1Yalpay, müsu cayniquićhu lulaycüniqui Tayta Diosta,
mana allin muyunca manalä ćhämuśhancama,
“cawsayca manañam mishquinñachu”
ninayqui wata manalä ćhämuśhancama.
2Awari, intïpa, quilläpa, uyllurcäpa acchin
manalä chincaśhancama, tamyämuptin
pucutayca manalä cutimuśhancamari yalpay.
3Juc muyunmi wasip täpänincuna chucchupäcunꞌa;
sumä pilyäcunaca curculälinꞌa, mulinucunäpis
ashllayllaña calmi manaña aꞌapäcunꞌachu;
bintananpa licäcunäpis manañam tuquictachu licapäcunꞌa.
4Puncucuna manalä wićhacacaśhancama,
mulinup suynaśhantapis uyalishayquicamari yalpay.
Cananꞌa pälïcunäpa pïchiwyäśhanta
uyaliyalpis yanꞌa-yanꞌallactañamá juc punꞌa uyaliycunqui.
5Chay muyun wichayta ishpiytapis, caminucunäćhu pulilpis manchacunquimá;
almendra jaćhayquipis waytälunꞌa yulätañamá;
awquish paćhcaśhcänüñam ćhaquiquita aysaśhtin pulinqui;
masanniquitapis manañamá munapanquiñachu.
Nunaca wiña-wiñaypä yaćhanancäman manalä lishayquicamari yalpay;
wañucuptiqui pampä apaśhuśhayquićhümá waꞌacücunäpis waꞌapäcunꞌa.
6Lulaśhüniquipi yalpay illaypi cä cadina manalä laćhuśhancama,
ürupi manca manalä paquishancama,
yacu patanćhu wacuyca manalä paquishancama;
yacu chutacu watupis manalä laćhuśhancamari yalpay.
7Chaynütac aychayqui allpapi lulaśha caśhanman manalä cutishancama,
ispirituca manalä uycü Tayta Diosman cutishancama yalpayꞌari.
8Willacücämi nin: “¡Imapis yanꞌal-yanꞌalmá!
¡Lluy ima aycapis chincacüllamá!” nil.
Yaćhachicuycäpa camacalpuynin9Willacüca mas yaćhayniyu calmi yaćhaśhanmannu nunacunäta masta yaćhaycachila. Limaycunacta sumätamá uyaliycula, licaycula, aśhpipaycula, aclayculapis.
10Willacüca sumäta callpanchaculmi limaycunacta taliycula imam cällanman sumä limaycunacta isquirbiycunanpä.
11Yaćhayniyücäpa limaynincuna puntash garuchanümá; limaynincunacta jucllachäśhá uwish michïcunäpa garutinpa puntanćhu läbu cäcänümá.
12Ñatac cananꞌa iju, cayta niycuśhayqui: Librucunacta lulayca mana camacaycuymá; anchap yaćhay-yaćhay cayca pishipaymá.
13Lluy limapaycunaca cayćhümari camacan: Tayta Diosta manchacuy; yaćhachishuśhayquita uyalicuy. Chaymá lluy nunap lulaycunanca cayan.
14Lluy ima lulaśhanpïpis nunacunäta Tayta Dios cäraycunꞌamá masqui pacallap allinta ütac mana allinta lulaśhanpïpis.
Who We AreWhat We EelieveWhat We Do
2025 by iamachristian.org,Inc All rights reserved.
