Psalmau 96 - Welsh Translation by Thomas Briscoe 1894 (New Testament, Job, Psalms, Proverbs and Isaiah, and selections from Genesis and Exodus)

XCVI.cydmerwch

1 Cron. 16.

1Cenwch i Iehofah ganiad newydd,

Cenwch i Iehofah, yr holl ddaear;

2Cenwch i Iehofah, bendithiwch Ei enw,

Efengylwch, o ddydd i ddydd, Ei iachawdwriaeth;

3Mynegwch ym mysg y cenhedloedd Ei ogoniant,

Ymhlith yr holl bobloedd Ei ryfeddodau;

4Canys mawr (yw) Iehofah a chlodforedig iawn,

Ofnadwy Efe goruwch yr holl dduwiau,

5Canys holl dduwiau y bobloedd (ŷnt) eilunod,

Eithr Iehofah, y nefoedd a wnaeth Efe;

6Ardderchowgrwydd a gorwychedd (sydd) o’i flaen Ef,

Gogoniant a phrydferthwch (sydd) yn Ei gyssegr!

7Rhoddwch i Iehofah, O dylwythau’r bobloedd,

Rhoddwch i Iehofah anrhydedd a gogoniant;

8Rhoddwch i Iehofah anrhydedd Ei enw,

Dygwch offrwm, a deuwch i’w gynteddoedd;

9Gwarogaethwch i Iehofah, mewn addurn sanctaidd,

Crynwch ger Ei fron Ef, yr holl ddaear;

10Dywedwch ym mysg y cenhedloedd, “Iehofah sy ’n teyrnasu,

A sicrhawyd y byd fel na syflo,

Barna Efe’r bobloedd, mewn uniondeb!”

11Llawenyched y nefoedd, a gorfoledded y ddaear,

Rhued y môr a’i gyflawnder;

12Llawen-floeddied y maes a’r oll (sydd) ynddo,

Yna llawen-ganed holl breniau’r coed,

13O flaen Iehofah,—Ei fod yn dyfod,

Ei fod yn dyfod i farnu’r ddaear,

Y barna Efe y byd, mewn cyfiawnder,

A’r bobloedd, yn Ei wirionedd!