1Uycuna patacpa lädunćhümi Tayta Diosta suyñuynïćhünu licälú. Chayćhümi niman:
“Paradïrucunap umanćhu cäcäta wipyaycuy,
puncucunap umralnincuna śhaśhapäcunanpä;
jinaptin uchuy-uchuylla umancunaman palpupämunanpä.
Quïdäcunätañatacmi ispädawan wañüchishä;
jucllayllapis manamá ayinꞌachu;
manamá mayanpis salbaculcanꞌachu.
2Masqui allpap śhunꞌunman pacacuptinpis,
chaypïta maquïwan juluśhämá.
Masqui sïlücama ishpiptinpis,
chaypïtapis jiꞌalpachimuśhämá.
3Masqui Carmelo ulꞌup chupquinman pacacuptinpis
ashilculmi chayćhu chaläśhä.
Masqui ñawïpïta lamarpa luli-lulïninman pacacuptinpis
culibraycäta caćhünanpä niycuptïmá caćhülunꞌa.
4Masqui ćhïnicüniquicuna prïsuctanu puśhaculcaptinpis
chayćhu ispädawan wañuchinanpämá nishä.
Paycuna imaypis ñawilläćhümá caycälinꞌa;
manamá allinpächu sinuꞌa mana allinpämari” nil.
5Awari, sumä munayniyu Tayta Diosmá
jinantin allpäta yataycuyllanwan lluy chullüchinꞌa.
Jinaptinmi chayćhu lluy cawsäcunaca waꞌaculcanꞌa.
Awari, Nilo mayuca wiñaśhannu chaynütac
mirmaśhannümari capäcunꞌa.
6Paymari wasinta janay pachäćhu lulaycula;
simintuntañatacmi cay allpäman ćhulaycula.
Paymari lamarćhu cä yacucunaca
cay allpäman jiꞌalpapämunanpä niycun.
Paypa śhutin Tayta Diosmá.
7 Tayta Diosmi nin: “Israelcuna,
¿manachun amcuna Etiope läducunänülla cayanqui imamá?
¿Manachun amcunacta Egipto lädupi julaycälimulac imatá?
¿Manachun Filisteo läducunäta Caftorpïta,
Aram läducunätañatac Kir lädupïta julaycälimulá imamá?
8“Chayurá chay juchasapacunäpa gubirnun
yaꞌa Tayta Diospa ñawilläćhümá cayan.
Jinantin allpäpïmá chincächishä.
Chaynu Jacobpa milayninwan lulayculpis
manam lluytachu camacaycüśhä.
9Maynümi trïgucta sirninchic
chaynümá Israel malcaca jinantin allpäman
chiꞌisha cananpä yaꞌa niycuśhä.
Chaynu captinpis rasun trïguca manamá jucllayllapis chincanꞌachu.
10Malcäpi lluy juchasapacunaca nipäcunmi:
‘Mana allinca manamá tupaycamäśhunchu nï ćhaycamäśhunchu’ nil.
Paycuna ispädawanmá wañupäcunꞌa.
Israel malca caśhan allin cananpämi nin11“Awari, chay muyun Davidpa palpüśha gubirnunta
yaꞌami śhalcachishä.
Laꞌaläśha paradïruncunacta allichäcänümá yaꞌa allichaycuśhä.
Pampaman muyüchisha caśhantamá śhalcachishä.
Punta caśhantanümari caśhan śhalcachishä.
12Chaynu lulaycuśhä Edom lädućhu quïdäcunäta,
jinaman punta timpu maquïćhu
lluy caśhan nasyuncunäta chalacaycälinanpämá” nil.
Chaynu quiquin Tayta Diosmari nin;
paymari chaynu lulacacunanpä lulaycunꞌa.
13 Tayta Diosmi nin: “Śhayämunmi timpucuna, cusichacta manalä camacaptin talpuy timpuña cananpä; chaynütac üba jaluytapis manalä camacaptin üba lantay timpuña cananpä. Ulꞌucunäpïpis üba apchïshacunamá jiꞌalpapämunꞌa; ulꞌunpalcücunäpïpis bïnucunamá unyapämunꞌa
14Israel malcätam prïsu puśhaśha caśhanpïta caśhan cutichimuśhä. Paycunam pampaman muyüchisha cäcunäta śhalcachipäcunꞌa. Jinalculmi chayćhu yaćhapäcunꞌa; übacunactapis lantapäculmi bïnuncunacta upyapäcunꞌa. Wirtacunaćhu talpupäculmi wayuynincunapïpis micapäcunꞌa.
15Cay Israeltamá quiquinpa allpanman tacyaycachishä; chay allpa uycuśhäcäpi manañamá imaypis wicapäśhachu canꞌa. Yaꞌa Tayta Diosmari niyá” nil.
Who We AreWhat We EelieveWhat We Do
2025 by iamachristian.org,Inc All rights reserved.
