïta Levi ayllup puydïnincunam sasirdüti Eleazarman, Nunpa chulin Josueman, Israel caśhta ayllucunap puydïnincunaman śhapämula.

2Paycunam Canaan lädu Silo malcaćhu cayalcäla. Chayćhümi nipäcula: “Tayta Diosmi Moisesta camachila yaćhapäcunäpä malcacunacta uycälimänanpä, uywäcunapäpis ichadïructa uycälimänanpä” nil.Num 35.1-8.

3Chaymi Tayta Dios nishantanu Israel läducunaca quiquinpa tücänincunapïña Levi ayllucunäta malcacta ichadïruntin-camacta caynu tücachin:

4Chüsaptin Levi ayllupïta cä sasirdüti Aaronpa milaynin Coatpa chulincunamanmi ćhunca quimsayu (13) malcacuna tücala. Chay malcacunam Juda, Simeon, Benjamin ayllup tücäninćhu cala.

5Coatpa parti aylluncunactá ćhunca malcacunactam uycula Efrainpa, Danpa, Manasespa ćhawpi ayllunpa tücänincunaćhu.

6Levi ayllu Gersonpa milaynincunamanñatacmi ćhunca quimsayu (13) malcacuna tücälun Isacarpa, Aserpa, Neftalipa, jinaman Basanćhu cä parti ayllu Manasespa allpancunaćhu.

7Levi ayllu Merarip milaynincunamanꞌa ćhunca ishcayniyu (12) malcacunam tücälun Rubenpa, Gadpa, Zabulonpa allpancunaćhu.

8Chaynu chüsaypam Tayta Dios Moisesta nishanmannu israelcunaca Levi ayllucunäman malcancunacta ichadïruntin-camacta tücaycachila.

9Chaynütacmi Juda, Simeon ayllucunäćhu tücaśhan malcancunacta uycapäcula.

10Chay malcacunam puntacta chüsaśhan-laycu Levi ayllupïta cä Aaronpa milaynin Coatpa chulincunaman tücäla.

11Paycunamanmi Juda ayllup ulꞌuncunaćhu Quiriat-arbacta ütac Hebron nishanta ichadïruntinta uycula. (Anacpa taytanmi Arba cala.)

12Hebronpa lädunćhu ćhaclacunätawan malcantin-camactam ichá Jefonepa chulin Calebman tücachila.

13Chayurá sasirdüti Aaronpa milaynincunamanmi Hebron malca ichadïruntin uycuśha cala. Hebronꞌa pacacunapä malcam cala. Uyculatacmi cay malcacunacta ichadïruntin-camacta: Libnacta,

14Jatirta, Estemoata,

15Holonta, Debirta,

16Ainta, Jutacta, Bet-semestapis. Cay isun malcacunamari Juda, Simeon ayllucunap tücäninćhu uycuśha cala.

17Chaynütacmi Benjamin ayllup tücäninćhüpis cay malcacunacta ichadïruntin-camacta uycula: Gabaonta, Gebacta,

18Anatotta, Almontapis. Chay tawa malcacunamari cala.

19Chayurá sasirdüti Aaronpa milaynincunacta ćhunca quimsayu malcacunactamá ichadïruntin-camacta uycula.

20Levi ayllu Coatpa waquin milaynincunactañatacmi Efrain ayllup allpanćhu tücapäcula.

21Paycunamanmi Efrain ayllup ulꞌuncunaćhu cä Shiquem malcacta tücachila. Shiquem malca pacacunapä malcamari cala. Jinaman uyculatacmi: Gezerta,

22Kibsaimta, Bet-horontapis. Tawa malcacunam ichadïruntin-cama tücala.

23Dan ayllup allpanćhüñatacmi cala: Elteque, Gibeton,

24Ajalon, Gat-rimonpis. Chay tawa malcam ichadïruntin-cama tücala.

25Chaypïta ćhawpi ayllu Manasesćhuꞌa cala: Taanacwan Gat-rimonmi. Chay ishcay malcam ichadïruntin-cama tücala.

26Chayurá Coatpa waquin aylluncunamanmi ćhunca malcacuna ichadïruntin-cama tücala.

27Chaynütacmi Levi ayllupi cä Gersonpa milaynincunactapis tücachila ćhawpi ayllu Manasespa allpanćhu ishcay malcacta ichadïruntin-camacta: Basanćhu cä Beesteractawan Golanta; cay Golan malca wañuchïcunaca pacaculcänanpämi cala.

28Chaynütacmi Isacar ayllup allpanćhüpis caycunacta tücachila: Cisonta, Daberatta,

29Jarmutta, En-ganimtapis. Chay tawa malcacunamari ichadïruntin-cama cala.

30Aser ayllup allpanćhüñatacmi tücachila: Misealta, Abdonta,

31Helcatta, Rehobtapis. Chay tawa malcacunamari ichadïruntin-cama cala.

32Neftali ayllup allpanćhüñatacmi tücala: Galileaćhu cä Cedes, Hamot-dor, Cartanpis. Cay Cedesmi wañuchïcunäpä pacacunan malca cala. Chay quimsa malcam ichadïruntin-cama tücala.

33Chayurá Gerson ayllucunäman quimsa ćhunca quimsayu (33) malcacunam ichadïruntin-cama uycuśha cala.

34Chaynütacmi Levi ayllupi cä Merarip milaynincunactapis tücachila Zabulon ayllućhu tawa malcacta: Jocneamta, Cartata,

35Dimnata, Naalaltapis. Chay tawa malcamari ichadïruntin-cama cala.

36Jinaman Ruben ayllup allpanćhüpis tawa malcatacmi ichadïruntin-cama tücala: Beser, Jahaza,

37Cademot, Mefaatpis.

38Chaynütacmi Gad ayllup allpanćhüpis tücachila tawa malcacta ichadïruntin-camacta: Galaadćhu cä Ramotta (Caymi wañuchïcunaca pacaculcänanpä malca cala), Mahanaimta,

39Hesbonta, Jazertapis.

40Chayurá ćhunca ishcayniyu (12) malcacunamari Levi ayllu Merarip milaynincunaman ayca capäcuśhanmannu chüsaptin tücala.

41Israel caśhtacunäpa allpancunaćhu Levi ayllucunaca tawa ćhunca pusäniyu (48) malcactam ichadïruntin-camacta ćhasquipäcula.

42Cay malcacunaca japä-japä-camam ichadïruntin-cama cala. Chaynüllamari lluy malcacunäpä cala.

43Chayurá Tayta Dios Israel läducunäpa awquilluncunaman rasunpa limalicuśhanmannümi allpacunäta uycula. Chayćhümi Israel caśhtacunaca duyñuchacuycul yaćhapäcula.

44Tayta Dios awquilluncunaman rasunpa limalicuśhanmannütacmi jawcallactaña cawsaycachila. Quiquin Tayta Dios Israel läducunäpa maquinman ćhïnicünincunacta ćhulaycüluptinmi imanaytapis manaña atipapäculachu.

45Israel läducunäman Tayta Dios rasunpa limalicuśhancunäta lluymari lulaycula; manamá jucllayllapis mana lulaycuśhanꞌa calachu.