Eshaiah 51 - Welsh Translation by Thomas Briscoe 1894 (New Testament, Job, Psalms, Proverbs and Isaiah, and selections from Genesis and Exodus)

1Gwrandêwch arnaf fi, ddilynwŷr cyfiawnder,

Y rhai (sy) ’n ceisio Iehofah;

Edrychwch ar y graig y’ch naddwyd (o honi).

Ac ar geudod yr ogof y’ch cloddiwyd (o honi).

2Edrychwch ar Abraham eich tad,

Ac ar Sarah a’ch esgorodd;

Canys ei hunan y gelwais ef,

A bendithiais ef, ac amlhëais ef.

3Canys fe gysura Iehofah Tsïon,

Cysura ei holl anghyfanneddleoedd hi,

Ac Efe a wna ei hanialwch hi fel Eden,

A’i diffaethwch fel gardd Iehofah:

Gorfoledd a llawenydd a geir ynddi,

Rhoddiad diolch, a llais cân.

4Gwrandêwch arnaf Fi, bobloedd;

A chenhedloedd, â Mi clust-ymwrandêwch.

Canys cyfraith oddi wrthyf Fi a aiff allan,

A’m barn I yn oleuni ’r bobloedd a sefydlaf.

5Agos yw Fy nghyfiawnder, myned allan y mae Fy Iachawdwriaeth,

A’m braich y bobloedd a farnant.

Wrthyf Fi y mae ’r tiroedd pell yn disgwyl,

Ac am Fy mraich y gobeithiant.

6Dyrchefwch tua ’r nefoedd eich llygaid,

Ac edrychwch ar y ddaear isod;

Canys y nefoedd, fel mŵg, a ddiflannant,

A’r ddaear, fel dilledyn, a heneiddia,

A’i phreswylwŷr yr un modd a fyddant meirw;

Ond Fy iachawdwriaeth I yn dragywydd a fydd,

A’m cyfiawnder ni ddistrywir.

7Gwrandêwch arnaf, y rhai a adwaenoch gyfiawnder,

Y bobl (ag y mae) Fy nghyfraith yn eu calon,

Nac ofnwch waradwydd dynionach,

A rhag eu difenwad nac arswydwch.

8Canys, fel dilledyn, y bwytty’r gwyfyn hwynt,

Ac, fel gwlan, yr ysa’r pryf hwynt,

Ond Fy nghyfiawnder I yn dragywydd a fydd,

A’m hiachawdwriaeth yn oes oesoedd.

9Deffro, deffro, gwisg nerth, o fraich Iehofah,

Deffro fel yn y dyddiau gynt, yr oesoedd hên,

Onid Tydi (yw) ’r hwn a dorraist Rahab, ac a archollaist y ddraig?

10Onid Tydi (yw) ’r hwn a sychaist y môr, dyfroedd y dyfnder mawr,

Yr hwn a wnaethost ddyfnderoedd y môr yn ffordd i fyned drwodd i’th adbrynedigion?

11Yr un modd rhyddedigion Iehofah a ddychwelant,

Ac a ddeuant i Tsïon â llawen-gân,

A llawenydd tragywyddol ar eu pennau;

Gorfoledd a llawenydd a gânt hwy,

Ac ymaith y ffŷ gofid a griddfan.

12Myfi, Myfi (yw) ’r hwn a’ch diddana chwi:

Pwy (wyt) ti fel yr ofnit ddynionach a drengant,

A mab dyn (yr hwn) a 2wneir (fel) 1 glaswelltyn,

13Ac yr anghofit Iehofah dy Wneuthurwr,

Yr Hwn a estynodd y nefoedd, ac a seiliodd y ddaear,

Ac yr arswydit beunydd bob dydd

Rhag angerdd llid y gorthrymmydd,

Fel ped (fai) yn barod i ddinystrio?

Ond pa le (y mae) angerdd llid y gorthrymmydd?

14Brysio y mae dy ostyngwr i beri dattodiad;

Ac ni threnga (’r carcharor) hyd lwyr-ddistryw,

Ac ni phalla ei fara ef:

15Canys Myfi Iehofah (yw) dy Dduw di,

Yn tawelu ’r môr er rhuo o’i donnau;

Iehofah y lluoedd (yw) Ei enw.

16A gosodais Fy ngeiriau yn dy enau,

Ac ynghysgod Fy llaw y’th orchuddiais,

I estyn y nefoedd ac i seilio ’r ddaear,

Ac i ddywedyd wrth Tsïon, Fy mhobl tydi (ydwyt).

17Ymddeffro, ymddeffro, cyfod, Ierwshalem,

Yr hon a yfaist o law Iehofah gwppan angerdd Ei lid Ef,

Gwaddod cwppan honciad a yfaist, a sugnaist.

18Nid (oes) arweinydd iddi o’r holl feibion a esgorodd,

Ac nid (oes) a ymaflo yn ei llaw o’r holl feibion a fagodd.

19Y ddau (beth) hyn a ddigwyddasant i ti; pwy a ofidia drosot?

(Sef) dinystr a drylliad, newyn a’r cleddyf; pwy a’th gysura?

20Dy feibion a lewygasant, gorwedd y maent

Ym mhen pob heol fel tarw gwŷllt mewn rhwyd,

Yn llawn o angerdd llid Iehofah, o gerydd dy Dduw.

21Am hynny gwrando yn awr hyn, o gystuddiedig,

A’r feddw ond nid (trwy) win;

22Fel hyn y dywed dy Arglwydd Iehofah,

A’th Dduw (yr Hwn a) ddadleu (dros) Ei bobl,

Wele, cymmeraf o’th law di gwppan honciad,

Gwaddod cwppan angerdd Fy llid,

Ni chwannegi ei yfed mwy;

23A rhoddaf ef yn llaw dy gystuddwŷr,

Y rhai a ddywedant wrth dy enaid, Gostwng, fel yr elom drosot,

A thithau a osodaist dy gefn fel y llawr,

Ac fel heol, i’r rhai a aent drosto.