Job 34 - Old Testament Quechua Wanca（QVW）

Job allintucuśhanpïtam Eliu anyapan

1Jinaman Eliu nin:

2“Am yaćhäcunaca limaśhäta uyalipämay;

am sumä alli-camacunaca tuquicta uyalipämay.

3Maynümi allunchic imanuy micuy caśhantapis tantian,

chaynümi linlinchicpis allin mana allin caśhantapis tuquicta tantian.

4Chayurá cayta sumäta licaycuśhun;

mayannin allin caśhantapis tantiaycuśhunꞌari.

5Job niyan: ‘Mana juchayu cayaptïpis

tincünïmannüchu manamá Tayta Dios licaycaman.

6Juchayümi cä niyalꞌa casquicuyämanmi.

Ima mana allinta lulayalpis nana-nanaytam aychäćhu apayá’ nil.

7“Má, ¿mayanmá Jobnuꞌa canman?

Payꞌa yacu upyäcänüllamá Tayta Diosta mana cäman ćhulayta ćhapaycun.

8Jobꞌa mana allin nunacunällawanmari apanacun;

juyu nunacunäwanmi pulipäcunpis.

9Pay ninlämi canpis: ‘Tayta Diospa munayninmannu

cawsay manamá imapäpis bälinchu’ nil.

10“Chayurá am yaćhayniyücunaca uyalipämay:

Tayta Diosꞌa manamá mana allincäta lulaycunmanchu;

sumä munayniyüca manamá mana tincüninmanꞌa lulaycunmanchu.

11Payꞌa lulaśhanchicmannümá pägaycun;

cawsaśhanchicmannümá tincüninman-cama uycun.

12Rasunpa, Tayta Diosꞌa manamá mana allinta lulaycunmanchu;

sumä munayniyüca manamá mayanmanpis śhalcuyanmanchu.

13¿Cay allpaca maquillanćhu cananpä mayanllapis niyculachun imatá?

¿Jinantin pachaca munayllanćhu cananpä mayanllapis ćhulayculachun imatá?

14Sïchuśh pay lluy nunacunäpïta Ispiritunta,

cawsay jäcaycuśhancäta cutichicuptinꞌa,

15jinantin nunacunäćha wañucuchwan;

lluyćha allpaman cutichwan.

16“Tayta Job, yaćhayniyu calꞌa uyaliycamayꞌari;

limaśhäta sumäta uyaliycuy.

17¿Tincüninmancama cäraycuyta ćhïniculꞌa

imanuypatá mandacü canman?

¿Chaychun cällanman-cama licaycü Tayta Diosta

juchachayanquiman imatá?

18Aśhta mandacücunätapis payꞌa

‘mana allin nunacuna’ niyanmá;

puydïcunätapis ‘juchasapacuna’ niyanmari.

19Maynu allin sumänin nunapis

paytá manamá imapis ucunchu.

Wacchactapis rïcuctapis chay cuscactamá pay licaycun.

Paypa camaśhallanmari lluy-lluypis cayan.

20Nunacunaca ñawi imchiycuyllaćhümá juclla wañupäcun.

Wicman-cayman pasanacuyalmá chincaculcan;

mana imanaycuśhallamá munayniyütucücunäpis chincapäcun.

21“Nunacunäpa cawsaynincuna Tayta Diospa ñawillanćhümi cayan;

imacunaćhu pulishantapis licayanmi.

22Mana allin nunacunäta manamá maynu tutapis,

sipultürapis pacaycunmanchu.

23Tayta Diosꞌa manamá achca timpulächu

nunacunäta cäraycunanpä licaycunan.

24Pay manamá tapucunanlächu mandacücunäta wicapananpäpis;

nïtac pudirninpä jucta ćhulaycunanpäpis.

25Nunacunaca ima lulaśhancunactapis payꞌa tuquictañamá yaćhaycun.

Tutanpa pampaman muyulcachilmi lluy camacaycülun.

26Mana allin lulaynincunamannümi,

lluy nunacunap ñawquin pay mućhuycachin.

27Paycuna ipanchälälinmari,

caminuncunamannüchu manamá pulipäcula.

28Chaymi wacchacunäpa, pishipacücunäpa ñacaynincuna

ayacuynincuna Tayta Dioscama ćhäla.

29Ñatac Tayta Dios upällacuycuptin ¿pimá imaninmanpis?

Pay pacacuycuptin ¿mayanmá taliycunmanpis?

Paypa ñawillanćhümari lluy malcacunapis nunacunapis cayan,

30mana allin nunacunaca mandaculcal

malcacta mana usuchipäcunanpä.

31“Am Job, Tayta Diosta niyanquichun: ‘Juchactam lulällá;

cananpi manañamá luläśhächu.

32Mana licaśhá juchá captinꞌa licaycachillämayꞌari.

Ima mana allinta lulälulpis manañaćh mastá lulaśhächu’ nil.

33Chaynu niyaptiquipis Tayta Dios ¿ampa munaśhayquimannüchun

uycuśhunqui imatá?

Ima nicuptiquipis paymi niycuśhunqui, manamá yaꞌachu.

Chayurá ima tantiaśhayquitapis má nimayꞌari.

34“Alli yaćhayniyücunaca,

alli-cama tantiayniyücunaca niycälimanꞌamá:

35‘Jobꞌa, ima nishantapis manam yaćhanchu;

uman chalaśhallantam limacun’ nil.

36Chayurá Job, mana allin nunacunänümá limayanqui.

Chaymi sumä-sumäta licaycuna cayanqui.

37Manamá mana allinllactachu lulaycunqui,

sinuꞌa jalutacuyanquilämi canpis.

Yaꞌacunap ñawquïmari Tayta Diospa cuntran

limayta ćhapayanquilä canpis” nil.