1 Reyes 11 - Old Testament Quechua Wanca（QVW）

Mandacü Salomonpa walmincuna

1Ñatac Faraonpa wamla chulinwan mandacü Salomon casaracüśha cayalpis juc lädu nasyunniyu walmincunapis calatacmi. alawaytaña allacuycula.

6Chaynüpamari Tayta Diospa ñawpäninćhu mana allincunacta lulala. Manamá papänin Davidnüchu masïsu tacyala.

7Chay timpućhümi Salomon lulachila Moab läducunäpa millachicuy taytachan Quemospa uycunanta. Chay cala Jerusalenpa lädunćhümi. Chaynütacmi Amon läducunäpa millachicuy taytachan Molocpa uycunantapis lulachila.

8Chaynüllatacmi juc caśhta walmincunap taytachancunapäpis lulachipula. Chaymi paycuna taytachanta-cama insinsiucunacta cañaycapula, uywacunactapis uycapäcula.

9Israelcunap Tayta Diosninñatacmi Salomonpä piñacüla. Ishcay cutićhu payman licalilculmari,

10taytachacunacta manaña alawänanpä nila. Ñatac Salomonꞌa chay nishanta manamari uyaliculachu.

11Chaymi Tayta Dios nin: “Caynüña lulayaptiquiꞌa, nishätapis limalicuśhätapis manaña cäsucayämaptiquiꞌa mandacuyniquita ampïta quitalculmari sirbïniquiman uycüśhä.

12Am cawsaśhayquicamá papäniqui David-laycum manalä quitaśhayquichu. Chuliquitañam ichá mandaśhanpïta quitäśhä.

13Ñatac manam lluytachu quitäśhä; sinuꞌa juc ayllullactá mandacunanpä caćhaycapuśhämi. Caynu caćhaycapuśha nuná David-laycu, aclacuśhá Jerusalen-laycumari” nil.

Salomonpa cuntranmi śhalcapäcun

14Chaymi Salomonpa cuntran Tayta Dios śhalcachila Edom lädu mandacücunap milaynin Hadadta.

15Má, Edom nasyunwan David pilyapäcuptin cachacuncunap puydïnin Joab chayćhu wañücunäta pampamü lilmi Edom nunacunäta lluy camacaycüla.

16(Chay Edom malcaćhu lluy wayapacunäta wañuchinancamam Joab lluy israelcunäwan süta quilla capäcula.)

17Hadadñatacmi ichá uchuyllala cayal taytanpa sirbïnin Edom lädu nunancunawan Egipto nasyunta ayiculcäla.

18Madian lädupi yalapäcul Paran läduman ćhälälilmi chayćhu cä nunacunacta liwshinanpä nipäcula. Chaypi Egiptop mandacünin Faraonman ćhäluptinmi payñatac wasicunacta, micuycunacta, ćhaclacunactapis uycula.

19Chayćhu Hadad Faraoncäwan allinpä licaycuptinmi walmin Tahpenespa ñañanwan Hadadta casarächin.

20Cay Tahpenespa ñañan Hadadpa chulinta ishyacüluptinmi Genubatwan śhutichäla. Chay walaśhtam Faraonpa palasyunćhu wawincunactawan cuscacta Tahpenes yaćhachila, ishpichila.

21Chay Egiptoćhu Hadad cayalmi yaćhäla Davidwan pilyänincunap puydïnin Joabpis wañuculcäśhanta. Chaymi Faraoncäta nin: “Ama chaynu callaychu, malcäta cutïlläśhä” nil.

22Niptinmi Faraonca: “¿Imaman? ¿Imam cayćhu faltaśhunqui malcayquita cutiyänayquipä?” nin.

Niptinmi Hadad: “Manam imapis faltaytá faltamanchu. Ñatac cutïtam muná” nin.

23Chaypïta Salomonpa cuntranmi Eliadap chulin Rezonta quiquin Tayta Dios śhalcachila. Paymi Soba malcap mandacünin Hadad-ezer patrunninpïta ayicula.

24Jinaculculmi mana allin nunacunacta juntuycul puydïnin licalïla. Chay Soba malcaćhu nunacunäta David camacaycüluptinmari Damasco malcäman Rezon ayicula. Chay malcaćhümi mandacüninman licalïla.

25Chaynüpam Siria nasyunpa mandacünin yaycula. Salomon wañucunancamam israelcunäpa cuntran Rezon cala. Chaymi paypis israelcunäpa cuntran Hadad lulaśhancunaman jucllachacula.

26Chaynütacmi Salomonpa yanapänin Jeroboampis cuntran śhalcüla. Paymi Efrain caśhta Sareda malcayu Nabatpa chulin cala. Mamanñatacmi japanyäśha Zerua cala.

27Chaynu mandacü Salomonpa cuntran Jeroboam śhalcunanpä caymi cawsä cala: Salomonmi papänin Davidpa Malcan nishanta inti ishpimunan läducta pampatalcachil murälla aśhäśha cäcunäta wićhäla.

28Jeroboam sumä masïsu callpanchacü nunam cala. Chaynu allin lulaśhanta Salomon licalmi Josepa milaynincunaćhuJos 16.1, 4. luläcunäta licananpä ćhuläla.

29Juc muyun Jeroboam Jerusalenpi yalüśhanćhümi caminüćhu tincülun Silo malcayu Tayta Diospa willacünin Ahiaswan. Paymi muśhü cäpan ćhulapacüśha śhayämuña. Chay chunyäcäćhu ishcayllan cayalcalmi,

30Ahias muśhü cäpa ćhulacuśhanta ćhunca ishcayniyüman (12) laćhyäla.

31Jinalculmi Jeroboamta nin: “Cay ćhunca (10) parti ampämi canꞌa. Israelpa Tayta Diosninmari nin: ‘Salomonpa maquinpïta mandacuyninta jululculmi ćhunca (10) ayllucta anman uycuśhayqui.

32Salomonpäñatacmi juc ayllullacta caćhaycapuśhä, uywayní David-laycu jinaman jinantin Israelpi aclacuśhá Jerusalen malcallacta caćhaycapuśhä-laycu.

33Caynu lulaycuśhä Salomon ipanchaycamal Sidon läducunäpa mamachan Astoretta, Moab läducunäpa taytachan Quemosta, Amon läducunäpa taytachan Molocta alawaśhanpïtam. Jinaman papänin Davidnu munaśhämannu yaćhachicuynïta, camachicuynïta mana cäsucuśhanpïtamari mandacuyninta quitäśhä.

34Ñatac aclacuśhä uywayní David lluy nishäcunacta, camachicuynïcunacta cäsucuśhanpïtamari Salomon cawsaśhancama mandacuyninpi nï wicapaśhächu.

35Chulin mandacuyaptinñam quitalcul ćhunca ayllucunacta anman uycuśhayqui.

36Chulinmanꞌa jucllay ayllullactañam mandacunanpä caćhaycuśhä, Jerusalenćhu uywayní Davidpa achquinnu cayäca mana imaypis chincananpä. Chay malcaćhu yaćhanäpämari aclalá.

37“ ‘Canan amta Israelpa mandacüninpä ćhulaptïmi śhunꞌuyqui munaśhanmannu mayantapis maquiquićhu cachinquiman.

38Sïchuśh uyalicul lluy nishäcunacta, camachiśhäcunacta cäsucamaptiquiꞌa, jinaman śhunꞌüpänu uywayní Davidnu yaćhachicuynïcunacta lulaycuptiquiꞌa yanapäśhayquim. Jinaman Davidpa milaynincuna mandananpä ćhulaśhänümi milayniquicuna mandananpä tacyaycachishä. Israel malcactapis maquiquimantacmi ćhulaycuśhä.

39Chayurá Davidpa milayninta llaquimanmi ćhulaycuśhä, masqui pasaypipä mana cayaptinpis’ ” nil.

40Chayta Salomon yaćhälulmi Jeroboamta wañuchiyta munala. Ñatac Egiptoćhu Sisac mandacuśhanmanmi Jeroboam ayicula. Chayćhümi Sisac yaćhala Salomon wañucunancama.

Salomonmi wañucun 2Cro 9.29-31

41Salomonpa waquin cawsaynincunapi, lulaśhancunapi, sumä yaćhayniyu caśhancunapïpis isquirbïsha cayan Salomonpa librun nishanćhümi.

42Jerusalen malcäpïtam jinantin Israelta Salomon mandala tawa ćhunca (40) wata.

43Wañucuptinñatacmi papänin pampaläśhan Davidpa Malcan nishan läduman pampapäcula. Paypa pudirnin chulin Roboammi mandacüca cala.