Iöb 28 - Welsh Translation by Thomas Briscoe 1894 (New Testament, Job, Psalms, Proverbs and Isaiah, and selections from Genesis and Exodus)

XXVIII.

1Dïau y mae hanawdle i’r arian,

A thrigfa i’r aur (yr hwn) a goetha (dyn);

2Haiarn allan o’r pridd a gymmerir,

A’r garreg a dodda (dyn) yn bres;

3 Diwedd a osododd efe i dywyllwch,

Ac hyd bob perffeithrwydd y mae efe yn chwilied

Y graig dywell ac angeuaidd-ddu;

4Fe gloddia efe fwn-dwll hyd bellder oddi wrth y trigiannydd,

Yn anghofiedig gan (eu) traed yr hongiant hwy,

Ym mhell oddi wrth ddynion y crwydrant:

5Y ddaear — o honi y daw bara,

A thani hi y dadymchwelir megis (gan) dân;

6Lle ’r saphir (yw) ei cherrig hi,

A mwn yr aur (a fydd) iddo;

7Llwybr, (sydd iddo) nas gŵyr yr eryr,

Ac nad ardremiodd llygad y barcud arno,

8 Na sathrodd meibion balchder ef,

Nad aeth y rhuedydd ar hyd-ddo;

9Ar y gallestr yr estyn (y mwnwr) ei law,

Efe a ddadymchwel y mynyddoedd o’r gwraidd;

10Yn y creigiau yr hollta efe hyntoedd,

A phob gwerthfawr beth ei lygad a wêl;

11(Ac) fel na ddyhidlont, y dyfrleoedd a rwym efe,

A’r cuddiedig beth a ddwg efe allan i’r goleuni.

12Ond Doethineb — pa le y ceir hyd Iddi?

A pha le hon — (sef) trigfa Deall?

13Nis gŵyr adyn ei gwerth Hi,

Ac ni cheir hyd Iddi yn nhir bywiolion;

14Y dyfnder a ddywaid “Nid ynof fi (y mae) Hi,”

A’r môr a ddywaid “Nid gyda myfi (y mae);”

15Nid oes roddi aur pur am dani Hi,

Nid oes bwyso arian (megis) ei phris Hi;

16Ni chloriannir am dani Hi âg aur coeth Ophir,

Â’r onyx gwerthfawr, ac â ’r saphir;

17Ni phrisir Hi âg aur a gwydr,

Ac (nid oes) newidwriaeth am dani â llestri o aur dilin;

18Cyrelau cochion a grisial, ni feddylir am danynt,

A meddiannu Doethineb (sydd) well na pherlau;

19Ni phrisir Hi â thopaz Ethiopia,

Ag aur coeth puredig ni chloriannir am dani Hi.

20Ond Doethineb — o ba le y daw Hi?

A pha le hon, — (sef) trigfa Deall?

21Ond cuddiwyd Hi oddi wrth lygaid pob (peth) byw,

Ac oddi wrth ehediaid y nefoedd y celwyd Hi;

22Difancoll ac annwn sy’n dywedyd,

“Â’n clustiau y clywsom sôn am dani.”

23Duw sydd yn deall ei ffordd Hi,

Ac Efe a ŵyr Ei thrigfa;

24Canys Efe — hyd eithafoedd y ddaear sy’n edrych,

Tan yr holl nefoedd y gwêl Efe;

25 Pan grëodd Efe bwys i’r gwŷnt,

Ac y cydfantolodd y dyfroedd wrth fesur;

26Pan wnaeth Efe ddeddf i’r gwlaw,

A ffordd i fellt y taranau,

27Yna Efe a’i gwelodd Hi, ac a’i mynegodd Hi,

Ac a’i deallodd Hi, ac a’i chwiliodd Hi,

28Ac a ddywedodd wrth ddyn,

“Wele, ofn Iehofah — hynny (sydd) Ddoethineb,

A chilio oddi wrth ddrwg (sydd) Ddeall.”