1Tayta Diosllay, mañacuylläta uyaliycallämay.
Ayacuylläpïta amari pacacuycuychu.
2Uyaliycallämayꞌari yanapaycallämayꞌari.
Llaquicuynïcunamá manaña jawcactachu cachiman.
3Ćhïnicünïcunap shiminta uyalishäca,
mana allin nunacunaca ñacachipämäśhancämari chucchuchipäman.
Sumä ñacaycunäwanmá ñitïlächiman.
Sumä piñäläliśhamá aticaćhapäman.
4Śhunꞌüpis sumä-sumäñamá tic-ticyayällan.
Wañuycäta manchacuycämá intuyäman.
5Sumä-sumä chuchuycämá ñitïlläman.
Manchacuypïmari catcatayällá.
6Chaymi ní: “Ulpaynüpis laplayu maynülä licalïlüman.
Chayurá jamaycuyta talinäcamaćh pälicüman.
7Calu-caluctaćh ayicüman.
Chunyäcäćhüćha yaćhacamüman. Selah
8Sumä-sumä waywäpïtawan lücu tamyäpïtamá
mana-mana ayicüman” nil.
9Tayta Diosllay, paycunacta camacaycüluy.
Limaynintapis pantachiy.
Malcaćhu piñanacuycunallawan pilyaycunallañamá muyuyan.
10Tutay muyunmi murällacta muyupayalcan.
Malcap ćhawpinćhu mana allin lulaycällawan juyu lulaycunallañamá timpuyan.
11Mana allincällañamá muyuyan.
Läsancunaćhüpis ingañacuycunällawan ñacaycunällañamá
mana camacaycüña cayan.
12Sïchuśh ćhïnicüní palamaptinpis awantaycümanćha cala.
Cuntrá uyshulächimaptinpis pacacümanćha cala.
13Ñatac am quiquin puliwshï-masïlämá,
śhunꞌú tincuśhancälämá,
14cuscanchic imactañapis willanacuśhanchiccalämá,
jinaman Tayta Diospa alawana wasinpa ćhawpinćhu puliwshï-masïlämá
chaynüta lulayämanqui.
15Chay ćhïnimänïcunactari wañuyca juclla chalächun.
Cawsayällacta allpäpis juclla millpucalpuchun.
Paycunap śhunꞌunćhu mana allincunällañamari winalayan.
16Yaꞌañatacmi ichá Tayta Diosta mañacuśhä.
Tayta Diosmi yaꞌactá salbaycamanꞌa.
17Tutay muyunmi
mañacuyá, ruygacuyá.
Payꞌa uyaliycallämanꞌamá.
18Masqui maychica ćhïnicünïcuna
cayaptinpis libraycamanꞌamá.
Pilyapïtamá mana imanäśhallacta libraycamanꞌa.
19Wiñay simpri cawsä Tayta Diosmá
uyaliycamal uyshulächinꞌa.
Chay nunacunaca manamá wanaculcanchu
nï Tayta Diostapis manchaculcanchu. Selah
20Śhunꞌun tincuśhan allin nunamanpis maquintamá ćhulälun.
Limaliculcäśhantapis jalutacülunmá.
21Limaynincuná tuqui mishqui-mishquillamá.
Śhunꞌunćhüñatacmi ichá pilyay munayllaña winalayan.
Limaynincuna asaytinu llampulla cayalpis
sumä afiläśha ispädanümá cayan.
22Sumä llaquicuyniquicunacta Tayta Diospa maquinman ćhulaycuptiqui
paymá tacyaycachishunqui.
Cäsucünin nunantá cućhpäśhacta manamá imaypis caćhaycunꞌachu.
23Am Tayta Diosllämá
nuna wañuchicücunätawan ingañacücunäta
sipultüraman wicapalpülunqui.
Manamá ćhawpi cawsaynincamapis ćhäpäcunꞌachu.
Yaꞌañatacmi ichá amllaman chalapacú.
Who We AreWhat We EelieveWhat We Do
2025 by iamachristian.org,Inc All rights reserved.
