Ezequiel 22 - Old Testament Quechua Wanca（QVW）

Jerusalenpa millachicuy anla lulaśhancunapïmi nin

1 Tayta Diosmi niman:

2“Am wañucülla nuna, ¿amchun cäraycuyta munayanqui wañuchicü juyu malcacta? ¿Am wañucülla nunachun ‘cäraycuśhä’ niyanqui? Chayurá awiluyquicunap mana allin millachicuy lulaynincunactari licaycachiy.

3Willaycamuy: Tayta Dios caynümi nin: Caminuyquicunaćhu nunacunäta wañuchï malca, taytachacunacta lulaśhayquiwan millachicuyman muyuchï malca, cunca cuchuyniquitamá ashicülunqui.

4Nunacunäta wañuchishayquiwanmá juchacta lulälunqui. Taytachacunacta lulaśhayquiwanmá anlatacälälinqui. Quiquillayquimá lulacülunqui muyunniqui ćhämunanpä, watayqui camacänanpä. Chayurá nasyuncunäpa jalutacunanmi canqui, jinantin allpäpa jamuyänanmi canqui.

5Mana allinpä licaśha, sumä chapunacuyćhu cä malca, läduyquićhu ütac calućhu cä malcapis amta asipäculcäśhunquimá.

6“Licay, am Jerusalenćhu lluy Israelpa puydïcunaca munayninmannu-camamá wañuchiyta jicutapäcun.

7Amćhu, mamancunacta taytancunacta mana allinpamá licayta ćhapapäcun. Amćhu yaćhä mana Israel läducunäta ñacachipäcunmá. Japanyäśhacunäta, mana taytayu mamayücunätapis usuchipäcunmá.

8Japächaśha chuya cäcunäta mana allinpamá licapäcunqui. Jamana muyunnïtapis jalutaculcanquimá.

9Amćhu cäcunaca wañuchipäcunanpä tumpapäcunmá; ulꞌup puntancunaćhümi taytachacunapä cumbidaculcan. Amćhu cäcunaca millachicuy lulaycunactamá lulapäcun.

10Taytanpa walmincunawanmá puñupäcun; ishyacuyninćhu cayä walmicunätapis firsälälinmá.

11Waquincuna nuna-masinpa walminwan millachicuy lulaycunactamá lulapäcun. Juccunacá llumchuynincunawan pinꞌay lulaytamá lulapäcun. Waquincuná llumchuynincunactamá, taytanpa wamla chulincunactamari firsälälin.

12Amćhu cä waquincunam nunacta wañuchinanpä illayta ćhasquipäcun. Juccunäñatacmi illaynincunacta mañaycun achca milaynincunacta juluyninwan. Waquincunañatac nuna-masinta ingañayninwan ućhipäcun. Yaꞌactañatacmi ichá unꞌälälimanqui. Yaꞌa Tayta Diosmari niyá.

13“Licay, nuna-masiquita waycaśhayquipi, wañuchishayquipi maquïta patipacuyculmá ćhächishayqui.

14Jinaptí ¿śhunꞌuyqui tacyaycunꞌachućh? Cuntrayqui śhalcuptí ¿callpayqui caycunꞌalächućh? Cay nishäcäta yaꞌa Tayta Diosmi lulaycuśhä.

15Lluy nasyuncunämanmi chiꞌichishayqui; jinantin malcacunämanmi alüśhayqui. Chay millachicuy lulayniquicunactamá chincächishä.

16Lluy nasyuncunap ñawpäninćhümi jalutacüśha canqui. Chayćhülämi Tayta Diosniqui yaꞌa caśhäta tantianqui” nil.

17Chaypi Tayta Diosmi caśhan niman:

18“Wañucülla nuna, Israel läducunaca anla quïdäcunänümi cayalcan. Illayta fundiptinchic anla quïdä brunsi, estañu, jïrru, plümucunänümari cayalcan.

19Chaymi yaꞌa Tayta Dios ní: Amcuna chaynu mana bälï anlaman muyüläliptiquimá Jerusalenpa ćhawpinman juntülälishayqui.

20Maynümi fundinapä illayta, brunsicta, estañucta, jïrructa, plümucta walayä jurnup ćhawpinman juntuycunchic, chaynümi piñacuynïćhu, rabyacuynïćhu amcunacta juntuycul fundïlälishayqui.

21Lluy juntuyculmá walayä piñacuynïwan lataycälächishayqui; jurnup ćhawpinćhümi fundïlälishayqui.

22Maynümi jurnup ćhawpinćhu illaycäta fundinchic, chaynümi amcunactapis malcap ćhawpinćhu fundïlälishayqui. Chaynüpam yaćhapäcunqui yaꞌa Tayta Dios piñacuywan mućhuchipäcuśhacta” nil.

23Chaypi Tayta Dios yapam niman:

24“Wañucülla nuna, Israelta niy: Piñacuśhá muyuncäćhu am manañamá chuyanchaśha allpanüñaćhu canqui; anman tamya manaña tamyamünüñam, yacupis manaña ćhämünüñam canqui.

25Amcunap ćhawpiquićhümari willacücunaca limanaculcan, wañuyä liyun aychacta quitanacücänu nunacunäta ticshïlälinanpä. Cänincunacta ima allinnincunactapis chalacaycälinmá; walmicunällactañam japanyälälisha-camacta caćhaycälälin.

26Sasirdütincunapis camachicuynïtam iwipäcun, japächaśha chuyannincunacta manamá chuyapänüchu licapäcun. Chaynütacmi chuyapis anla cäcäpis chaynu-camalla caśhanta, jinaman allincäpis mana allincäpis chaynu-camalla caśhantam yaćhachipäcun. Japächaśhá jamana muyunnïtapis manamá licayta munapäcunchu; paycuna jalutacälälimanmá.

27Chay malcaćhu puydïnincuna imactapis camacaycü atünümá cayalcan. Mana lulallal yanꞌalpi imactapis apaculcänanpämá nunacunäta camacayalcan, wañuyalcächin.

28Chay imam pasaśhancäta willacünincuna pacayalcan yulä paćhaśhwan pilacta llutäcänümá. Paycuna: ‘Tayta Diosmi willaycäliman’ niyalcanlämi canpis. Ñatac yaꞌa Tayta Diosꞌa manamá imallactapis niyculächu.

29Chay nunacunaca juccunätamá usuchipäcun, suwapäcun; mana cäniyücunäta, wacchacunätam ñacachipäcun; mana Israel läducunätamá usuchipäcun.

30Paycunaćhu amistaycachïta ashilämi; chay camacaycunäpä cä malcapïta limalcunanpä mayanllactapis ashilämari. Ñatac manamá mayanllactapis talilächu.

31Chaymi paycunaman piñacuynïta ćhaycachishä. Walayä piñacuynïwanmi camacaycüśhä. Lluy mana allin lulaynincunactamá quiquinman ćhaycachishä. Yaꞌa Tayta Diosmari niyá” nil.