1Tayta Diosmi nin:
“Calu lamarpa patanćhu cäcuna, upälla capäcuy.
Am malcacunaca, muśhüpïta callpanchaculcay.
Cayman aśhuycapämul limapäcuy
cäraycüca uyaliycunanpä listuñamá cayan.
2“Mayantapis llallilcul sumä cä mandacücäta,
¿mayanmá inti ishpimunan lädupïta śhalcachimun?
¿Mayanmá nasyuncunäta mandacücäpa maquinman
ćhulaycul lluy mandacücunap puydïninpä ćhulaycun?
¿Pimá mandacücäta ispädanwan pulbuy-pulbuyta camacaycachin?
¿Mandacücäta mayanmá flïcha ćhächicunwan päśhactanu
wicman-cayman pälïcaćhachinanpä yanapan?
3Mandacüca mana pulishan caminucunap liyalpis
payꞌa ćhïnicünincunap ipantam sumä atiyan.
4¿Mayantá chaynu cananpä lulaycuyan?
¿Allaycuyninpïta lluypis chaynu cananpä mayanmá nila?
Yaꞌa Tayta Dios allaycüca
camacäcällamari chaynu lulaycuyá.
Yaꞌallamari chaynu lulaycüca cayá.
5“Caycunactam calu lamarpa patanćhu cäcunaca
manchacuywan licapäcun;
cay allpäpis manyanpi manyancama
chucchupäculmi juntunacaycälil śhapämun.
6Quiquin-pulacunam yanapänaculcan;
ayllu-pulam, bisinu-pulam callpanchanaculcan.
7Ilupi luläcämi illaypi aläja fundïcäta callpanchan;
martilluwan luläcämi jïrru tacäcäta:
‘Allinmi lulaśhayquica cayan’ nin.
Chaynu lulayculmi taytachan mana cućhpananpä
sumätalä tacyaycachin.
8“Am Israelñatacmi yaꞌapa sirbïní canqui;
am aclacuśhá Jacobmari apanacuśhá
Abrahampa milaynin canqui.
9Yaꞌami cay pachäpa sapincunapïtalä amta puśhamulac;
calu-calu malcapïtalämari ayamulac:
‘Anmi sirbïní canqui; aclaycucmi;
manamá ipanchacchu’ nil.
10Chayurá ama manchacuychu;
yaꞌamari amwan cayá.
Ama jucmanyaychu;
yaꞌamari Tayta Diosniqui cayá.
Yaꞌami callpacta uycuśhayqui;
imaypis yanapaycuśhayquimá;
allï maquïwanmá masïsucta puśhaycuśhayquipis.
11“Licay, amcunapä cuntrayqui piñacücunämi
pinꞌayćhu pantäśha quïdapäcunꞌa.
Amcunacta ćhïnicücunämi mana cäman
muyuchisha camacapäcunꞌa.
12Cuntrayqui cäcunäta ashilpis manañamá talinquichu;
amcunawan pilyä munäcunaca pampaman
muyüchisha, mana cäñamá capäcunꞌa.
13Yaꞌa Tayta Diosniquimari allï maquiquipi chalalayac.
Chaymi nic: ‘Ama manchacuychu;
yaꞌami yanapaycunacpä cayá’ nil.
14“Masqui am Jacob, culunülla cayalpis,
ama manchacuychu.
Am Israel malca, ashllaylla cayaptiquipis,
yaꞌami yanapaycüniqui cayá.
Yaꞌa Tayta Diosmari libraycüniqui cayá;
yaꞌami Israelpa Chuya Diosnin cayá.
15Amcunacta muyülächic sumä
muśhü wipyacumannümá.
Chaymi ulꞌunu cä ćhïnicüniquicunactapis
jaluypa pawalcul pulbuman muyüchinqui;
tacsha ulꞌunu cäcunätapis amumanñamá muyüchinqui.
16Waywachiptiquimá waywaca apacunꞌa;
lücu waywämi wicman-cayman wicapälunꞌa.
Amñatacmi ichá Tayta Diosćhu cushicunqui;
Israelpa Chuya Diosninćhu alawacunqui.
17“Llaquisha cäcunaca, pishipacüśha cäcunaca
yacucta ashipäcul manamari talipäcunchu;
yacupïmi allunpis chaquïshaña cayalcan.
Yaꞌa Tayta Diosñatacmi uyaliycuśhä;
Israelpa yaꞌa Tayta Diosninꞌa manamá unꞌaycuśhächu.
18Ulꞌucunäćhümi mayucunacta paćhyachimuśhä;
pampacunäćhümi pucyucunacta licalichimuśhä;
chunyä chaquicunäćhümi ućhacunacta licalichimuśhä;
chaqui allpacunäćhümi yacucunacta licalichimuśhä.
19Chunyä chaqui ulꞌucunäćhümá wiñachimuśhä:
cedrocunacta, acaciacunacta,
arrayancunacta, ulïbuscunacta,
ciprescunacta, pinocunacta, boje nishancunactapis.
20Chayćha quiquin Tayta Dios
lulaycuśhanta licapäcunꞌa, yaćhapäcunꞌa;
Israelpa Chuya Tayta Diosnin
lulaśhantamari tantiapäcunꞌa” nil.
21Jacobpa mandacünin Tayta Diosmi nin:
“Má, limalcunanpä taytachacunäta apamuy;
ima lulayta yaćhapäcuśhantapis, má niycamächunꞌari.
22Má, una-unay timpucunapi
ima pasaśhancunacta niycuchunꞌari
rasun ütac mana rasun caśhantapis tantiaycunapä.
Chaynütac śhamü timpucunaćhu
imacuna pasanantapis niycuchunꞌari
imacuna śhamunantapis yaćhaycunapä.
23Má, willaycälimayꞌari śhamü muyuncunäćhu
imacuna pasanantapis rasunpa munayniyu
taytacha caśhayquita yaćhapäcunäpä.
Imallactapis lulaycäliyꞌari allin ütac mana allinllactapis,
chaynüpa licapayllaman camapäcunäpä ütac manchaculcänäpäpis.
24Rasunpa, amcuna manamá imapischu capäcunqui;
imactapis manamá lulayta atipapäcunquichu.
Amcunaman chalapacücá pasaypi millachicuypä licaśhamá cayalcan.
25“Nurti lädupi yaꞌa śhalcachimuśhäcämi śhayämunña;
inti ishpimunan lädupïmari yaꞌacta ayacamanꞌa;
wacuy luläca mitucta jaluśhannümari
puydïcunäta, mandacücunäta jalutacunꞌa.
26Caycuna pasananpä
¿puntapïta mayantan willacula?
¿Mayantan caycuna rasunpa caśhanta
yaćhanäpä unaypïta nila?
Manamá mayanllapis nï imallactapis nilachu.
27“Caycunapïta Sionman yaꞌami puntacta yaćhachilá;
Israelman alli willacuyta willacunanpä yaꞌami caćhalá.
28Chay taytachacunäpïta manamá pillapis yaćhayniyu calachu;
tapuycuptí manamá jucllapis yaćhaycachimälachu;
tapuycuptí manamá mayanllapis tapucuynïta niycamäní calachu.
29Chay taytachacunaca lluy-lluypis mana bälïcamamá;
imallactapis manamari lulaycälinchu;
chay taytachacunaca waywanüpis yanꞌal-yanꞌalmá” nil.
Who We AreWhat We EelieveWhat We Do
2025 by iamachristian.org,Inc All rights reserved.
