Josue 10 - Old Testament Quechua Wanca（QVW）

Amhor läducunätam camacaycälälin

1Jerusalenpa mandacünin Adonisedecpis yaćhälunmi Hai malcacta Josue llallilcul lluy camacaycüśhanta. Jerico malcacta puydïnintawan lulaśhannümi Hai malcactapis puydïnintinta camacaycüla. Chaynütacmi Adonisedec yaćhäla Gabaon nunacunäta israelcunaca mana wañuchinanpä limanaculcul paywan cuscaña yaćhapäcuśhanta.

2Gabaon malcaca jatu-jatun puydï malcamari cacula; Hai malcapïpis mas jatunmi cala. Pilyänincunapis sumä-camam caculläla. Chaynu captinmi mandacü Adonisedec lluy nunancunawan chucchucuyalcäla.

3Chaymi mandacü Adonisedec willachimula: Hebronpa mandacünin Hohamman, Jarmutpa mandacünin Pireamman, Laquispa mandacünin Jafiaman, Eglonpa mandacünin Debirman.

4Paycunamanmi caynu willachimula: “Śhapämul yanapapämay Gabaon malcawan pilyanapä. Paycunamari israelcunäwan, Josuewan cawsapäcunanpä limanacälälin” nil.

5Chaymi Amhor läducunäpa pichantin mandacünincuna jucllachanacälälin: Jerusalenpa, Hebronpa, Jarmutpa, Laquispa, Eglonpa mandacünincuna. Chaynu jucllachanacaycälilmi pilyäninwan-cama pilyapämü lipäcul Gabaonpa chimpanćhu allacaycälinanpä listu-listu cacuyalcäla.

6Chaymi Gabaon läducunaca Gilgalćhu Josue jamaśhanman willacüta caćhala cay nil: “¡Canan-pacha śhapämulꞌari salbaycälillämay! Cay nunayquicunacta amari caćhaycapallämaychu. Yanapaycälillämayꞌari, ulꞌucunäćhu cä Amhor lädu lluy mandacücunämi jucllachanacälälin camacaycälälimänanpä” nin.

7Niptinmi Josue lipäcula Gilgalpïta lluy nunancunawan, alli-cama pilyänincunawan.

8 Tayta Diosñatacmi Josueta nin: “Ama manchacuychu, yaꞌami maquiquiman ćhulaycamú. Paycuna imanaculcalpis manamá amta llalliyta atipapäcuśhunquichu” nil.

9Chaypïtam Josue Gilgalpïta walächi lipäcul Amhor läducunäman unꞌaypi yaycälälin.

10Chay israelcunäpa puntanćhümi Amhor läducunäta Tayta Dios chucchuchicuyan. Jinacuyalcaptinmi Israel nunacunaca Gabaon malcäćhu lluy camacaycälälila. Chaynütac ayïcunätapis Bet-horonman lï caminunninpa atipäculmi aśhta Azeca, Maceda malcäcama wañülächila.

11Chay Amhor läducunaca israelcunäpïta ayiyalcal Bet-horonta jiꞌalpuyalcaptinñatacmi Tayta Dios jatućha lumictanu luntucta tamyächimun aśhta Azeca malcäcama. Chay luntuwanmi israelcunaca ispädawan wañuchipäcuśhanpïtapis mas-maslä wañülälila.

12Amhor läducunäta israelcunäpa maquinman ćhulaycuśhan muyunmi israelcunäpa puntanćhu Tayta Diosta Josue mañacula: “Gabaonćhu inti śhaycuy; Ajalonćhu quilla śhaycuy” nil.

13Chaymi intica śhaycülun, quilläpis jamaycülun Israel läducunaca ćhïnicünincunacta camacaycälälinancama. Cay isquirbïsha cayan Jaser2Sam 1.18. librućhümi: Intica ćhawpi muyun śhaycülulmi anyaśh muyunnu mana jiꞌalpulachu.

14Chaynu muyunꞌa manamá unaypis nï imaypis juc calachu. Chay muyunllamari nunallap nishanta Tayta Dios lulaycula. Paymari Israel caśhtacunäpïta pilyayäla.

15Chaypïta Josuemi lluy pilyänincunawan Gilgalćhu jamapäcuśhanman cutipämula.

Picha mandacücunätam Josue wañuchin

16Picha mandacücunäñatacmi ayiculcal Macedaćhu cä maćhayman pacacälälila.

17Jinaptinmi Josueman willaycälälila: “Maceda malcaćhu cä maćhayćhümi pacacälälisha cayalcan” nil.

18Niptinmi Josue: “Chay maćhaypa puncunman jatućha lumicunacta tanꞌaycul wićhapämuy. Jinaman täpä nunacunactapis ćhulapämuy.

19Mana śhaycaycälilña ćhïnicüniquicunacta atipäcul ipanpa camacaycäläliy. Malcancunaman amari yaycachipäcuyñachu. Paycunacta Tayta Diosmi maquiquimanña ćhulaycämun” nin.

20Chayćhümi Josuewan Israel pilyäcunaca Amhor läducunäta lluy camacaycälälila. Juc ishcayllañam murälläśha malcancunaman ayiculcäla.

21Israel pilyäcunäñatacmi ichá Macedaćhu Josue jamapäcuśhanman allin sänu-camalla cutipäcula. Chay muyunpïtam Israelpa cuntran mayanpis manaña limalcapäculachu.

22Chaypïtam nunancunacta Josue nin: “Maćhaypa puncunta quićhaycul picha mandacü Amhor läducunäta puśhapämuy” nil.

23Niptin-pachallam pichantin mandacücunäta maćhaycäpi julälälimula: Jerusalenpa, Hebronpa, Jarmutpa, Laquispa, Eglonpa mandacünincunacta.

24Ćhächimuptinmi lluy Israel pilyäcunäta ayalcachimul liwshï puydïnincunacta nin: “Aśhuycälimul cay mandacücunäta cuncaćhu-cama jalüläliy” nil. Niptinmi puydïcunaca chaynu jalülälila.

25Jinaptinmi jalücunäta Josue nin: “Ama manchaculcaychu nï jucmanyapäcuypischu. Aśhwanpa callpanchacul sumäpa śhaycaycäliy. Cay lulaśhannümi Tayta Dios lulaycunꞌa lluy ćhïnicüniquicunawanpis” nil.

26Nilculmi chay picha mandacücunäta Josue walcälächila. Jinalculmi picha lantaćhu tardilpunancama walcalächila.

27Intica jiꞌacalpuptinñam Josue caćhala chay walcaläśhanpi jululcul pacacuśhan maćhaycäman wicapapämunanpä. Jinalcälilmi jatućhaćhä lumicunawan maćhayta wićhälälila. Chayćhümi canancamapis cayalcan.

Waquin malcacunactam camacaycun

28Chay muyunllam Maceda malcacta Josue duyñuchacuycul lluy nunancunacta, mandacünintapis ispädawan camacaycüla. Manamá mayanllapis cawsayniyu quïdalachu. Jerico malcap mandacünintanümari Macedap mandacünintapis pasäla.

29Chay Macedapïta Josue lluy israelcunäwan Libna malcaman ćhayculmi lluy camacaycälälila.

30Chay malcactapis mandacünintintam israelcunäpa maquinman Tayta Dios ćhulaycüla. Chaymi chayćhu nunacunäta ispädanwan camacaycälälila. Manamá jucllapis cawsayniyu puchuyculachu. Jericopa mandacüninta pasaśhannümi Libnap mandacünintapis pasäla.

31Chay Libnapïtam Josue lluy israelcunäwan Laquis malcaman lipäcula. Chaypa sircanćhu ćhulanacaycälilmi pilyayta allacaycälila.

32Chay malcactapis Tayta Diosmari Israelcunap maquinman ćhulaycüla. Chaymi ishcay muyuncäćhu llallilcul ispädawan lluy camacaycüla. Libna malcawan pasaśhannüllam Laquis malcawanpis pasäla.

33Ñatac Gezerpa mandacünin Horammi lluy pilyänincunawan Laquis malcacta yanapänanpä lila. Chayćhümi paycunacta lluy nunantinta mandacünintinta llallilcul jucllactapis mana caćhaycul ispädawan Josue lluy-lluy camacaycälälila.

34Chay Laquispi Josue lluy israelcunäwan Eglon malcamanmi lipäcula. Chay sircascanćhu ćhulanacaycälishanpïmi pilyayta allacaycälila.

35Juc muyunllaćhümari lluy llallilcälil Laquis malcaćhu lulaśhannu lluy cawsäniyu cäcunäta camacaycälälila.

36Chay Eglon malcapïtam Josue pilyänincunawan HebronJos 15.13; Jue 1.10. malcaman lipäcul pilyayta allacaycälin.

37Chayćhümi lluy malcacunäta duyñuchacaycälil mandacünintinta, malcancunaćhu lluy cäcunätapis ispädawan camacaycälälila. Eglon malcaćhu lulaśhannümari Hebron malcacunäćhüpis lluy cawsayniyücunäta camacaycälälila.

38Jinalculñatacmi chay Ebronpïta Josue lluy pilyänincunawan DebirJos 15.15; Jue 1.11. malcaman lipäcul pilyayta allacaycälila.

39Chayćhümi duyñuchacaycälil mandacüninta, malcancunaćhu lluy cäcunätapis ispädawan camacaycälälila. Cawsayniyu manamá jucllayllapis quïdayculachu. Hebron, Libna malcaćhu lulaśhannümari Debir malcactapis mandacünintinta camacaycälälila.

40Chayurá chaynüpam Josue duyñuchacuycula ulꞌucunäćhu, Neguevćhu, pampancunäćhu, wätancunäćhu cäcunätapis.Jos 11.21; Jue 1.9. Lluy mandacünincunacta llallilculmi jucllactapis cawsayniyüta mana caćhayculachu. Lluy cawsayniyücunämi camacaycüśha cala Israelpa Tayta Diosnin nishanmannu.

41Chayurá Josue lluy-lluytamari llallïla Cades-barneapiNum 13.26. aśhta Gazacama; Gosen lädupïtá aśhta Gabaoncamam.

42Quiquin Israelpa Tayta Diosnin malcanpïta pilyaptinmari chay malcacunacta, mandacünintinta jucllaćhu-cama llallïla.

43Chaypïta Gilgalćhu jamapäcuśhancämanmi lluy pilyänincunawan Josue cutipäcula.