Isaias 19 - Old Testament Quechua Wanca（QVW）

Egipto lädu imanuypis cananpämi nin

1Egipto lädu imanuy cananpämi Tayta Dios willacachila.

Licapäcuy, “shiw” niyä pucutayman sillacüśham,

Tayta Dios Egiptoman śhacayämun.

Egiptoćhu taytachancunam paypa ñawpäninćhu chucchucuyalcan;

Egipto nunacunäpis cawsayninćhüñachu manañamá capäcun.

2Tayta Diosmi nin:

“Egipto nunacunätam

quiquin-pulacta pilyachishä.

Wawꞌi-caśha-pulam, apanacuśhan-pulam,

malca-pulam, mandacü-pulam pilyapäcunꞌa.

3Egiptop ima lulay munaśhancunactapis

mana caśhanman yaꞌa muyüchiptïmi jucmanyapäcunꞌa.

Jinaptïmi muspayninćhünu licalilcälil taytachancunacta,

rüjancunacta, licacünincunacta, wañücunap almancunactapis tapucuyta ćhapapäcunꞌa.

4Awari, sumä juyu mandacücäpa maquinmanmi

Egipto nasyunta yaꞌa ćhulaycuśhä.

Nana-nanay maquiwanmi juyu mandacüca maquinćhu cachinꞌa.

Yaꞌa sumä munayniyu Tayta Diosmari niyá” nil.

5Nilo mayup yacunmá pishinꞌa;

yacuca chaquïlulmá chincacunꞌa.

6Sicyacunämi lluy chaquïlunꞌa;

tacsha mayu lïcunämi chincälunꞌa;

śhuꞌuśhcunaca, tuturacunaca ismüläliptinmari aśhnacunꞌa.

7Nilo mayup patanćhu lluy wiñäcunaca

awïläliptin, talpuśha cäcunaca

chaquïläliptinmi imapis mana canꞌañachu.

8Jinaptinmi challwa chaläcunaca llaquiculcanꞌa;

Nilo mayućhu ansuyluwan chaläcunaca jucmanyapäcunꞌamá;

yacucunäćhu atarräyawan chaläcunäpis sumä sumämá llaquiculcanꞌa.

9Lïnu lanta mana captinmi cusichäcunäpis jucmanyäśha licalipäcunꞌa;

chay awäcunäpäpis puchca mana captinmari wällïsha capäcunꞌa.

10Tilarćhu awäcunäpis pasaypi jucmanyäśham capäcunꞌa;

chayćhu lulapacücunäpis pasaypi llaquisham capäcunꞌa.

11Rasunpa, Zoan nishan malcap puydïnincuna pasaypi luclucunamá.

Allin caminaycüca mandacücäta allinta limapaycunantá,

luclu caycunactañamá limapaycun.

¿Imanuypamá “Allin yaćhayniyücunäpa milayninmi;

unay mandacücunäpa milayninmi cayá” nil niyanman?

12Mandacü, ¿mayćhütá yaćhaysapa

caminaycüniquicuna cayan?

Yaćhapäculꞌa, cananꞌari má, niycälishunqui

sumä munayniyu Tayta Dios imacunacta Egiptowan lulanantapis.

13Zoanpa puydïnincuna pasaypa luclucunamanmá muyülälin;

Menfis malcap puydïnincuna ingañachicälälinmá;

malcacunap puydïnincunamá Egiptocta

mana allincäman jitaycälälin.

14Paycunaman Tayta Diosmari pantachicuyta uycüla.

Jinaptinmi Egipto nasyun ima

lulaśhancunäćhüpis lluy pantälälin.

Chaymi shinca gumitälul tanlicaćhaśhannu muyuycaćhaculcan.

15Puntanninćhu cäcäpis ipanninćhu cäcäpis

Egiptopä manañamá ima lulaytapis atipanꞌañachu;

allinnin śhuꞌuśhnu ütac tuturanülla cäcäpis

manañamari ima lulaytapis atipanꞌañachu.

16Chay muyuncäćhu sumä munayniyu Tayta Dios mućhuycachinanpämi maquinta pallalcunꞌa. Jinaptinmi Egipto nunacunaca walminu llaqui-llaquicta chucchupäcunꞌa.

17Egipto nunacunaca Juda lädu nunacunätam sumä-sumä manchaculcanꞌa. Sumä munayniyu Tayta Dios Egiptocta camacaycunanpä camachisha cayaptinmari paycunacta yalpalcullal llaqui-llaquicta chucchupäcunꞌa.

18Chay muyun ćhämuptinmi Canaan lädup hebreo limayninta, picha malcacuna Egiptoćhu limapäcunꞌa. Paycunam sumä munayniyu Tayta Diosman chalapaculcänanpä limaliculcanꞌa. Jucninmi Intip Malcan nisha canꞌa.

19Chay timpućhu Egiptop ćhawpinćhümi Tayta Diosman uycuna juc patac caycunꞌa. Lindïrunćhüñatacmi Tayta Diosta yalpanapä śhaywa śhalcachisha canꞌa.

20Chaymi Egiptoćhu juc siñal caycunꞌa sumä munayniyu Tayta Diosta yalpapäcunanpä. Sïchuśh ñacachïnincuna sumä ñacachiptin Tayta Diosta ayaculcaptinꞌa, paymi libraycüninta, yanapaycüninta salbaycunanpä caćhamunꞌa.

21Egiptocunämanmari Tayta Dios lisichicunꞌa. Awari, chay muyunćhu Egiptocunaca Tayta Diosta lisipäculmi alawayninwan uywacunactapis, micuycunactapis uycälinꞌa. Chayćhu ima limaliculcäśhantapis lulaycälinꞌamá.

22Egiptocta Tayta Diosmari mućhuycachinꞌa; lawćhayculpis allinyaycachinꞌamá. Tayta Diosman cuticalcämuptinmari mañacuyninta uyaliycul allinyaycachinꞌa.

23Chay muyunćhümi Egipto lädupi aśhta Asiria läducama caminu ćhanꞌa. Chaymi Egiptocunaca Asiriaman yaycapäcunꞌa; Asiriacunäpis Egiptoman yaycapäcunꞌa. Chaynütacmi Asiriapis, Egiptopis Tayta Diosta alawapäcunꞌa.

24Chay muyunćhümi Israel nasyunca, Egipto nasyunwan Asiria nasyunwan cusca jinantin pachäćhu cäcunäpa allinninpä caycunꞌa.Gen 12.3.

25Sumä munayniyu Tayta Diosmari allin capäcunanpä niycunꞌa: “Egipto malcá allin caycuchun; lulacuśhá Asiria allin caycuchun; yaꞌapa tücäní Israelpis allin caycuchun” nil.