Job 38 - Old Testament Quechua Wanca(QVW)

Jobtam Tayta Dios tantialpachin

1Sumä waywäpa ćhawpinpïmi Jobta Tayta Dios nimun:

2“¿Mayantá am canqui shimiqui chalaśhan

limayniquicunawan limapaynïta mana cäpa licanayquipä?

3Cananꞌari maynu nuna-nuna caśhayquita licaycuśhun.

Yaꞌa tapuptïmá amñatac niycamanqui.

4“¿Cay pachäpa simintunta ćhulaycuptí mayćhütan am cayälanqui?

Rasunpa sumä yaćhaśhayquita canan má niycamayꞌari.

5¿Ayca tupuyu cananpä mayanmá camaycachila?

¿Tupunanpä mayanmá curdilta chutaycula?

6¿Imap jananćhümá simintuncuna cayan?

¿Isquinanćhu chalaläśhan lumicta mayanmá ćhulala?

7¿Chayćhu uyllurcunäpis taquipäcuptin, Tayta Diospa anjilnincuna

cushiculcaptin mayćhümá calanqui?

8“¿Allpap śhunꞌunpi yacuca yalayämuptin

mayanmá puncunta wićhaycula?

9¿Mayanmá cay pachäpa müdananpä pucutaycäta ćhulaycula,

waćhacunpäñatac yanalpamücäta?

10Lamarca maycama cananpäpis yaꞌamari unanchayculá;

puncuncunactapis wićhacuwan yaꞌamari wićhayculá.

11Lamarcätam nilá: ‘Caycamallam ćhanqui; caypïta amañam pasanquichu.

Caycamallam sumä wicapacamü yacuyqui ćhaycunꞌa’ nil.

12“Am Job, ¿imayllapis ayllimunanpä niyculanquichun imamá?

¿Imayllapis achicäśhaña cananpä camaycachilanquichun imatá?

13¿Imayllapis jinantin pachäpa manyanta chalalcul

lluy mana allin nunacunäpa lulayninta acchïwan tapsïlanquichun imatá?

14Acchica cay pacha imanuy caśhantamá camalaycachin;

imaymana licchäwan müdacuśhanu caśhantamá licaycachin.

15Acchica mana allin nunacunäta piñachinmá;

mana allinta lulananpä maquin pallalcuśhanca paquïshañamá cayan.

16“¿Lamarcäpa yacu yalamunancäman yayculanquichun imatá?

¿Chay lulićhu ashishtin pulilanquichun imamá?

17¿Wañücuna canancäpa puncuncunacta licalanquichun imatá?

¿Tutawyay wañuycäpa puncunman ćhälanquichun imamá?

18¿Jinantin allpaca ayca mïdishantapis yaćhanquichun imatá?

Lluy caycunacta rasunpa yaćhalꞌa, má niycamayꞌari.

19“¿Acchica maypïmá śhamun?

¿Tutawyayca maytamá liyan?

20¿Maymanpis ćhänancama puśhaycunquimanchun imatá?

¿Wasincama mayninpa cutichimuytapis yaćhaycunquichun imatá?

21¿Achca-achca watayüña cayalꞌa

lluy chaycunacta am yaćhayanquiñaćh aw?

¿Imapis manalä camaśha cayaptin,

am näsishaña cäca tuquictañaćh lisiyanqui aw?

22“¿Laśhtacuna caśhancäman am ćhälanquichun imatá?

¿Luntucunaca ćhulaläśhancäman jiꞌayculanquichun imatá?

23Chaycunacta llaquicuy,

pilyay timpucunapämá yaꞌa ćhulaycuyá.

24¿Mayninpamá acchïpa acchiynin liyan?

¿Imanuypamá inti ishpimunan lädupi śhamü waywaca maśhtacacun?

25“Má, ¿mayanmá räyup, waclip caminuncunacta unanchaycun?

¿Mayantá lücu tamyacunäpa caminunta quićhaycun?

26¿Mayanpis mana yaćhaśhanman tamyamunanpä,

mana nuna caśhan chunyäcäman ćhämunanpä

mayanmá acutachimun?

27¿Sumä chaquïsha ulꞌucunäta acutachinanpä,

llullu pastucunäta wiñachimunanpä mayanmá tamyaycachimun?

28“¿Mayanmá tamyäpa taytan?

¿Pimá śhullip papänin?

29¿Mayanmá asäpa maman?

¿Pimá sïlüćhu iscarchäta waćhacula?

30¿Mayanmá lumictanu yacüta alalächin?

¿Pimá lamarcäpa janäninta iscarchächin?

31“¿Amchun ‘Pleyade’ nishan uyllurcunäta

jucllaćhu caycachinqui imatá?

¿Amchun ‘Orion’ nishan uyllurcunäta

wicćhu cayćhu caycachinqui imatá?

32¿Amchun lusirüta timpullanćhu

yalaycachimunqui imamá?

¿Amchun ‘Mayur Osa, Śhullca Osa’ nishan

uyllurcunätapis caminaycunqui imamá?

33¿Sïlüćhu lluy cäcunaca imanuy cananpäpis

camachicuyta am lisiyanquichun imatá?

¿Chay camachicuymannu cay pachäćhu lulaycuśha

cananpä amchun lulaycuyanqui imamá?

34“¿Pucutaycäta niycunquimanchun

tamyacta sumä ćhaycachimunanpä imatá?

35¿Amchun räyucunäta mayman linanpäpis niyanqui imamá?

¿Amtachun räyucunaca: ‘Cayćhümi cayalcá

nipämäśhayquita lulaycälinäpä’ niyalcäśhunqui imatá?

36¿Mayanmá pälïcunäta yaćhayta uycun?

¿Mayanmá tantiayta uycun?

37¿Ayca pucutay caśhantapis fintaycunanpä

mayanmá sumä yaćhayniyu?

¿Sïlüćhu istanquicunapi mayanmá yacucta jićhaycamunman,

38pulbupis mituman muyunanpä,

culpacunapis quiquin-pula laꞌanacacunanpä?

39“¿Liyuncunäpa micunancunacta amchun taliycachinqui imatá?

¿Malta liyunnincunap micanaynintapis amchun tallpalpachinqui imamá?

40¿Maćhaynincunaćhu jitalayalcätachun

ütac jaćha-jaćhacunäpi awaytayämücätachun uycunqui imatá?

41¿Mayantá wisculcunäpa micunancunacta uycun?

¿Mayanmá mawlla wisculnincuna micuypïta

yanꞌal-yanꞌal pulipäcul apalcaćhaypa ayacalcämaptin uycun?

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help