Psalmau 76 - Welsh Translation by Thomas Briscoe 1894 (New Testament, Job, Psalms, Proverbs and Isaiah, and selections from Genesis and Exodus)

1I’r blaengeiniad, ar yr offer tannau. Psalm i Asaph. Cân.

2Adnabyddus yn Iwdah (yw) Duw,

Yn Israel mawr (yw) Ei enw Ef;

3Ac y mae Ei babell yn Shalem,

A’i drigfa yn Tsïon,

4Yno y chwilfriwiodd Efe fellt y bwa,

Y tarian, a’r cleddyf, a’r frwydr. Selah.

5Ysplenydd Tydi, gogoneddusach na mynyddoedd yr yspail!

6Yspeliwyd y cedyrn galon, hepiasant eu hûn,

Ac ni chafodd yr holl wŷr o nerth hŷd i’w dwylaw:

7Gan Dy gystwyad Di, O Dduw Iacob,

Trymgysgodd cystal cerbyd a march.

8Tydi,—ofnadwy Tydi,

A phwy a saif o’th flaen yn amser Dy lid?

9O’r nefoedd y peraist glywed uniondeb;

Y ddaear a ofnodd ac a ostegodd,

10Pan gyfododd Duw i farn,

I achub holl drueiniaid y ddaear. Selah.

11Canys cynddaredd dyn a’th folianna Di,

A gweddill cynddaredd yr ymwregysi:

12Addunedwch a thelwch i Iehofah eich Duw,

Y rhai oll sydd o’i amgylch Ef, dygant anrheg i’r Ofnadwy!

13Tyr Efe ymaith yspryd tywysogion,

Ofnadwy (yw) i frenhinoedd y ddaear.