Job 5 - Old Testament Quechua Wanca（QVW）

1“Job, maynu ayaycaćhaptiquipis ¿mayanshi má uyaliycuśhunqui?

¿Mayannin anjilman aśhuycunquimanmá?

2Rasunpa, luclucunätá sinticuyninmi camacaycun.

Mana tantiayniyücunätá sumä wañupacuyninmi pampaman muyuchin.

3Lucluca sapichacüśhanu allin tacyapacuśhanta licalämari.

Ñatac manaläpis unaytam mana allinman muyülun.

4Chulincunapapis manam mayanpis salbaycünin canchu.

Cäraycücunäpis manam tincüllanmanchu licaycälin.

Manamá mayanpis śhalcünin caycunchu.

5Lluy cusichancunactapis juccunam apaculcan.

Aśhta caśhacunap ćhawpincunapïtapis micuypi wañuyänümá julülälin.

Yacupi wañuyänümá chay cänincunapi wañupacuyalcan.

6¿Mana allinca yanꞌalpïchun yalamun imatá?

¿Ñacaycäpis pampäpïchun wiñayämun imatá?

7Ninap sumbaynin paćhcaśhannümari

nunäpis quiquinpa mana allinninta ashicun.

8“Má, sïchuśh amnu pasayalꞌa

Tayta Diosmanmi yaꞌa aśhuycüman,

paypa maquinmanmi yaꞌa ćhulacuycüman.

9Payꞌa sumä jatućhä mana tantianacunactamá lulaycun.

Fintaytapis mana atipana äśhalayllaman

camanacunactamari lulaycun.

10Paymari jinantin pachäman tamyachimun.

Lluy allpämanmi yacucta chächun.

11Paytacmi mana nunatucücunätapis altuman juluycun.

Llaquicuyćhu cäcunätapis ñawillanćhümá caycachin.

12Ñatac artillanwan imactapis lulananpä cäcunätá,

mana cämanmi muyüchin.

Lulaśhancunäta pampamanmari licalïchin.

13Paymari yaćhätucücunätá

quiquinpa yaćhayllanćhu palpachin.

Juyucunäpa lulay munaśhancunactapis

mana cämanmi muyuchin.

14Muyunpapis tutapaycällamá chimïlun.

Ćhawpi muyunpis tutapäćhünümi taplaypa puliyalcan.

15Chaynu nunacunäpïtamari mana cäniyücäta

Tayta Dios libraycun.

Chaynu juyucunäpa maquinpïtamari salbaycun.

16Chaymari mana cäniyücunaca Tayta Diosllapi śhamunanta alcaycälin.

Juyu nunacunäpa shimintam upällachin.

17“Ñatac Tayta Dios mućhuycachishan nunäpa maynu cushicuymá.

Chayurá lawćhaycuśhuptiqui sumä munayniyu Tayta Diosta amari jitapaychu.

18Payꞌa ishyayta uyculpis quiquintacmi jampiycun;

maquinta ćhulayculpis quiquintacmi allinyaycachin.

19Sasachacuyniquipi imaypis libraycuśhunquimá;

mana allinca ćhäśhunayquita manamá munanꞌachu.

20Micuy wanaćhüpis wañuycäpi libraycuśhunquimá.

Pilyu captinpis ispädapi salbaycuśhunquim.

21Jamuyaśhüniquicunap shimincunapïta

licaycuśhamá canqui.

Ñacaycuna śhamuptin manañamá manchacunayqui canꞌañachu.

22Pampaman muyüchisha caypïpis,

micuy wanapïpis asicunquiñamari.

Chucaru juyu uywacunactapis manañamá manchacunquiñachu.

23Ćhaclayquicunaćhu lumicunäpis manañamá iridaycaćhaśhunquiñachu.

Chucaru juyu uywacunäpis amwan jawcañamá caycunꞌa.

24Wasiquićhu jawcayaytam taliycunqui.

Lluy ima cäniquicunapis manañamá jucllayllapis faltaycunꞌañachu.

25Milayniquicuna achca-achca caśhanta licaycunquimá.

Jinantin pachäćhu alli-alli jaćhacunänümari caycunꞌa.

26Yaśhayälulpis callpayülämi wañucunqui.

Timpullanćhu lutüśha trïgunümá apaycuśha canqui.

27Lluy caycuna chaynu caśhanta cay cawsaynïćhümá yaćhapäcú.

Chayurá uyalicul quiquiqui yaćhaycuy chaynu rasunpa caśhanta” nil Elifaz nin.