Psalmau 55 - Welsh Translation by Thomas Briscoe 1894 (New Testament, Job, Psalms, Proverbs and Isaiah, and selections from Genesis and Exodus)

1I’r blaengeiniad tros yr offer tannau. Awdl addysgiadol o eiddo Dafydd.

2Gwrando, O Dduw, fy ngweddi,

Ac nac ymguddia rhag fy ymbil,

3Dyro glust i mi ac erglyw fi!

Dirdynwyd fi yn fy myfyrdod, ac ymderfysgais,

4O herwydd llais y gelyn, rhag gorthrymder yr annuwiol;

Canys perant i anffawd ddisgyn arnaf,

Ac mewn llid, â gelyniaeth y’m herlidiant;

5Fy nghalon a ofidia o’m mewn,

A dychrynfëydd angau a syrthiasant arnaf,

6Ofn ac arswyd a ddaeth arnaf,

A’m gorchuddio y mae echryd;

7A dywedyd yr wyf, “O na bai i mi adennydd fel colommen,

Fel yr ehedwn ymaith ac y trigwn yn llonydd,

8—Wele, ymbellhâwn gan ffoi ymaith,

Llettywn yn yr anialwch,—Selah.

9Fel y brysiwn i ddiangfa i mi,

Rhag y gwỳnt rhuthrol, rhag y dymmestl!”

10Dinystria, O Arglwydd; hollta cu tafodau,

—Canys gwelais drais a chynnen yn y ddinas,

11Dydd a nos yr amgylchant hi ar ei muriau,

A drygioni a thrychni (sydd) ynddi hi,

12Camweddau (sydd) ynddi hi,

Ac ni chilia o’i hëangle anrheithiad a thwyll,—

13Canys nid gelyn a’m difenwodd, fel y’i dïoddefwn,

Nid fy nghasâwr a ymfawrygodd i’m herbyn, fel yr ymguddiwn rhagddo,

14Eithr tydi,—dyn a brisid (gennyf) fel fi fy hun,

Fy nghymhar, a’m cydnabod,—

15Y rhai a fyddem gyda ’n gilydd yn cynhal melus gyfrinach,

I dŷ Dduw y rhodiem ym mhlith y dyrfa!

16Distryw (a fo) arnynt! disgynent hwy i annwn yn fyw!

Canys drygioni (sydd) yn eu trigfa, (ïe) ynddynt hwy eu hunain.

17Myfi,—ar Dduw yr wyf yn galw,

Ac Iehofah a’m hachub;

18Hwyr, a bore, a hanner dydd yr wyf yn myfyrio ac yn ymderfysgu,

A gwrandawodd Efe ar fy llais,

19Rhyddhâd mewn heddwch a roddes Efe i’m henaid, oddi wrth fy mrwydr,

Canys gyda llaweroedd y maent hwy yn fy erbyn,—

20Fe wrendy Duw a darostwng hwynt,—y Gorseddawg erioed,—

Y rhai nid oes ganddynt gadw llwon,

Ac nid ŷnt yn ofni Duw.

21Estynodd efe ei law yn erbyn y rhai mewn heddwch âg ef.

Halogodd ei gyfammod;

22Llyfn (yw) ymenynaidd eiriau ei enau,

Ond rhyfel (yw) ei galon;

Tynerach yw ei eiriau nag olew,

A hwynt yn gleddyfau noethion.

23Bwrw dy faich ar Iehofah, ac Efe a’th gynnal di,

Ni ad Efe byth i’r cyfiawn ysgogi:

24A Thithau, O Dduw, a’u disgyni hwynt i bydew ’r bedd:

Gwŷr gwaedlyd a thwyllodrus ni byddant byw hanner eu dyddiau,

Ond myfi a ymddiriedaf ynot Ti.