1 Cronicas 17 - Old Testament Quechua Wanca（QVW）

Davidmanmi Tayta Dios limalicun 2Sam 7.1-29

1Palasyunćhüña David yaćhayalmi Tayta Diospa willacünin Natanta nin: “Yaćhaśhayquinüpis Cedropi luläśha palasyućhülämi yaꞌa yaćhayá. Tayta Diospa limalicuśhan babulninñatacmi ichá carpallaćhülä cayan” nil.

2Niptinmi Natan: “Allinmi, śhunꞌuyqui nishanmannuꞌari imactapis lulaycuy. Tayta Diosninchic anwanmi cayan” nin.

3Chay tutallatacmi Natanta Tayta Dios nin:

4“Uywayní Davidman lilcul caynu nimuy: ‘Tayta Diosmi nin: Wasicta yaćhanäpä amchu manam lulapamanqui.

5Israelcunäta Egiptopi julamuśhäpïta canancama, wasićhu manamá yaćhayculächu. Wicman cayman apaycaćhaśha carpacunallaćhümi puliyá.

6Israelcunäwan lluy pulishäćhu malcäta michiycunanpä caminaycüta ćhulalpis mayanllantapis “¿Sumä cedro ilupi wasicta lulaycapamay” nilächun yaꞌa imamá?

7Chayurá sumä munayniyu Tayta Dios nishäta uywayní Davidman caynu niycamuy: Uwish michishayquipïtam julaycamulac, Israel malcäpa puydï mandacünin canayquipä.

8Mayta lishayquićhüpis anwanmi calá. Lluy ćhïnicüniquicunactapis ñawpäniquićhümi camacaycülá. Cay pachäćhu munayniyücunänu sumä lisisha canayquipämi yanapäśhayqui.

9Chaynütacmi Israel malcäpä juc sityucta aclaycú. Chaymanmi taycaycachishä manaña mayanpis cuyuchinanpä. Chayćhu manañamá mayanpis nï mana allin nunacunäpis ñacachinꞌañachu,

10chay Israel malcäćhu caminaycücunacta ćhulaycuśhá muyuncunaćhunuꞌa. Yaꞌa Tayta Diosmari ćhïnicüniquicunacta uyshulächishä. Milayniquicunapïpis mandacücunactalämi śhalcachishä.

11Cawsayniqui camacayninman ćhäluptin, awquilluyquicuna caśhanman jamacunayquipä licuptiquipis, yaꞌamari milayniquipïta mandacüta ćhulaycul tacyalpachishä.

12Paymi altuman julaycamayninwan wasicta lulaycapamanꞌa. Yaꞌañatacmi mandacuyninta wiña-wiñaypä tacyaycachishä.

13Yaꞌami taytan caśhä. Payñatacmi chulí canꞌa.2Cor 6.18; Heb 1.5. Ñatac llaquipaynïtapis manamá punta mandacü Saulpïnüchu quitaśhä.

14Aśhwanpa maquïćhu cä nunäcunap mandäninpämi tacyaycachishä; mandacuynin wiña-wiñaypämari caycunꞌa’ ” nil.

Davidmi Tayta Diosta mañacun 2Sam 7.17-29

15Chaynu Tayta Dios lluy nishancunäta licaśhanmannümi Davidman Natan willaycula.

16Chaynu willaycuptinmi carpäćhu Tayta Dios caśhanman yaycuycul mandacü David nin: “Tayta Diosllay, ¿mayantá callá, yaꞌapis milaynïcunapis caycama ćhaycachisha capäcunäpä?

17Caycama ćhaycachimäśhayquica yanꞌallachun ampá; aśhta milaynïcunapis allin caycälinanpälämi limalicayämanquipis. Tayta Diosllay, sumä allin nunactanülämi licaycallämanqui.

18Tayta Diosllay, ¿cay nunallayquita altuman ćhulaycamäśhayquipïta ima mastamá niyculläśhayqui? Cay nunallayquita am tuquictamari lisiycallämanqui.

19Tayta Diosllay, cay nunallayquita cuyamäśhayquimannümi, munayniquita camalaycachinayquipä cay sumä lulaycunacta lulayculanqui.

20Tayta Diosllay, amnuꞌa manam mayanpis canchu. Uyalishämannuꞌa ampïta manam juc Tayta Dios canchu.

21¿Mayan nasyunmá Israel malcayquiwan tincuycachisha caycunman? Tayta Diosllay, anmi librayculanqui nunayquicunaña cananpä. Milagrucunacta sumä lulaycunacta lulaśhayquiwanmi paycunacta sumä lisishacta lulayculanqui. Egiptopïta julamuśhayquićhümi achca nasyuncunacta ñawpäninpi alapacülanqui.

22Anmá Israel malcayqui wiñaypä cananpä tacyaycachilanqui; am Tayta Diosmi Diosnin caycunqui.

23“Chayurá Tayta Diosllay, cay nunallayquiman milaynintinman limalicuśhayquita wiña-wiñaypä tacyalpachillay. Nishayquimannuꞌari lulaycuy.

24Chaynu lulaycuptiquićh śhutiqui altuman juluycuśha canꞌa. Jinaman lluypis nipäcunꞌam: ‘¡Sumä munayniyüca, Israelpa Tayta Diosninmi!’ nil. Cay nunallayqui Davidpa milaynin, ñawillayquićhümá tacyaycunꞌa.

25“Tayta Diosllay, anmi cay nunallayquiman camalaycachimälanqui. Chaymi cay nunallayqui mañacamullá.

26Tayta Diosllay, amllam Dios canqui; cay nunallayquimanmi lluy caycunacta limalicamälanqui.

27Cay nunallayquip aylluncunacta allinpä licaycälillämay, imaycamapis ñawillayquićhu capäcunäpä. Am Tayta Diosllämi limalicamälanqui cay nunallayquip milaynincuna yanapayniquiwan, wiña-wiñaypä allinpä licaycuśhä capäcunäpä” nil.