Salmane 13 - Bibel 2011 - Bibelselskapet(Bibel2011)

1Til korleiaren. Ein salme av David.

2 44,25; 69,18; 88,15; 102,3 Kor lenge, Herre?

Vil du gløyma meg for alltid?

Kor lenge vil du gøyma andletet for meg?

3Kor lenge skal eg ha uro i sjela

og sorg i hjartet dagen lang?

Kor lenge skal fienden ha makt over meg?

4 19,9 Sjå meg! Svar meg, Herre, min Gud!

Gjev auga mine lys

så eg ikkje sovnar inn i døden,

5 25,2 så fienden min ikkje seier:

«Eg har vunne over han»,

og mine motstandarar ikkje jublar når eg vaklar.

6 35,9; 103,2 Men eg set mi lit til di miskunn,

mitt hjarte skal jubla over di frelse.

Eg vil syngja for Herren,

for han har gjort godt mot meg.