Jeremias 11 - Old Testament Quechua Wanca（QVW）

Tayta Diospa limalicuśhantam malcan mana cäsucunchu

1 Tayta Diosmi caynu niman:

2“Am Jeremias, cay limalicuśhäta Juda läducunätawan Jerusalenćhu yaćhäcunätam yalpalcachimunqui.

3Israelpa Tayta Diosninmi caynu nin: ‘Cay limalicuynïta mana cäsucücunaca mana allinpä licaycuśhamá capäcunꞌa.

4Awquilluyquicunaman chaynu limaliculá Egiptopïta julamulmari. Chay nasyunćhu awquilluyquicuna jïrru chulluchina urnućhünu cayalcaptinmari limaliculá: “Lluy nishäta cäsuculcaptiquiꞌa, chaynütac lluy camachishäcunacta lulaycäliptiquiꞌa nunäcunam capäcunqui; yaꞌañatacmi Tayta Diosniqui caśhä” nil.

5Chaynu cäsuculcaptiquiꞌa awquilluyquicunaman limalicuśhá tuqui-tuquicta wayuycachï allpactamari uycuśhä. Chay allpaćhümari amcunapis canan cayalcanqui’ ” nil.

Nimaptinmi: “Tayta Diosllay, chaynu cachun” nilá.

6Niptïmi Tayta Dios niman: “Lluy caycunacta Juda lädup malcancunaćhu, Jerusalenpa cällincunaćhu willacamuy cay nil: ‘Cay limalicuśhäta uyaliculcal lulayman ćhulaycäliy.

7Awquilluyquicunacta Egiptopi julamulmi canancama ćhuncay-ćhuncay “Cäsuculcay-cäsuculcay” nilá.

8Ñatac paycuna manam cäsuculcälachu nï uyaliycälilapischu. Aśhwanpa mana allin lumi śhunꞌunpa munaynintamá lulapäcula. Chay camachishá limalicuyta manamari cäsuculcälachu. Chaymi limalicuyćhu lluy nishan mućhuchicuycunacta paycunaman ćhaycachilá’ ” nil.

9 Tayta Dios nimantacmi: “Juda lädućhu cä nunacunaca, Jerusalenćhu yaćhäcunäwan yaꞌapa cuntrá limanaculcäśhantam yaćhälú.

10Awari, awquilluncunap mana allin lulaynincunamanmi cuticulcan. Nishäcunacta paycuna mana cäsucuyculmá taytachacunactaña alawayalcan. Awquilluncunaman limalicuśhäcäta Israel lädu nunacunäwan Juda lädu nunacunämari jalutacälälin.

11Chaymari paycunaman sumä ñacayta caćhamuśhä; chay ñacaypïta manamá ayiyta atipapäcunꞌachu. Masqui llaquipaycunäpä maynu-maynu ayacalcämaptinpis manamari uyaliycuśhächu.

12Jinaptïmi Juda lädup malcancuna, Jerusalenćhu yaćhäcunaca insinsiucta cañaycälishan taytachancunaman lipäcunꞌa. Chay ñacay ćhämuptin taytachancuna manamá salbaycuyta atipapäcunꞌachu.

13Má, am Juda lädup, achca malcayquicuna caśhannümari taytachayquicunapis achca-achca cayalcan. Jerusalenćhu achca cällicuna caśhancätanümá uycuna pataccunactapis achca-achcacta lulacälälinqui. Chayćhümari Baalpa insinsiucta pinꞌaypa cañaycuyalcanqui.

14“Chayurá Jeremias, cay malcäpi amaña mañacayämayñachu. Paycunapi amaña ayacayämayñachu nï ruygacayämayñachu. Ñacayćhu cayalcal ayacalcämaptin manañamari uyaliycuśhäñachu.

15“Cuyaśhá malcá, mana allin millachicuyllacta lulayal, ¿imactañamá alawana wasïćhu lulayan? ¿Japächaycapamäśhan aycha uycamäśhancächun mućhuchicuycäta manalcachinꞌa imatá? ¿Mana allincäćhu cayalchun cushicunlä canpis imatá?

16Yaꞌa Tayta Diosmari puntacta nilá: ‘Sumä lapisapa, tuquish-cama wayuyniyu ulïbusmi’ nil. Cananñatacmi ichá sumä-sumä suynaywan lapincunacta cañaycüśha; pallaynincunactapis paquiypa pawäśhä.

17“Yaꞌa sumä munayniyu Tayta Diosmari, am Israel läducunätawan Juda läducunäta ulïbustanu lantaycapäculac. Cananñatacmi ichá mana allincunacta lulapäcuśhayquipi cuntrayqui mućhuchicuyta caćhamuśhä. Taytacha Baalman insinsiucta cañaycapäcuśhayquiwanmari sumä piñälälichimanqui” nil.

Jeremiasta wañuchinanpämi limanaculcan

18Chaypïta ćhïnicünïcuna cuntrá limanaculcäśhanta Tayta Diosmi yaćhaycachimäla, licaycachimäla.

19Yaꞌañatacmi wañuchinanpä apaśhan mansu uwishnu cayälá. Manamá yaćhalächu cunträcuna: “Allin wayuysapa lantacta pampaman muyüchishun. Cay allpäćhu cäcunäpïta cuchüśhun, manaña mayanpis yalpalcunanpä” nil limanaculcäśhanta.

20Ñatac sumä munayniyu Tayta Diosllay,

am tincüninman-cama licaycü,

śhunꞌuctapis pinsaytapis tuquicta lisiycämi caycunqui.

Chaymi ampa maquiquiman lluyta ćhulaycamullá.

Cutichicul imanuypa mućhuycachishayquitapis licaycachillämayꞌari.

21-22Wañuchiymayta munä Anatot nunacunätam, jinaman “Tayta Diospi jinalla willacuyaptiquiꞌa wañuchishayquim” nil nimäcunätam, sumä munayniyu Tayta Dios nin: “Yaꞌami paycunacta mućhuycachishä. Müsucunämi gïrraćhu wañuchisha capäcunꞌa. Walaśh wamla chulincunam micuypïta wañupäcunꞌa.

23Mućhuycachiná muyuncäćhu Anatot malcaman sumä ñacaytamá caćhamuśhä. Paycunaćhu manamá jucllayllapis quïdaycunꞌañachu” nil.