Proverbios 16 - Old Testament Quechua Wanca（QVW）

1Nunacuna imactañapis lulayta munanmanmá;

Tayta Diosñatacmi lulaśha mana lulaśha cananpäpis camachin.

2Nunäpa quiquillanpá ima lulaśhanpis allinmá cacuyan;

Tayta Diosñatacmi ichá ima pinsaywan lulaśhantapis cäraycun.

3Imacta lulanayquipä cayaptinpis Tayta Diospa

maquinman ćhulaycuptiquiꞌa lluy lulay munaśhayquimá lulacacunꞌa.

4Lluy imactapis Tayta Dios lulaycun pay munaśhannu cananpämá;

juyu mana allin nunäpis mućhuycachinan muyuncäpämá lulaycuśha cala.

5Nunatucücunäta Tayta Dios millachicunmá;

mana mućhuycachisha manamá quïdanmanchu.

6Llaquipaywan, chalapacuna caywanmi ima juchactapis pampachaycunchic;

Tayta Diosta manchaculmá ima mana allinpïpis nunaca japächacunchic.

7 Tayta Dios munaśhannu cawsä nunacá

aśhta ćhïnicünincunawanpis allinpamá caycälin.

8Mana allincunallawan alli cäniyu caypïtá

mas allin tincüllanman mana ingañacullal ashllactapis talishanchiccämá.

9Nunaca imanuy cawsananpäpis śhunꞌunćhümá tantiacun.

Tayta Diosñatacmi ichá imanuy cananpäpis camachin.

10Tayta Dios partipïmá mandacüca liman;

cäraycuśhanćhu manamá shimin pantanmanchu.

11 Tayta Diospamá tincüllanman cä balansaca, tupucuca;

lluy ima tupucupis, luncupis paypa lulaśhallanmari.

12Mandacüca mana allin lulaycunacta millachicunmanmi;

paypa gubirnunꞌa tincüllanman licaycuymi.

13Imam cäcällacta limäcunätamá mandacüca allinpä licaycun;

rasuncällacta limäcunätamá mandacüca cuyan.

14Mandacücäpa piñacuyninꞌa wañuchicuytam apamun;

yaćhayniyu nunäñatacmi ichá manalcachinman.

15Mandacücäpa tuqui cushicuy cäranꞌa tuqui allin cawsaytamá camalaycachin;

llaquipäcuyninꞌa tamya timpućhu tuqui tamyanümá.

16Yaćhaycätamá ürupïpis masta ashinanchic;

tantiaycätamá illaypïpis masta ashinanchic.

17Allin cawsayniyüca mana allin lulaycunapïta aśhucunmá;

cawsayninta salbaycuyta munäcá maypa pulishantapis tuquictamá licacuycun.

18Nunatucücäta mana allincällamá atiyan;

yaćhätucüca pampamanmá muyun.

19Nunatucücunäwan ima cäcunätapis aypunacuypïtá

mas allin wacchacunäwan imallactapis aypunacuymi.

20Limapäśhanta uyalicücá allinmi caycunꞌa;

Tayta Diosman chalapacücá sumä cushicuchun.

21Yaćhayniyücäta “allin tantiayniyu” nipäcunmi;

tuqui limayniyüca yaćhaycätamá wiñachin.

22Allin tantiayca cawsachicü yacunümá;

luclucunäpa yaćhätucuyninꞌa pasaypi luclu caymá.

23Yaćhayniyüca sumä tantiaywanmi liman;

shiminwanmá yaćhayta milachin.

24Tuqui limayca urunwaypa mishquinnülämá,

cawsaycäpä allinninmá, aychanchicpä jampinmá cayan.

25Nunacunäpa pulishan caminuca quiquillanpá allinnümá cayan;

ñatac chay caminu wañuycämanmá ćhäyächin.

26Lulapacücäpa micanayninmi masta lulachin;

micuyta munayninmi jicutaycun.

27Juchasapa nunaca mana allincällapïmá wañupacuyan;

shiminpis ninanümá walayan.

28Juyu nunaca pilyayllactamá śhalcachin;

waśha limä nunaca, apanacü pulactapis laquinacachinmá.

29Juyu nunaca apanacuśhanpa śhunꞌuntapis suwaycülunmá;

jinalculmi mana allin caminuman juluycun.

30Mana allinta lulay munäca ñawinwanmá imchipayan;

mana allincäta lulälulñatacmi shiminta cuyuchin.

31Allin tincuśhallanmannu cawsäcäpá, rasuncämannu cawsäcäpá,

curunanu primiyunꞌa yaśhayänancama cawsaycämi.

32Balintitucuypïtá mas allin ñacayta piñacuymá;

malcacunacta maquinchicćhu uywaypïtá mas allin quiquinchicta sujitacuymá.

33Nunaca chüsapäcuptinpis Tayta Diosmá

imanuy cananpäpis camachin.