1 Tayta Diosllay, piñacuyniquićhu amañari piñapämayñachu,
rabyacuyniquićhu amañari camacaycämaychu.
2Flïchayquicunamá aychäman śhaticacämun.
Maquiquitamá yaꞌaman ćhulaycämunqui.
3Piñacuyniquip-cawsanmá jinantin aychalläpis manaña aychachu.
Juchäpa-cawsanmá jucllay tullulläpis manaña cawsanchu.
4Mana allin lulaynïcunamá umäcamaña ćhälun.
Llasä-llasä ipinüñamá ñiticalpayäman.
5Luclunu lulaśhäpïmá lluy dañädücunapis
ishuytayal millanaśh-millanaśh aśhnayan.
6Anyaśh muyun llaquishallamá puliyá.
Pinꞌacüśha, uyshucuśhallamá cayá.
7Waśhäcunamá walaypa-walal lawyayan.
Jinantin aychá manañamá aychachu.
8Pasaypi ñutüśha mana callpayüñamá cayá.
Śhunꞌüpis manaña śhunꞌu captinmi ayacamullá.
9Tayta Diosllay, lluy munaylläcunacta
am tuquictamá yaćhaycunqui.
Ima wañupacuśhäcunapis ampïta
manamá pacaycuśha canmanchu.
10Śhunꞌulläpis pasaypiñamá ticticyäcuyällan.
Callpäpis caćhaycäcayämanñam; ñawïpis aspacalpuyällanñam.
11Cay ishyaynï-cawsamá allin apanacuśhäcuna,
lisinacuśhäcuna caćhaycäläliman.
Ayllücunapis calupälälimanmá.
12Wañuchimayta munäcuna trampacunactamá ćhuläläliman.
Mana allinnïta ashïcunaca camacaycämänanpämá limanaculcan;
palpachipämänanpämá anyaśh muyun ingañacuycunacta umachanaculcan.
13Yaꞌañatacmi ichá mana linliyünu nï uyalïtucüchu.
Mana shimiyünu nï limalcüchu.
14Upa linli nunanümá cayá;
upa shimiyu nunanümá mana limalicüchu.
15Am Tayta Diosllätam alcaycuc.
Am Tayta Diosllämari uyaliycallämanqui.
16Yaꞌamari nilac: “Palpüluptí amari asipapämächunchu;
amari nunatucüśha jatunchaculcächunchu” nil.
17Cananꞌa palpulpunayäñamá.
Nanayní uchuyllactapis manañamá jamaycunchu.
18Juchäta willapaculläśhayqui.
Mana allin lulaynïmá llaquillaćhüña cachiman.
19Ćhïnimänïcuna sumä-camam cawsayalcan.
Yanꞌalpi ćhïnimänïcuna achca-achcamanñam milälälin.
20Allincäta lulaycuptïmi mana allincäwan cutiycachipäman.
Allincäta ashiycuptïmari cuntrá śhalcapäcun.
21 Tayta Diosllay, amari caćhaycallämaychu.
Taytallay, amari unꞌaycallämaychu.
22Salbaycamäní Tayta Diosllay,
¡apurayllaña yanapaycamay!
Who We AreWhat We EelieveWhat We Do
2025 by iamachristian.org,Inc All rights reserved.
