1 Reyes 3 - Old Testament Quechua Wanca（QVW）

Faraonpa wamla chulinwanmi Salomon casaracun

1Salomonmi Faraonpa wamla chulinwan casaracülul Egipto nasyunpa mandacü Faraonwan aylluña capäcula. Chaymi Davidpa Malcan nishanman puśhala yaćhapäcunanpä. Chayćhu capäcula palasyunta, Tayta Diospa wasinta, Jerusalen malcap murällanta lulachiyta camacänancamam.

2Chaycama manalämi Tayta Diospa wasin lulaśhalächu cala. Chaymi israelcunaca ulꞌucunäpa puntancunaćhüla cañaywan uycapäcü capäcula.

Salomonmi yaćhayta mañacun 2Cro 1.1-13

3Salomonꞌa Tayta Diosta cuyalmi papänin David nishantanülla lulaycula. Chaynu lulayalpis ulꞌucunäpa puntanćhüpis cañaywan uycapäculam, insinsiuctapis cañaycapäculam.

4Gabaonćhümari sumä lisisha puydïnin uycunapä cacula. Chayman Salomon uycunanpä lilmi walanganpi (1,000) uycula.

5Chay Gabaonćhümi Salomonta Tayta Dios licalilcamul nin: “Ima munaśhayquitapis mañacamay jinalla; uycuśhayquim” nil.

6Niptinmi Salomon nin: “Nunallayqui cä papäní Davidta sumä cuyaywanmi uywayculanqui. Chaynu licayculanqui mana ipanchällal, tincüllanman, allin śhunꞌuwan cawsaycuśhanpam. Sumä cuyaltacmi paypa pudirnin mandacunanpä chulintapis canan ćhulaycunqui.

7Am Taytallämi, Diosnillämi, masqui mana yaćhayniyu müsullala cayaptïpis papäní Davidpa pudirnin mandacüpä ćhulaycallämanqui.

8Cananꞌa cay nunallayqui, aclacuśhayqui malcayquićhu, fintaytapis mana atipana achca-achca cä malcayquićhümari cayällá.

9Chayurá cay nunallayquita yaćhayta uycallämay malcayquita yaćhaywan mandaycunäpä, jinaman allin ütac mana allin caśhantapis tantiaycunäpä. Yaćhayta mana umaptiquiꞌa ¿pimá nisyu-nisyuña cä malcayquita mandayta atipanman?” nil.

10Chaynu Salomon mañacuśhanmi Tayta Diospa śhunꞌunpä cala.

11Chaymi nin: “Am manamá mañacamälanqui achca wata cawsanayquipächu, nï cäniyu canayquipächu, nï ćhïnicüniquicuna wañuchisha cananpächu. Sinuꞌa yaćhayta mañacamälanqui allincämannu mandanayquipämi.

12Chaymi mañacamäśhayquinu yaćhaytawan tantiayta uycuśhayqui. Am yaćhayniyu caśhayquinuꞌa manam calachu nï canꞌapischu.

13Jinaman mana mañacuśhayquitapis uycuśhayquim: sumä cäniyümanmi muyuchishayqui, sumä altunninmanmi juluycuśhayqui. Cawsaśhayquicama amnuꞌa juc mandacü manam canꞌachu.

14Papäniqui Davidnu yaćhachishäta, camachishäta, nishäta cäsucuptiquiꞌa, achca watacunam cawsachishayqui” nil.

15Chay puñuśhanpïta Salomon licaćhacülulmi suyñulla caśhanta tantiälun. Chaypïta Jerusalenman ćhayculmi Tayta Diospa limalicuśhan babulninman aśhuycula. Chayćhümi uywacunacta cañaywan uycapäcula, allin cawsaśhanpi uycunactapis uycula. Jinaman lluy nunancunapäpis jatun cumbiductam lulachila.

Salomonmi yaćhaywan allichaycun

16Chay timpum mandacü Salomonman ishcay watica walmi ćhälälin.

17Chayćhümi jucnin nin: “Mandacü taytallay, cay walmiwan juc wasillaćhümi yaćhapäcú. Chaynu jucllaćhu yaćhayalcalmi yaꞌa ishyacülá.

18Quimsa muyunña ishyacüśha cayaptïmi paypis ishyacülun. Chay wasićhu ishcayllämá yaćhapäcú. Manam pipis juc nuna yaćhanchu.

19Juc tutañatacmi pay puñuyal wawinta ñitïluptin wañüña.

20Chaymi cay walmica ćhawpi tuta śhalcuculcul puñuyaptí wawïta apacuña. Jinalculmi wañüśha wawinta üllaycächimäña.

21Achicalpuyaptinñamari ‘ñuñuśhä’ ninäpä wawí wañüśha cayäña. Ayllïluptin licaycunäpäñatacmi ishyacuśhá wawïchu nï caña” nil.

22Niptinmi juc walmica: “Manamá chaynüchu. Yaꞌap wawïmi cay cawsäca. Ampañatacmi wañucüca cala” nin.

Niptinmi punta limä walmica: “Manam. Wañüśhämi ampa cala. Cay cawsäcá yaꞌap wawïmi” nicuyan.

Chaynümi mandacü Salomonpa puntanćhu ninacücuyalcan.

23Chaymi mandacü Salomon nin: “Jucniquim: ‘Wañüśhämi ampa cala; cawsäcäñatac yaꞌapa’ niyalcanqui. Juccäñatacmi: ‘Manam. Cawsäcämi yaꞌapa; wañuśhämi ampa’ niyalcanqui” nil.

24Nilculmi mandacü Salomon: “Ispädacta apamumay” nin.

Chaynu apalälimuptinmi nin:

25“Cay cawsä iñachacta ćhawpipi ishcayman partiycul jucnincä uycuy” nil.

26Niptinmi cawsä iñachap maman sumä-sumä llaquicülul mandacücäta nicuyan: “Mandacü taytallay, iñachäta amari wañuchillaychu. Aśhwanpa cay walmiman uycüluy” nil.

Niptinmi juc walmïñatac: “Mana quitanacuyänanchicpä jina partïchun” nin.

27Niptinmi mandacü Salomon: “Ama wañuchipäcuychu. Punta ruygacü walmiman iñachäta uycuy. Paymi rasunpa maman” nin.

28Chaynu sumä yaćhayninwan mandacüca allichaycuśhanta yaćhalälilmi jinantin israelcunaca manchacuywan licapäcula. Tayta Dios yaćhayta uycuptin sumä tincüninman-cama cäraycuśhanpïmari manchacuywan licapäcula.