Daniel 3 - Old Testament Quechua Wanca（QVW）

Ürupïta śhalcächishacta alawapäcunanpämi nin

1Chaypïtam mandacü Nabucodonosor ürupïta jatun-carayta śhalcachila alawapäcunanpä. Altunmanmi ishcay ćhunca anćhishniyu (27) mitru cala; anchunmanñatacmi ishcay mitru ćhawpin (2.5) cala. Chaytam Babiloniaćhu cä Dura nishan pampaman śhaycachisha cananpä nila.

2Jinalculmi mandacü Nabucodonosor ayachimula malcap sumä puydïnincunacta, quija licaycü puydïcunäta, cachacuncunap puydïnincunacta, fiscunäta, yaśhancunacta, illay licaycücunätapis; awari jatućhaćha malcacunap lluy puydïnincunactamari chay jatun śhalcachishanca ishpichishan fistaman śhapämunanpä ayachila.

3Chaymi chay nasyunćhu chay lluy puydï nunacunaca mandacü Nabucodonosor jatun śhalcachishanpa puntanman juntunaculcäla.

4Chayćhümi camachishancäta callpa-callpawan willacüca nin: “Jinantin malcacuna, nasyuncuna, imaymana limayta limäcuna sumäta uyalipämay.

5Curnitillacunacta, quïnacunacta, uchuy arpacunacta, jatun arpacunacta, sampüñacunacta, tucanapä juc cäcunactapis tucalpamuptinmi mandacü Nabucodonosor śhalcachishanpa puntanman amcuna uyshucaycälil alawapäcunqui.

6Ñatac mayanpis mana uyshuycücá, mana alawaycücá, chay ürallam nina walayä jurnuman jitalpüśha canꞌa” nil.

7Chaymi chayćhu cä malcacunäpi, nasyuncunäpi, imaymana limayta limä nunacunaca lluy tucanacunacta tucaśhanta uyalïlälil mandacü Nabucodonosor śhalcachishanman uyshuycapäcula, alawapäcula.

8Ñatac waquin yaćhayniyu cä Caldeo läducunämi Juda lädu nunacunaca mana alawapäcuśhanta tumpapäcula.

9Chaymi mandacü Nabucodonosorta nipäcula: “¡Mandacü taytallá, wiña-wiñaypä cawsachun!

10Anmi camachilanqui curnitillacuna, quïnacuna, uchuy arpacuna, jatun arpacuna, sampüñacuna, jinaman juc tucanapä cäcunäpis tucalpämuptin ürupi cä śhaycachishayquiman uyshuycälil alawapäcunanpä.

11Ñatac mayanpis mana uyshuycücá, mana alawaycücá, chay üralla nina walayä jurnuman wicapalpüśha cananpämá nilanqui.

12Mandacü taytallay, chay camachishayquita Babiloniap malcancunaćhu puydïninpa ćhulaycuśhayqui Israel lädu Sadrac, Mesac, Abed-negom mana cäsuculcanchu. Ürupi śhalcachishayquimanpis, taytachayquicunamanpis manamari uyshuycälinchu nï alawapäcunpischu” nil.

13Niptinmi Nabucodonosor sumä piñacülul Sadracta, Mesacta, Abed-negocta puśhapämunanpä nila. Chaymi chay üralla mandacücäman puśhälälimun.

14Chayćhümi mandacü Nabucodonosor nin: “¿Rasunpachun am quimsayqui, taytachäcunamanpis, śhalcachishämanpis mana uyshuycapäculanquichu nï alawapäculanquipischu?

15Canan, curnitillacuna, quïnacuna, uchuy arpacuna, jatun arpacuna, sampüñacuna, tucanapä juc cäcunäpis tucalpämuptin ürupi cä śhalcachishäman uyshuycälinayquimá, alawaycälinayquimá. Mana cäsuculcaptiquiꞌa chay ürallam sumä nina walayä jurnuman wicapalpüśha capäcunqui. Maquïpïta, ¿mayan dioscunamá salbaycälishunquiman?” nil.

16Niptinmi Sadrac, Mesac, Abed-nego nipäcun: “Caypïta manañam imactapis niycälinacñachu.

17Sirbipäcuśhá Tayta Diosní, sumä walayä nina jurnupïtapis, am mandacücäpa maquinpïtapis libraycälimanmanmi.

18Masqui mana librapämänan captinpis mandacü taytallay, diosniquicunacta manam alawapäcuśhächu, nï ürupi cä śhalcachishayquimanpis uyshuycapäcuśhächu” nil.

19Nipäcuptinmi Sadracpa, Mesacpa, Abed-negopa sumä-sumä Nabucodonosor piñacüluptin cäranpis pucayacülun. Jinalmi nicuyan: “Anćhish cuti mastalä jurnucta sumä caldalcachipämuy” nil.

20Nilculmi sumä-cama cachacuncunacta nin: “Sadracta, Mesacta, Abed-negota ćhänaycul sumä walayä jurnuman wicapalpäläliy” nil.

21Niptinmi chay quimsan müsucunäta ćhänaycul nina walayäcäman jitalpaycälälila müdanantinta, llanquintinta, uma watacuntinta-cama.

22Ñatac mandacüca nishannu jurnuca sumä-sumä caldächisha cayalmi Sadracta, Mesacta, Abed-negocta, jitaycü cachacucunäta caldayca wañüchila.

23Chay quimsa müsucunäñatacmi sumä-sumä walayä jurnuman ćhänäśha jiꞌacalpälin.

24Chayćhümi mandacü Nabucodonosor äśhalayllaman camäśha, śhalcuculcul puydï yanapänincunacta nicuyan: “¿Manachun quimsa nunallacta jurnuman jitalpulanchic imamá?” nil.

Niptinmi paycuna: “Mandacü taytay, quimsa nunallactamari jitalpulanchic” nicuyalcan.

25Niptinmi mandacüca: “Yaꞌa licayá tawa nuna mana ćhänäśha-cama puliyalcätam. Paycuna mana imanaycuśhallamari ninap ćhawpinćhu puliyalcan. Chay jucnin nuna diosnümi cacuñäpis” nil.

26Nilculmi Nabucodonosor nina walayä jurnup puncunman aśhuycul ayala: “Sumä munayniyu Tayta Diosta sirbï Sadrac, Mesac, Abed-nego yalapämuy” nil.

Niptinmi quimsa müsucunaca nina walayäcäpïta yalapämula.

27Chayćhümi malcap puydïnincuna, quija licaycücuna, cachacucunap puydïnincuna, mandacücäpa puydï yanapänincunapis aśhuycapäcula ninaca mana imanaycuśhantapis licä. Manamá jucllay ächallanpis cashpaśhachu caña. Müdanancunapis manamá lupañächu, nï lupa-lupallapis aśhnapäcuñäpischu.

28Chayćhu Nabucodonosormi nin: “Sadracpa, Mesacpa, Abed-negopa Tayta Diosnin altuman juluycuśha cachun. Paymi sirbïnincunacta libraycunanpä anjilninta caćhamula. Paycuna Tayta Diosllanman chalapaculmi yaꞌa nishätá mana cäsuculcälachu. Masqui wañuchisha canan captinpis juc dioscunactá manamari sirbiycälinchu nï alawaycälinchu.

29Chaymi yaꞌa camachí: Mayan malcapis, nasyunpis, ima limayta limäcunäpis Sadracpa, Mesacpa, Abed-negopa Tayta Diosninpa cuntran limäcá uchuy-uchuyllaman ticshïsham canꞌa. Wasincunapis amucunacta wicapanapä cananmanmi muyunꞌa. Cay libraycü Tayta Diosninnuꞌa manamá mayan diospis juc canchu” nil.

30Chaypïtam mandacü Nabucodonosor Sadracta, Mesacta, Abed-negocta ćhulala Babiloniaćhu cä puydï malcacunap puydïnin capäcunanpä.