2 Cronicas 10 - Old Testament Quechua Wanca（QVW）

Israel caśhtacunaca ishcaymanmi laquinacun 1Rey 12.1-24

1Jinantin israelcunämi Shiquem malcaćhu juntunacälälila Roboamta mandacüpa ćhulapäcunanpä. Chaymanmi Roboampis lila.

2Chaytam yaćhäla Nabatpa chulin Jeroboam. Paymi mandacü Salomonpïta ayïninwan Egiptoćhu yaćhala.

3Chaymi Jeroboamta ayachimuptin israelcunäwan cusca Roboamman lipäcula. Chayćhümi Roboamta nipäcun:

4“Taytayqui sasa-sasa yüguwanlämi ñacachipämäla. Chay llasä-cama, sasa-cama yüguwan ñitichimäśhanpïtari canan jacyalpälichillämay. Chayćha am mandacünïta sirbiycälishayqui” nil.

5Niptinmi Roboam: “Quimsa muyunpïtañam cutipämunqui” nin.

Niptinmi nunacunaca cuticulcäla.

6Jinalculmi mandacü Roboam papänin Salomon cawsayaptinlä sirbïnin cä yaśhancunacta tapucula: “¿Chay nunacunäta imanïmanmi?” nil.

7Niptinmi yaśhacunäñatac nipäcun: “Cay malcacta yanapaycul tuqui shimillayquiwan niycuptiquiꞌa, paycuna wiñaypämi sirbiculcäśhunqui” nil.

8Ñatac chay yaśhacunaca limapäśhanta Roboam mana uyalicuyculmi, cusca ishpipäcuśhan wiñay-masin sirbïnincunacta tapucuyan:

9“¿Imactatan chay nunacunäta nïman? Paycunamari nipäman: ‘Taytayqui sasa-cama yüguwan ñitichimäśhanpïta jacyalpälichillämay’ ” nil.

10Niptinmi nipäcun: “Chay sasa-cama yügu ñitiläśhancunacta jacyalpachinanpä mañacücunätam ninqui: ‘Papänïpa wiꞌawninpïtá, uña dïdümi mas tita-titalä canpis.

11Papäní sasa-cama yüguwanmi ñitichipäcuśhulanqui; yaꞌa mas-mas sasanninwanlämi ñitilpachishayquipis. Papäní sumballawanmi asutipäcuśhulanqui; yaꞌañatacmi ichá jïrru puntayu asutiwanlä camacaycälishayquipis’ ” nil.

12Chaypïta nishanmannu quimsa muyunca ćhämuptinmi, Jeroboam lluy nunacunäwan caśhan cutipäcula mandacü Roboam caśhancäman.

13Chayćhu mandacü Roboamñatacmi yaśhacunaca limapäśhanta mana cäsucuycul nana-nanay shimiwanlä niycülunpis.

14Chay müsucunaca limapäśhanta cäsucuyculmari nin: “Papäní sasa-cama yüguwanmi ñitichipäcuśhulanqui; yaꞌa mas-mas sasanninwanlämi ñitilpachishayquipis. Papäní sumballawanmi asutipäcuśhulanqui; yaꞌañatacmi ichá jïrru puntayu asutiwanlä camacaycälälishayquipis” nil.

15Chaynu nilmi malcaca mañaculcäśhanta mandacüca mana awnilachu. Chaynu pasananpä Tayta Diosmi munala, Nabatpa chulin Jeroboamman nishanta lulaycunanpä. Chay Silo malcayu willacü Ahiaspamari Jeroboamta nila.

16Chaynu mandacü Roboam mana uyalïtucuptinmi israelcunaca nicuyalcan:

“Davidwan manañamá imactapis lulananchic canchu.

Isaipa chulin mandacüninchic cananta manañamá munanchicchu.

¡David ayllucuna, aylluyquićhu mandacalcämuy!

¡Israelcunaca, wasinchicta-camaña cuticuśhun!” nil.

Nilculmi wasinta-cama lluy liculcäla.

17Roboamñatacmi Juda lädu malcacunäćhu yaćhä Israel caśhtacunäpä mandacüllanña cala.

18Chaypïta mandacü Roboam lulänincunap licänin Adoram nunanta Israel caśhtacunäman caćhaptinmi, lumi tamshaywan wañülächila. Jinaptinmi mandacü Roboam carritanman mana-mana ishpiculcul Jerusalenta ayicula.

19Chaynüpam Israel caśhtacunaca Davidpa ayllunpïta laquicüśha canancamapis cayalcan.