2 Samuel 20 - Old Testament Quechua Wanca（QVW）

Davidpa cuntranmi Seba śhalcun

1Chayćhümi cayäña Benjamin ayllupïta Bicrip chulin Seba. Pay mana allin juyu nunam cala. Paymari curnitillacta tucaśhtin ayaycaćhacuyan:

“Davidwan manam ima lulananchicpis canñachu;

Isaipa chulin Davidpa imallanpis manañamá tücaycamanchicñachu.

¡Israel nunacuna wasiquita-camaña cuticulcay!” nil.

2Niptinmari lluy israelcunaca Davidta caćhaycul Bicrip chulin Sebacta aticulcan. Ñatac Juda läducunacá mandacüninman masïsu chalapaculmi Jordan mayupïta aśhta Jerusalencama liwshipäcula.

3Mandacü David Jerusalenćhu cä palasyunman ćhälulmi ćhunca uyway walmin2Sam 16.22. täpäcunäta yalalcachimul juc wasiman ćhulaycula. Chayman wićhayculmi juccunawan täpachila. Micuyta apayächilpis paycunawan manañamá puñulachu. Paycuna wañupäcunancamañamari japanyäśha-yupay wićhäśha capäcula.

4Chaypïtam Amasacta mandacüca nin: “Juda pilyäcunäta juntuycul quimsa muyunpïta cayman juntuchimuy. Ampis cayćhümi canayqui” nil.

5Niptin pilyäcunäta juntü Amasa lilmi quimsa muyunllactá juntuyta nï atipamulachu.

6Chaymi Abisaita David nin: “Bicrip chulin Seba cananꞌa Absalonpïtapis mas llaquimanmi ćhulämäśhun. Chayurá canan-pacha pilyänïcunawan ipanta atiy. Yanꞌalmi murällaśha malcaman ćhälul ayipäma imachwan” nil.

7Niptinmi Abisai Joabwan lluy pilyänincunawan, jinaman Ceret, Pelet ayllucunap allinnin pilyänincunawan Jerusalenpïta liculcan Bicrip chulin Sebacta atï.

8Chaypi Gabaon malcaćhu jatun wanca caśhanman ćhäläliptinmi Amasa śhamula paycunawan tincuycü. Chayćhümi Joab pilyä müdananwan cayäla; wiyawninćhüñatacmi jatun cuchillu ćhulacunan watapacüśha cayäla. Chay ćhulacunpïtam Joab pulilcuptin jatun cuchillun juclla yalülun.

9Chayćhümi Joab allï maquinwan Amasap shapunta chalaycula muchaycunanpä-yupay: “Wawillay, ¿imanuyllam cayanqui?” nil.

10Amasañatacmi mana tantialachu juc maquinćhu jatun cuchillucta Joab apaśhanta. Chaywan Amasacta pataćhu tucsïluptinmi allashquincunapis pampäman tallicacämun. Juc tucsiyllawan wañüluptinmi manaña yapalpulachu. Jinalculmi Joab wawꞌi-caśhan Abisaiwan Bicrip chulin Sebacta ashï pasaculcan.

11Joabpa jucnin pilyäninmi aya Amasap lädunćhu śhaycucuycul nicuyan: “¡Joabtawan Davidta cuyäcunacá, Joabta atipäcuy!” nil.

12Ñatac caminup ćhawpinćhu yawarninpa jananćhu Amasa cayaptinmi chayninpa pasä pilyäcunaca śhaycucuycul anśhaläculcäla. Chayta tantiälulmi chay pilyäca ćhaclaman aśhulcachil müdanawan pampaycula.

13Chaynu aya Amasacta juc läduman aśhüchiptinlämi lluy pilyäcunaca Joabwan pasaculcan Bicrip chulin Sebacta ashï.

14Sebañatacmi jinantin Israel läducuna capäcuśhanpa pasal Abel-bet-maaca malcaman ćhäla. Chaymanmi papänin Bicrip lluy aylluncuna paywan juntunacälälin.

15Joabpa lluy pilyänincunañatacmi Abel-bet-maaca malcaman ćhälälil cunćhälälin. Jinalculmi malcap murällanta ćhaćhachipäcunanpä pilap waśha ipanman allpacta juntupäcula.

16Chay malcapïmi yaćhayniyu walmi nicayämun: “Uyalipämay, uyalipämay; Joabta niycuy cayman śhamul yaꞌawan limaycunanpä” nil.

17Chaynu Joab aśhuycuptinmi walmica: “¿Joabchun am cayanqui?” nin.

Niptinmi: “Aw, Joabmi cayá” nin.

Chaynu niptinmi walmica: “Cay nunallayqui nishuśhayquita uyaliycallämay” nin.

Niptinmi: “Má, nimay” nin.

18Niptinmi walmica: “Unay timpu nunacunaca ima ñacayćhüpis capäcul: ‘Abel malcaman tantiaycachimänanchicpä lishun’ nipäculam.

19Israelpa lluy malcanpïpis jawca cawsacü, chalapacuna, puydïnin malcam capäcú. Chaychun ¡camacaycüluyta am munayanquiman! ¿Imapïtá Tayta Diospa cäninta mana caśhanman muyuchiyta munanqui?” nin.

20Niptinmi Joab: “Chaytá manam uchuyllapis pinsalcüchu. Manamá tunishächu nï pampamanpis muyuchishächu.

21Chaymanchu manamá yaꞌa śhamulá sinuꞌa Efrain lädup ulꞌuncunaćhu Bicrip chulin Sebacta chalämi. Paymari mandacü Davidpa cuntran śhalcülun. Chay nunällacta maquïman ćhulaycämaptiquiꞌa cay malcapïta aśhuculcaśhämi” nin.

Niptinmi walmica: “Allinmi, murällanpam umanta jitalpälälimuśhä” nin.

22Nilculmi walmica malcäman lilcul allin yaćhaywan lluyta nila. Jinaptinmi Bicrip chulin Sebap umanta jululcälil Joabman chapiycälälin. Chaymi Joab curnitillacta tucächiptin lluy pilyänincuna chay malcacta caćhaycul wasinta-cama cuticulcan. Joabñatacmi Jerusalenta cutila mandacücäwan limä.

Davidpa puydï yanapänincuna 2Sam 8.15-18; 1Cro 18.14-17

23Chaynüpam Joab Israelćhu pilyäcunap puydïnin cala. Ceret, Pelet ayllucunap mandäninñatacmi Joiadapa chulin Benaias cala.

24Sasa-sasa lulaycunäta licäcäñatacmi Adoram cala. Ima pasaśhancunätapis isquirbïcäñatacmi Ahiludpa chulin Josafat cala.

25Sevañatacmi isquirbïca cala. Sadocwan Abiatarñatacmi sasirdüti capäcula.

26Jair malcapi cä Irañatacmi Davidpa sasirdütin cala.